မုန်တိုင်းအလွန် ရေခဲရှားပါးမှုနှင့်ဈေးကြီးမြင့်မှုတို့ကြောင့် ရခိုင်ရေလုပ်ငန်း အခက်အခဲထပ်ကြုံနေရ

Preview

မုန်တိုင်းအလွန် ရေခဲရှားပါးမှုနှင့်ဈေးကြီးမြင့်မှုတို့ကြောင့် ရခိုင်ရေလုပ်ငန်း အခက်အခဲထပ်ကြုံနေရ

ဇွန် ၂၁/ ၂၀၂၃ | ကြည့်ရှုသူ :2715

မိုခါမုန်တိုင်းအတွင်း ၇ခိုင်တွင် ရေခဲစက်ရုံများလဲပြိုမှု၊လျှပ်စစ်မီးများပြတ်တောက်သွား၍ ရေခဲကုန်ထုတ်လုပ်သည့် ပမာဏလျော့ကျသွားမှုတို့နှင့်အတူ တစ်ဖက်တွင်လည်းရေခဲဈေးမြင့်တက်သွားရာမှ ရခိုင်ရေလုပ်ငန်းကို ထိခိုက်မှုရှိနေကြောင်း သတင်းရရှိသည်။

စစ်တွေတွင်မုန်တိုင်းကြောင့် ပျက်စီးသွားသည့် ရေခဲစက်ရုံများပုံမှန်မလည်ပတ်နိုင်သေးသည့်အတွက်ပင်လယ်သို့ငါးဖမ်းထွက်ရန် လုံလောက်သည့်ရေခဲတုံးများဝယ်မ၇ဖြစ်နေပြီး ဈေးလည်း သုံးဆခန့် မြင့်တက်သွားသည်ဟု ဆိုသည်။

“ စစ်တွေမှာ မုန်တိုင်းကြောင့် ရေခဲစက်ရုံတွေ ပျက်သွားတယ်။ကျန်နေခဲ့တဲ့ စက်ရုံတချို့လည်း လျှပ်စစ်မီးလည်း ပုံမှန်မ၇ဆိုတော့ မထုတ်လုပ်နိုင်ဘူး။ ဒါကြောင့်ရေခဲကရှားသွားတယ်။ ရေခဲ ပေါင် ၃၀၀တစ်တုံးကို အရင်က ကျပ် ၇၀၀၀ ရှိရာကနေ အခု ကျပ် ၂၀,၀၀၀အထိ ၃ ဆနီးပါး ဈေးးမြင့်တက်သွားပါတယ်” ဟု ငါးဖမ်းဘုတ်လုပ်ငန်းရှင် တစ်ဦးက ပြောသည်။

ရေခဲရှားပါးသည့်ပြဿနာကြောင့် ဖမ်းမိသည့် ငါးများကို ပြည်မ နှင့် နိုင်ငံခြားသို့ မတင်ပို့နိုင်တော့သဖြင့် အနီးအနားဒေသများတွင်ရသည့်ဈေးနှင့် ရောင်းချနေ၇၍ အဆင်မပြေ ဖြစ်နေ၇သည်ဟု ဧရာ၀တီတိုင်းမှ ၇ခိုင်ပင်လယ်ပြင်သို့ လာရောက် ငါးဖမ်းနေသည့် ဦးစိုးမင်းသူကပြောသည်။

"ကျနော်တို့ အဖွဲ့မှာ ငါးဖမ်းသင်္ဘောက ၁၅ စီးလောက်ရှိတာမှာ ၅ စီးလောက်ပဲ ထွက်နိုင်တယ်။ ၃ ပုံ ၁ ပုံလောက်ပဲ ထွက်နိုင်တယ်။ တစ်ခေါက်လောက်ထွက်ကြည့်တယ်။ရှုံးတယ်။ နောက်တစ်ခေါက် ထွက်ကြည့်တယ်။ရှုံးတယ်ဆိုတဲ့အခါကျတော့ ၃ ခေါက်ရှုံးဖို့အတွက်ကျတော့အဆင်မပြေတော့ဘူး။ အဲ့ဒါနဲ့ပဲ ရပ်ထား၇တယ်" ဟု ပြောသည်။

ယင်းအပြင်မုန်တိုင်းတိုက်ပြီးနောက် ငါး၊ ပုစွန်လည်း ရှားပါးသွားပြီး ရရှိလာသည့် ငါး ပုဇွန်များမှာလည်း ဈေးကောင်းမရသည့်အတွက်အရှုံးမပေါ်အောင် မနည်းကြိုးစားနေ၇သည်ဟု ဦးစိုးမင်းသူကဆက်ပြောသည်။

