ရခိုင်ပြည်နယ်၊ဂွမြို့နယ်၊ ဂျိုင်ကောက်ကျေးရွာနှင့် ၇ မိုင်ခန့်အကွာတောကြီးထဲတွင် ဗုဒ္ဓဘုရားချမှတ်ခဲ့သည့်ဝိနည်းတော်များနှင့်အညီ တရားအားထုတ်ကျင့်ကြံနေသည့် မဟာဝိဟာရတောရကျောင်းကို ၇ ရက်အတွင်းဖယ်ရှားရန် ဂွမြို့နယ်၊ရပ်ကျေးသံဃနာယက အဖွဲ့မှမေလ ၈ ရက်၌ စာထုတ်ညွှန်ကြားလာသည်ဟု တောရကျောင်းကို ဦးဆောင်နေသည့်စာချဆရာတော် ဦးကဝိဓဇကနိရဥ္စရာသို့ မိန့်ကြားသည်။

 
အဆိုပါမဟာဝိဟာရတော၇ကျောင်းကို ကျူးကျော်မြေတွင် ခွင့်ပြုချက်မ၇ဘဲကျောင်းသင်္ခမ်း တည်ဆောက်သည်ဟုဆိုကာ  ၇ ရက်အတွင်းဖယ်ရှားပေးရန် ဂွမြို့နယ်၊ရပ်ကျေးသံဃနာယက အဖွဲ့မှမေလ ၈ ရက်၌ စာထုတ်ခိုင်းစေလာသည်ဟု ဆရာတော်က မိန့်ကြားသည်။

"ဘုန်းကြီးတို့ကျောင်းမှာက မိုးရာသီဝါတွင်းကာလကလွဲရင် သံဃာတော်တွေက တောထဲသစ်ပင်တွေအောက်မှာပဲ သီတင်းသုံးကြတာပါ။ဒါပေမယ့်ဝါတွင်းကာလမှာ မိုးထဲမှာသီတင်းသုံးနေထိုင်ဖို့က မဖြစ်နိုင်ဘူးလေ။ အဲဒါနဲ့ ဝါးကပ်ကာ၊ အုန်းမိုး ကျောင်းသင်္ခမ်းကို ဆောက်ခဲ့တာ။အဲဒါကို ခွင့်ပြုချက်မရှိဘဲကျောင်းဆောက်တယ်၊ သိမ်သမုတ်တယ်ဆိုပြီးတော့ ဖယ်ခိုင်းတာပါ"မိန့်ကြားသည်။

အဆိုပါမဟာဝိဟာရတော၇ကျောင်းတိုက်ကို ဂွမြို့နယ်၊ဂျိုင်ကောက်ကျေးရွာဇာတိဖွား ဆရာတော်ဦးကဝိဓဇ သက်တော်(၃၃)နှစ်၊ ဝါတော် (၁၂)ဝါက ပြီးခဲ့သည့်မတ်လမှစတင်ကာ ဦးဆောင် တည်ထောင်ခဲ့ခြင်းဖြစ်သည်။

တောရကျောင်းစတင်တည်ထောင်စဥ်ကပင် ဝါတွင်းကာလသံဃာတော်များသီတင်းသုံးနိုင်ရန် ကျောင်းသင်္ခမ်းတည်ဆောက်ခွင့်ရရှိရေးရပ်ကျေးသံဃနာယကအဖွဲ့ထံ စာရွက်စာတမ်းများနှင့် ပြီးခဲ့သည့်မတ်လက အကြိမ်ကြိမ်တောင်းခံခဲ့သည်ဟုဆရာတော်ဦးကဝိဓဇက မိန့်ကြားသည်။

ရပ်ကျေးသံဃနာယကဥက္ကဋ္ဌဆရာတော်ကိုယ်တိုင်ကသင်္ကြန်နှစ်ဆန်းတစ်ရက်တွင် ခွင့်ပြုချက်ရအောင်ဆောင်ရွက်ပေးမည်ဟုနှုတ်အားဖြင့်သဘောတူညီခဲ့သော်လည်း နောက်ပိုင်းတွင်ခွင့်ပြုချက်မပေးနိုင်ဟုငြင်းဆိုခဲ့သည့်အပြင် ယခုကဲ့သို့ နေရာမှဖယ်ရှားခိုင်းလာကြောင်း ဆရာတော်ဦးကဝိဓဇက မိန့်ကြားသည်။

