မိုခါမုန်တိုင်းတိုက်ပြီး ၁၀ ရက်အကြာ စစ်တွေလမ်းအချို့ လျှပ်စစ်မီး ၃ နာရီခန့်ပြန်ရ

မိုခါမုန်တိုင်းတိုက်ပြီး ၁၀ ရက်ခန့် မှောင်မိုက်နေခဲ့သော စစ်တွေမြို့ လမ်းအချို့ ယမန်နေ့ ညက လျှပ်စစ်မီး ၃ နာရီခန့် ပြန်လည် ရရှိခဲ့သည်ဟု သတင်းရရှိသည်။

သို့သော်အဆိုပါ လျှပ်စစ်မီးကို  ဒီဇယ်မီးစက်ကြီးဖြင့်  ပြန်ပေးခြင်းဖြစ်ပြီး အချိန်အားဖြင့် ညနေ ၇ နာရီ ၁၀ နာရီအထိ ရရှိခြင်းဖြစ်သည်ဟု သိရသည်

ယမန်နေ့က လျှပ်စစ်မီးရရှိခဲ့သည့် လမ်းများမှာ မေယုလမ်း၊ လမ်းမကြီးတစ်လျှောက် ဘီလူးမတံတားအထိဟု သိရသည်။

မြို့သူမြို့သားများ ဆက်သွယ်ရေးအဆင်ပြေစေရန်ဟုဆိုကာ လမ်းမီးများပေးထားစဥ် ဖုန်းနှင့် လျှပ်စစ်မီးသီးများ အခမဲ့သွင်း၍ရသည့်နေရာ ၅ ခုကိုလည်း ပြည်နယ်လျှပ်စစ်ရုံးက စီမံပေးထားသည်ကို တွေ့ရသည်။

ယင်းနေရာများမှာ မင်းဂံကားဂိတ်ဝင်းအနီး၊ စစ်တွေမီးစက်ကြီးရှေ့၊ ရခိုင်ပြည်နယ်အစိုးရဖွဲ့ ရုံးရှေ့၊ ယဥ်ကျေးမှုပြတိုက်အနီးနှင့် ဘီလူးမတံတားအနီးတို့ဖြစ်သည်ဟု သိရသည်။

အမျိုးသားလျှပ်စစ်ဓာတ်အားလိုင်းမှ ဖြန့်ဖြူးနေသောလျှပ်စစ်မီးမှာ မုန်တိုင်းအတွင်း ဓာတ်မီးတိုင်များ ပြိုလဲပျက်စီးသွားခဲ့သဖြင့်  ပြန်လည် ပြုပြင်နေသော်လည်း ယနေ့အချိန်ထိ ပြီးစီးမှု မရှိသေးသဖြင့် ရခိုင်ပြည်နယ်မှ စစ်တွေအပါအဝင် မြို့နယ်အများအပြားတွင် လျှပ်စစ်မီးပြတ်တောက်နေဆဲ ဖြစ်ကြောင်း သိရသည်။