"မုန်တိုင်းတိုက်ပြီးနောက်သား၊ ငါး၊ ပုစွန်တွေက ဘယ်လိုဖြစ်သွားလဲ မသိဘူး။ အရင်ကဆိုတစ်ခေါက်ဆင်းရင် ကိုယ့်အတွက် ဆယ်သိန်းဆိုလည်း ကျန်တယ်။ ဆယ့်ငါးသိန်းဆိုလည်းကျန်တယ်။အခု မုန်တိုင်းတိုက်ပြီးတော့ ကိုယ့်အတွက် ငါးသိန်းကျန်ဖို့ဆိုတာမလွယ်တော့ဘူး။၇ဖို့ထက် လူတွေကမရှုံးအောင်ကြိုးစားနေကြ၇တယ်"ဟုဆိုသည်။

တချို့မှာကျောက်ဖြူမှ ရေခဲသွားဝယ်မှုများရှိသော်လည်း အကုန်အကျများပြီးအရှုံးပေါ်သည့်အတွက်အများစုမှာ ငါးဖမ်းလုပ်ငန်းကို ရပ်နားထားသည်ဟု ငါးဖမ်းသမားများကပြောသည်။

၎င်းပြင် ငါးဖမ်းလုပ်ငန်းကိုအများစုလုပ်ကိုင်သည့် စစ်တွေ၊ ကျောက်ဖြူ၊ သံတွဲ၊ မင်းပြား၊မြေပုံ၊ ပေါက်တော၊ မာန်အောင်စသည့်မြို့နယ်များတွင် ငါးဖမ်းစက်လှေများပျက်စီးမှုများပြားခဲ့ပြီး ငါးဖမ်းလုပ်ငန်းပုံမှန်လည်ပတ်နိုင်မှု မရှိသေးကြောင်း ငါးဖမ်းလုပ်ငန်းလုပ်ကိုင်သူများက ပြောသည်။

ယင်းကြောင့်ငါးဖမ်းစက်လှေအများစုရပ်နားထားရသည့်အတွက် ရေလုပ်သားများမှာလည်း စားဝတ်နေရေးအခက်အခဲ ကြုံနေကြရသည်ဟု စစ်တွေမြို့၊ ကျေးတောရွာမှ ငါးဖမ်းစက်လှေ ပိုင်ရှင်တစ်ဦးကပြောသည်။

"ရေလုပ်သားတွေက ရေလုပ်ငန်းတစ်ခုပဲ ကျွမ်းကျင်တာရှိတော့ကုန်းထက်မှာလည်း သူတို့က အဆင် မပြေနိုင်တော့ဘူး။ဒါကြောင့်တခြားအလုပ်ကြမ်းလုပ်ဖို့ကလည်း ကျွမ်းကျင်မှုမရှိတော့မလုပ်ချင်ကြဘူး။ ရေလုပ်ငန်းတစ်ခုပဲ အားထားပြီးလုပ်နေကြတော့ငါးဖမ်းလှေတွေ ပျက်စီးသွားတော့ အခက်အခဲကအများကြီးကြုံကြ၇ပါတယ် " ဟု ဆိုသည်။

ရခိုင်ပြည်နယ်သည်ရေလုပ်ငန်း နှင့် စိုက်ပျိုးရေးကို အဓိက လုပ်ကိုင်သည့် ဒေသဖြစ်၍ငါးလုပ်ငန်းအဆင်မပြေမှုမှာ ၇ခိုင်ပြည်၏ လူမှုစီးပွါးဘ၀များကိုလည်း သက်ရောက်မှု များစွာရှိနိုင်သည့် အတွက်ငါးလုပ်ငန်းဦးစီးဌာနအနေနှင့် ကူညီဖြေရှင်းပေးစေလိုကြောင်း ငါးဖမ်းလုပ်ငန်းလုပ်ကိုင်သူများက ပြောသည်။

ယခုကိစ္စနှင့်ပတ်သက်၍ ရခိုင်ပြည်နယ်ငါးလုပ်ငန်းဦးစီးဌာနကို နိရဥ္စရာက ဆက်သွယ်ခဲ့သော်လည်း ဆက်သွယ်၍မရရှိခဲ့ပါ။ (NN-7)

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

မုန်တိုင်းအလွန် ရေခဲရှားပါးမှုနှင့်ဈေးကြီးမြင့်မှုတို့ကြောင့် ရခိုင်ရေလုပ်ငန်း အခက်အခဲထပ်ကြုံနေရ

ဆက်စပ် အကြောင်းအရာများ

နောက်ဆုံးရသတင်းများ