မုန်တိုင်းသင့်၇ခိုင်ဒေသအတွက်ကိုရီးယားနိုင်ငံကဆန်တန်ချိန် ၅၀၀ ကျော်နှင့် ဂျပန်နိုင်ငံကအသင့်စားဆန်ထုပ် ၂ သောင်း လှူဒါန်းလိုက်ကြောင်း သိ၇သည်။

ASEAN+3 အရေးပေါ်ဆန်ရိက္ခာAPTEER Tier Programme 3 အစီအစဉ်အရကိုရီးယားနိုင်ငံက ဆန် ၅၅၄ တန်နှင့် ဂျပန်နိုင်ငံက အသင့်စားဆန်ထုပ် ၂ သောင်းကိုယမန်နေ့ ဇွန်လ ၂၈ ရက်တွင် ရခိုင်ပြည်နယ် စိုက်ပျိုးရေးဦးစီးဌာနမှတဆင့် ပြည်နယ်စစ်ကောင်စီသို့လွှဲပြောင်းလှူဒါန်းခဲ့ခြင်း ဖြစ်သည်။

ASEAN+3 အရေးပေါ်ဆန်ရိက္ခာAPTEER Tier Programme 3 သည်အာဆီယံ (၁၀)နိုင်ငံနှင် အပေါင်း (၃)နိုင်ငံများအတွင်းသဘာ၀ဘေးအန္တရာယ်တစ်ခုခုကျရောက်၍ အရေးပေါ်အခြေအနေတွင် လိုအပ်သောဒေသများသို့ အရန်ဆန်များထောက်ပံ့ဖြန့်ဖြူးနိုင်ရေးဆောင်ရွက်လျက်ရှိသော အစီအစဉ်ဖြစ်ကြောင်း သိ၇သည်။

ရခိုင်ဒေသရှိ မုန်တိုင်းသင့်ပြည်သူများအတွက်နိုင်ငံတကာက ယခုကဲ့သို့ စားနပ်ရိက္ခာနှင့် အိမ်အသုံးအဆောင်ပစ္စည်းများကိုတောက်လျှောက်လှူဒါန်းလျက်ရှိသော်လည်း ယင်းထောက်ပံ့ပစ္စည်း များကို ယခုထက်တိုင်မရရှိသေးသည့် မုန်တိုင်းသင့်ပြည်သူ အများအပြားကျန်ရှိနေသေးသည်ဟုကူညီဆောင်ရွက်ပေးနေသည့် အရပ်ဘက်အဖွဲ့အစည်းများနှင့်ကာယကံရှင်မုန်တိုင်းသင့်ပြည်သူများက ပြောသည်။

မြောက်ဦးမြို့နယ်၊သာယာကုန်းကျေးရွာတွင်ဆိုလျှင် နေအိမ် ၈၀ ခန့်ရှိသည့်အနက် ၇၅ ဆောင်ခန့် ပျက်စီးသွားခဲ့သည်ဟုရွာသားများက ပြောသည်။

မုန်တိုင်းတိုက်သွားသည်မှာ ၂လခန့်ရှိလာပြီဖြစ်သော်လည်း စစ်ကောင်စီဘက်က လူတစ်ဦးလျှင် ဆန်နို့ဆီဗူး ၁ လုံး၊၆ ပေပတ်လည် တာပေါ်စ တစ်ချပ်နှင့် ကလေးများအတွက် အဝတ်အထည် အချို့တို့ကိုသာတစ်ကြိမ် လာရောက်ထောက်ပံ့ပေးဖူးသည်ဟု နိရဥ္စရာကို ပြောသည်။

ရွာသားတစ်ဦးက“ဒါတောင် အိမ်ခြေ ၄၀လောက်အတွက်ပဲ ပေးခဲ့တာ။ ကျန်တဲ့အိမ်တွေ ဘာမှ မ၇သေးဘူး”ဟု ပြောသည်။

စစ်ကောင်စီဘက်ကမုန်တိုင်းသင့်ဒေသများသို့ ကူညီထောက်ပံ့မှုများ လွှမ်းခြုံမှုမရှိဖြစ်နေသည့်အပြင်မုန်တိုင်းသင့်ဒေသများအတွက် အရေးပေါ်ကူညီထောက်ပံ့နေကြသည့် ကုလမသဂ္ဂအပါအဝင်နိုင်ငံတကာအဖွဲ့အစည်းများ၏သွားလာထောက်ပံ့ခွင့်ကိုလည်း ဇွန်လ ရ ရက်မှစတင်ကာတားမြစ်ပိတ်ပင်ထားခဲ့သေးသည်။

ယင်းသို့တားမြစ်ထားသည့်အတွက် မုန်တိုင်းသင့်ပြည်သူများတွင် များစွာအကျပ်အတည်း ဖြစ်ပေါ်လျက်ရှိသည်ဟုလည်းကုလသမဂ္ဂလူသားချင်းစာနာမှုဆိုင်ရာပေါင်းစပ်ညှိနှိုင်းရေးရုံး (UNOCHA)က ဇွန်လ ၂၂ ရက်တွင်ထုတ်ပြန်ထားသည်။ (NN-16)