အဆိုပါတောရကျောင်းတည်ထောင်ထားသည့်မြေနေရာမှာ ရပ်ကျေးသံဃနာယက အဖွဲ့မှစွပ်စွဲသလိုကျူးကျော်မြေနေရာမဟုတ်ဘဲ ဆရာတော်ဦးကဝိဓဇ၏ ဦးလေးတော်စပ်သူက စာချုပ်စာတမ်းနှင့်ဝယ်ယူပြီးလှူဒါန်းထားခြင်းဖြစ်ကြောင်း မိန့်ကြားသည်။

"ရပ်ကျေးသံဃနာယကအဖွဲ့က ထုတ်တဲ့စာမှာ ဘုန်းကြီးတို့နေရာကို ကျူးကျော်လို့ စွပ်စွဲထားတာလည်းတွေ့၇ပါတယ်။ အမှန်က ဒီမြေကကျူးကျော်မဟုတ်ပါဘူး။ ပရိယတ္တိစာသင်ကြားပို့ချချင်တယ်။ သာသနာပြုလုပ်ငန်းလုပ်ချင်တယ်ဆိုလို့ဘုန်းကြီးရဲ့ ဦးလေးကဝယ်ပြီး လှူဒါန်းထားတာပါ။ စာရွက်စာတမ်းတွေလည်း ရှိပါတယ်"ဟု ဆရာတော်က မိန့်ကြားသည်။

ယခုကဲ့သို့တောရကျောင်းကို ရ ရက်အတွင်းဖယ်ရှားခိုင်းသည့်ကိစ္စနှင့်ပတ်သက်၍ ဂွမြို့နယ်၊ရပ်ကျေးသံဃနာယကဥက္ကဋ္ဌဆရာတော် ဦးပညာဒီပကို နိရဥ္စရာက ဆက်သွယ်ခဲ့သော်လည်းဖုန်းလက်ခံဖြေကြားခဲ့ခြင်းမရှိပေ။

ရခိုင်ဒေသတွင်သာသနာပြုလုပ်ငန်းများဆောင်ရွက်ရန် မှော်ဘီမြို့ မဟာဝိဟာရသံဃနာယက ဥက္ကဋ္ဌဆရာတော်ကြီးက စေလွှတ်ခဲ့သည့်အတွက်ရောက်ရှိလာခြင်းဖြစ်ပြီး မဟာဝိဟာရတော၇ကျောင်းကို တည်ထောင်ခဲ့၇ခြင်းဖြစ်ကြောင်း ဦးကဝိဓဇကဆက်လက်မိန့်ကြားသည်။

ယင်းတော၇ကျောင်းတွင် အသက်ငယ်ရွယ်သံဃာတော်များအပါဝင်ဖိုးသူတော်ငယ်များ အပါး ၈၀ ကျော်ခန့်ကဝိနည်းတော်များနှင့်အညီကျင့်ကြံနေထိုင်ပြီး ပရိယတ္တိစာပေများကို လေ့လာဆည်းပူးနေကြသည်ဟုဆိုသည်။

အဆိုပါသံဃာတော်များသည် ဝါတွင်းကာလကလွဲလျှင် သစ်ပင်အောက်တွင်သာ သီတင်းသုံးခြင်း၊ သင်္ကန်.အဖြစ် ပိတ်စဖြူများကိုသစ်ခေါက်ဆေးဆိုးကာ ကိုယ်တိုင်ခြုပ်၍ဝတ်ရုံခြင်း၊နေ့ဘက်တွင် ပရိယတ္တိစာပေများကို ပို့ချသင်ကြားခြင်း၊ ညဘက်တွင်တရားကျင့်ကြံ အားထုတ်ခြင်း၊ဆွမ်းကိုတစ်နပ်သာဘုန်းပေးခြင်း၊ ဆွမ်းခံရန်တောရကျောင်းမှ အနည်းဆုံး ရ မိုင်ခန့်ရှိသည့် ကျေးရွာများသို့ ခြေလျင်ကြွရောက်ခြင်းများကိုကျင့်သုံးနေထိုင်ကြသည်ဟု ဆိုသည်။

ယင်းသို့အသက်ရွယ်နုငယ်သော်လည်း  ခက်ခဲပင်ပန်းမှုများကိုသည်းညည်းခံကာ ဝိနည်းနှင့်အညီ ကျင့်ကြံအားထုတ်နေသည့် သံဃာတော်များကို ကြည်ညို၍ရပ်နီးရပ်ဝေးမှလာရောက်ဖူးမြော်မှုများလည်း အဆက်မပြတ်ရှိနေကြောင်းသိ၇သည်။ (NN-23)