မုန်တိုင်းဒဏ်ခံခဲ့ရသောရခိုင်ပြည်အရေးနှင့်ပတ်သက်ပြီး တအာင်းနှင့်ကိုးကန့်တပ်ဖွဲ့တို့ ကြေညာချက်ထုတ်
“မုန်တိုင်းဒဏ်ကြောင့် အသက်ဆုံးရှုံးသွားခဲ့၇သော ပြည်သူလူထုအတွက်အထူးဝမ်းနည်းမိကြောင်း ဖော်ပြ”
၂၀၂၃ ခုနှစ်မေလ (၁၄) ရက်နေ့က ရခိုင်ပြည်ကိုဖြတ်ကျော်တိုက်ခတ်ခဲ့သော မိုချာဆိုင်ကလုန်း မုန်တိုင်းကြောင့် ရခိုင်ပြည်သူများထိခိုက်ပျက်စီးဆုံးရှုံးမှုများနှင့်ပတ်သက်ပြီး မြောက်ပိုင်းညီနောင်သုံးဖွဲ့မှ PSLF/TNLA တအာင်းတပ်မတော်နှင့် MNTJP/MNDAAကိုးကန့်တပ်မတော်တို့မှ ယနေ့ ကြေညာချက် တစ်စောင် ထုတ်ပြန်သည်။
၎င်းထုတ်ပြန်ချက်အထဲတွင် ရက္ခိုင်ကမ်းရိုးတန်းကိုဗဟိုပြု၍ စစ်တွေမြို့အနီးမှဝင်ရောက်ကာ ရက္ခိုင်ပြည်တစ်ခုလုံးကို ဖြတ်ကျော်တိုက်ခတ်သွားသော Cyclone Mocha မုန်တိုင်းကြောင့် ရက္ခိုင်ပြည်အတွင်း ပျက်စီးဆုံးရှုံးမှုများ ကြီးမားခဲ့သည်ဟု ကြားသိရသည့်အတွက် ရက္ခိုင်ပြည်မှ မိဘပြည်သူများအပေါ် မိမိတို့ PSLF/TNLA တအာင်းတပ်မတော်နှင့် MNTJP/MNDAAကိုးကန့်တပ်မတော်တို့မှ အထူးစိတ်မကောင်းဖြစ်၇ပါကြောင်း ဦးစွာဖော်ပြသည်။
ထိုမုန်တိုင်းဒဏ်ကြောင့် အသက်ဆုံးရှုံးသွားခဲ့၇သော ပြည်သူလူထုအတွက်လည်း အထူးဝမ်းနည်းမိပါကြောင်း၊ Cyclone Mocha မုန်တိုင်းပြင်းထန်စွာတိုက်ခတ်ခြင်းကြောင့် လူနေအိမ် အဆောက်အအုံများ၊ ဘာသာရေးအဆောက်အအုံများ၊ စာသင်ကျောင်း၊ လမ်းပန်းဆက်သွယ်ရေး၊ ကျွဲနွားတိရစ္ဆာန်များ၊ဆန်စပါးနှင့် စားသောက်ကုန်များအများအပြားပျက်စီးဆုံးရှုံးသွားခဲ့ရကြောင်း ကြားသိ၇ပါကြောင်း၊ မုန်တိုင်းဒဏ်သင့်ရက္ခိုင်ပြည်သူလူထုများ ပိုမိုဆိုးရွားသည့်အခြေအနေ မရောက်စေရန်အတွက်အရေးပေါ်အကူအညီများ လိုအပ်နေမည်ဖြစ်ပါကြောင်း၊ ထိုမုန်တိုင်းဒဏ်သင့်ရက္ခိုင်ပြည်သူများအတွက် လိုအပ်သည့်အရေးပေါ်အကူအညီနှင့်ဘ၀ပြန်လည် ထူထောင်ရေးအတွက် အကူအညီများကို ဝိုင်းဝန်းကူညီဆောင်ရွက်ပေးကြပါရန်ကမ္ဘာ့နိုင်ငံကြီးများ၊ အိမ်နီးချင်းနိုင်ငံများ၊ နိုင်ငံတကာအဖွဲ့အစည်းများအား ရက္ခိုင်ပြည်မှ မိဘပြည်သူများကိုယ်စား အထူးမေတ္တာ ရပ်ခံတောင်းဆိုလိုက်ပါကြောင်း ဖော်ပြထားသည်။
တအာင်းတပ်မတော်နှင့်ကိုးကန့်တပ်မတော်တို့သည် မိမိတို့၏ မဟာမိတ်ဖြစ်သည့် ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော် (ULA/AA) နှင့် အတူယှဉ်တွဲရပ်တည်ပြီး ရက္ခိုင်ပြည်သူများအပေါ် ကျရောက်ခဲ့သည့်သဘာ၀ဘေးဒဏ်ကို စုပေါင်းကျော်လွှားနိုင်ရန်စွမ်းနိုင်သည့်ဖက်မှ အကောင်းဆုံးကူညီ ကြိုးပမ်းဆောင်ရွက်သွားမည်ဖြစ်ပါသည်။
Cyclone Mocha မုန်တိုင်းအလွန်သဘာ၀ဘေးဒဏ်သင့် ရက္ခိုင်ပြည်မှမိဘပြည်သူများအတွက်အရေးပေါ်အကူအညီများနှင့် ပြန်လည်ထူထောင်ရေးလုပ်ငန်းများကိုစနစ်တကျစီမံခန့်ခွဲ အကောင်အထည် ဖော်ရန်အတွက်ရက္ခိုင်ပြည်မှ မိဘပြည်သူများ၊အရပ်ဘက်အဖွဲ့အစည်းများ၊ ပရဟိတအသင်းများကိုဦးစီးပြီးရက္ခိုင်အမျိုးသားအဖွဲ့ချုပ်/ရက္ခိုင့်တပ်တော် (ULA/AA) မှအကောင်းဆုံးဆောင်ရွက်နိုင်လိမ့်မည်ဟု မိမိတို့ သွေးစည်းညီအစ်ကိုမဟာမိတ်အဖွဲ့တို့မှ အလေးအနက် ယုံကြည်ကြောင်း ထုတ်ပြန်လိုက်ပါသည်ဟု ပါရှိသည်။
မြောက်ပိုင်းညီနောင်သုံးဖွဲ့တွင် တအာင်းပလောင်အဖွဲ့(TNLA)၊ ၇က္ခိုင့်တပ်တော်(AA)နှင့် ကိုးကန့်အဖွဲ့ဟု လူသိများသည့် မြန်မာအမျိုးသားဒီမိုကရက်တစ် မဟာမိတ်တပ်မတော် (MNDAA)အဖွဲ့ တို့ ပါဝင်သည်။
လှူရန်