မုန်တိုင်းသင့်ဒေသများသို့ စစ်ကောင်စီ၏ ကယ်ဆယ်ရေးအကူအညီများဖြန့်ဝေမှု နှေးကွေးနေသည့်အပေါ် ဝေဖန်မှုများရှိလာ

Preview

မုန်တိုင်းသင့်ဒေသများသို့ စစ်ကောင်စီ၏ ကယ်ဆယ်ရေးအကူအညီများဖြန့်ဝေမှု နှေးကွေးနေသည့်အပေါ် ဝေဖန်မှုများရှိလာ

မေ ၂၆/ ၂၀၂၃ | ကြည့်ရှုသူ :680

မိုခါဆိုင်ကလုန်းမုန်တိုင်း တိုက်ခတ်ခဲ့ပြီ (၁၂) ရက်ခန့်ကြာလာသည်အထိ စစ်ကောင်စီနှင့် နိုင်ငံတကာ လေဘေးကယ်ဆယ်ရေး အကူအညီများ ရခိုင်ပြည်သူများလက်ထဲသို့ရောက်ရှိလာခြင်းမရှိဘဲ နှောင့်နှေးကြန့်ကြာမှုဖြစ်နေသည့်အပေါ် ရခိုင်နိုင်ငံရေး သမားများက ဝေဖန်ပြောဆိုလိုက်သည်။

ဘူးသီးတောင်မြို့နယ်ပြည့်သူလွှတ်တော် ကိုယ်စားလှယ်ဟောင်း ဦးအောင်သောင်းရွှေက “ အခုလိုမျိုးလူသားထုအပေါ် ကပ်ဘေးဆိုက်ရောက်လာရင်လူမျိုး၊ ဘာသာမခွဲခြားဘဲ အဆောတလျင် ထောက်ပံ့ ပေး၇မှာက အစိုး၇နဲ့ နိုင်ငံတကာ အဖွဲ့အစည်းတွေမှာတာဝန်ရှိတယ်။ ဒီလို ကိစ္စမျိုးချက်ချင်း ဆောင်ရွက်၇မယ့် ကိစ္စဖြစ်တယ်။အခုက မုန်တိုင်းတိုက်ပြီး ၁၀ရက် ကျော် ကြာလာတဲ့ အထိ ကယ်ဆယ်ရေး အကူအညီတွေ မုန်တိုင်းသင့် လူထုတွေဆီမရောက်သေးဘူး။ သူတို့အချိန်မီလုပ်လို့ ရနိုင်ရဲ့သားနဲ့မလုပ်နိုင်တာဟာသူတို့တာဝန်တွေကို ပျက်ကွက်နေတယ်လို့မြင်တယ်။ နောက်ကွယ်က ဘယ်လိုအကြောင်းအရာတွေ ရှိနေသလဲ။ လူထုကို သိအောင်ချပြသင့်တယ်” ဟုပြောဆိုသည်။

၇ခိုင်ပြည်နယ်တွင် မေလ ၁၄ ရက်နေ့က တိုက်ခတ်သွားသည့် ဆိုင်ကလုန်းမုန်တိုင်းကြောင့် လူပေါင်း ၁၁၅၆၇၉၆ဦး ထိခိုက်ခဲ့ပြီး ၁၅၀ နီးပါးခန့် သေဆုံးကာ ၆၂ ဦး ဒဏ်ရာရရှိခဲ့သည်။ ၎င်းအပြင် အဆောက်အဦပေါင်း၂၄၁၀၇၁ ဦးနှင့် (ရေယာဉ်+ကား) ၇၁၆ အထိ ပျက်စီးခဲ့သည်။ အိမ်မွေး တိရစ္ဆာန်ပေါင်း ၂၇၆၁၇ သေဆုံးခဲ့သည်။ စုစုပေါင်း ပျက်စီး ဆုံးရှုံးမှုတန်ဖိုး၄၈၉၈၆ သိန်းဖိုးရှိသည်ဟု ၇ခိုင်ပြည်နယ်ကောင်စီက ထုတ်ပြန်ထားသည်။

“ ပျက်စီးဆုံးရှုံးမှုက အရမ်းကြီးမားပါတယ်။ ခေတ်သစ်ရခိုင်သမိုင်းမှာအဆိုးရွားဆုံး မုန်တိုင်းတိုက်ခတ်မှုပါပဲ။ အိမ်တွေပြိုတယ်။ ရွာတိုင်းမှာ နေစရာလည်း မရှိကြဘူး။ အမိုးအကာတွေကလည်း ဓနိတွေ၊ သွပ်ပြားတွေအကုန်ပျက်စီးသွားတယ်။ တာပေါ်လင်တွေလည်း ရှာမ၇ဘူး။ ဆန်စပါးတွေ အကုန်လုံးပျက်စီးသွားတယ်။ ဒီလို အခြေအနေမျိုးမှာ ဒီလို ကယ်ဆယ်ရေး လုပ်ငန်းတွေ နှောင့်နှေးမှုမျိုးကတော့လုံး၀ မဖြစ်သင့်ဘူး” ဟု ၎င်းက ဆက်ပြောသည်။

ရခိုင်နိုင်ငံရေးလေ့လာသုံးသပ်သူ မြေပုံမြို့နယ် ပြည်သူ့ လွှတ်တော်ကိုယ်စားလှယ်ဟောင်း ဦးဖေသန်းကလည်းနိုင်ငံတကာအကူအညီများကို စစ်ကောင်စီက ပိတ်ပင်တားဆီးမှုများရှိနေသည့် အပေါ် ယခုလို ဝေဖန်ပြောကြားသည်။

“ တချို့ထောက်ပံ့ဖို့လာတာတွေလမ်းတစ်ဝက်ကလှည့်ပြန်သွား၇တာတွေ၊ တချို့နိုင်ငံ တကာအဖွဲ့အစည်းတွေက ကူညီဖို့လာတာတွေလာခွင့် မပေးတာတွေ ကြားနေရပါတယ်။ အမှန်တကယ်အဲဒီလိုမှန်ခဲ့တယ်ဆိုရင်တော့ဒီလိုအချိန်အခါမျိုးမှာ မလုပ်သင့်တဲ့လုပ်ရပ်ပါပဲ။ ပြည်သူတွေက ကိုယ့်အချင်းချင်းဒုက္ခရောက်နေသူတွေဆီ ကူညီဖို့ လာတာကို နိုင်ငံမှာ တကယ်တမ်းတာဝန်ရှိတဲ့ အစိုးရက ဒီလိုပိတ်ပင်တာကဆင်ခြင်တုံတရား အားနည်းရာ ကျပါတယ်။သူတို့အစိုး၇ကလည်းလုံလုံလောက်လောက် ပြည်သူတွေကို ထောက်ပံ့ ပေးနိုင်တာမဟုတ်ဘူး။သူများရဲ့စေတနာတွေကိုလည်း ပိတ်ပင်ရာကျတယ်။ ဒီကာလမှာ အထောက်ပံ့အကူညီတွေ ပြည်သူတွေလက်ထဲရောက်အောင်သူတို့ကိုယ်တိုင် ကူညီရမယ့် တာဝန်ရှိတယ်။အဲဒါကြောင့် ဒီလုပ်ရပ်တွေကိုဘယ်လိုရည်ရွယ်ချက်နဲ့ပဲလုပ်လုပ် မဖြစ်သင့်တဲ့ကိစ္စလို့ပဲ မှတ်ချက်ပြုချင်တယ်”ဟု ပြောဆိုသည်။

လက်ရှိ မုန်တိုင်းဒဏ်ကိုကြုံတွေ့ခဲ့၇သည့် ၇ခိုင်ပြည်သူများမှာ အစားအစာ၊ သောက်ရေသန့်နှင့် အမိုးအကာများ အမြန်လိုအပ်နေသော်လည်း မုန်တိုင်းတိုက်ခတ်ပြီး ၁၂ ရက်ကြာလာသည့်တိုင် ယနေ့အချိန်ထိလေဘေး အကူအညီများ မရောက်ရှိသေးဟု နိရဉ္စရာသတင်းဌာနကို ဆက်သွယ်ပြောကြားသည်။

မိုခါကြောင့် ရခိုင်ပြည်နယ်အတွင်းစစ်တွေ၊ ၇သေ့တောင်၊ ပုဏ္ဏားကျွန်း၊ ကျောက်တော်၊ မြောက်ဦး၊ မောင်တော၊ဘူးသီးတောင်၊ မင်းပြားနှင့် ပေါက်တောမြို့နယ်တို့တွင် ထိခိုက်ပျက်စီးမှု ၉၀ရာနှုန်းအထိ ရှိခဲ့သည်ဟုလည်းစစ်ကောင်စီကပြောဆိုထားသည်။(NN-13)

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဆက်စပ် အကြောင်းအရာများ

နောက်ဆုံးရသတင်းများ