ရခိုင်ပြည်နယ်ရှိယခုနှစ်တက္ကသိုလ်ဝင်တန်းစာမေးပွဲတွင် ထူးချွန်စွာအောင်မြင်ခဲ့ကြသည့်ကျောင်းသူ၊ကျောင်းသား ၃၀၀ ကျော်အား ပြည်နယ်စစ်ကောင်စီက  ဇူလိုင် ၂ ရက်နေ့တွင် ဆုချီးမြှင့် ပေးအပ်ခဲ့သည်။

ဆုပေးပွဲ အခမ်းအနားအားဇူလိုင်လ ၂ ရက်၊နံနက် ၉ နာရီတွင် စစ်တွေမြို့ရှိ စစ်တွေဟိုတယ်၌ ပြုလုပ်ပြီး ကျောင်းသား ကျောင်းသူများအား ချီးမြှင့်ပေးခဲ့ခြင်းဖြစ်သည်။

ယင်းသို့ ချီးမြှင့်ရာတွင်သိပ္ပံတွဲ၊ ဝိဇ္ဇာတွဲနှင့် ဝိပ္ပံတွဲတို့၌ One to Ten ရရှိခဲ့သည့်ကျောင်းသူ၊ ကျောင်းသား ၃၃ဦး၊ ၄ ဘာသာဂုဏ်ထူးရှင် ၂ ဦးနှင့် ၃ ဘာသာဂုဏ်ထူးရှင် ၂၇၂ ဦး၊ စုစုပေါင်း ၃၀၇ဦးအား ချီးမြှင့်ပေးခဲ့ခြင်းဖြစ်သည်ဟုပြည်နယ်ပညာရေးမှူး ဦးဘထွီးစိန်က နိရဥ္စရာကို ပြောသည်။

သိပ္ပံတွဲ၊ဝိဇ္ဇာတွဲနှင့် ဝိပ္ပံတွဲတို့မှ One to Ten ရရှိသူ ၃၃ ဦးအနက် ပထမဆုရရှိသူတစ်ဦးစီကို ကျပ်သိန်း၂၀၊ ဒုတိယဆုရရှိသူတစ်ဦးစီကို ကျပ် ၁၅ သိန်းနှင့် တတိယဆုရရှိသူတစ်ဦးစီကိုကျပ်သိန်း ၁၀ စီ ချီးမြှင့်ခဲ့သည်။

ယင်းအပြင်One to Ten ၃၃ဦးအနက် သိပ္ပံတွဲတွင် နှစ်သိမ့်ဆုရရှိသူတစ်ဦးစီကိုလည်း ကျပ် ၈ သိန်း၊ဝိဇ္ဇာတွဲနှင့် ဝိပ္ပံတွဲတို့တွင် နှစ်သိမ့်ဆုရရှိသူတစ်ဦးစီလျှင် ကျပ် ၇သိန်းနှုန်းဖြင့် အသီးသီး ချီးမြှင့်ပေးခဲ့သည်ဟုရခိုင်ပြည်နယ်ပညာရေးမှူး ဦးဘထွီးစိန်က ဆိုသည်။

အလားတူ၄ ဘာသာဂုဏ်ထူးရှင် ၂ ဦးကို တစ်ဦးလျှင် ကျပ် ၅ သိန်းနှင့် ၃ဘာသာဂုဏ်ထူးရှင် ၂၇၂ ဦးကို တစ်ဦးလျှင် ကျပ် ၂ သိန်းနှုန်းဖြင့်အသီးသီးချီးမြှင့်ပေးခဲ့သည်။

၂ဘာသာနှင့် ၁ ဘာသာဂုဏ်ထူးရှင်များကိုမူ ချီးမြှင့်ခဲ့ခြင်းမရှိသလိုယခုနှစ်တက္ကသိုလ်ဝင်တန်းစာမေးပွဲ၌ ၅ ဘာသာဂုဏ်ထူးရရှိခဲ့သူလည်းတစ်ဦးမျှ မရှိခဲ့ဟု သိ၇သည်။

ဆုပေးပွဲအခမ်းအနားတက်ရောက်ခဲ့သည့်ကိုယ်ပိုင်အထက်တန်းကျောင်းအုပ်တစ်ဦးက “အခုပေးတာက Top Ten အဆင့်ကိုပေးတာ။ Topစာရင်းဝင်။ ၃ဘာသာကိုတော့ ပေးတယ်။ သို့သော် ၃ ဘာသာကျောင်းသူ၊ ကျောင်းသားအားလုံးကိုတော့မခေါ်ခဲ့ဘူး။ ဟိုတယ်မှာမဆံ့လို့တဲ့။ အဲဒါကိုတော့ ၃ ဘာသာကျောင်းသူ၊ ကျောင်းသားတွေကိုယ်စားဆိုပြီးတော့ကိုယ်စားပြုကျောင်းသူတစ်ယောက်နဲ့ ကျောင်းသားတစ်ယောက်ကိုတက်ယူခိုင်းတယ်”ဟုပြောသည်။

နယ်ဝေးမှဆုတက်ရောက်ယူသည့် ထူးချွန်ကျောင်းသူ၊ ကျောင်းသားများကိုလည်း ခရီးစရိတ်များပါ စစ်ကောင်စီကထုတ်ပေးခဲ့သေးသည်ဟု ပြောသည်။

ယခုနှစ်တက္ကသိုလ်ဝင်တန်း စနစ်ဟောင်းစာမေးပွဲအောင်စာရင်းကို ဇွန်လ ၉ ရက်က ထုတ်ပြန် ကြေညာခဲ့ရာ ၇ခိုင်ပြည်နယ်မှ ကျောင်းသူ၊ကျောင်းသား စုစုပေါင်း(၁၆၉၂၈) ဦး ဖြေဆိုခဲ့သည့် အနက်(၉၉၆၄)ဦး အောင်မြင်ခဲ့သည်။

ထို့အပြင် ရခိုင်ပြည်နယ်၏ယခုနှစ် အောင်ချက်ရာခိုင်နှုန်းမှာလည်း ၅၈ ဒသမ ၈၆ ရာခိုင်နှုန်းအထိ ရှိခဲ့ပြီး ပြီးခဲ့သည့် ၂၀၂၂ ခုနှစ်က အောင်ချက်ရာခိုင်နှုန်းထက်၁၁ ဒသမ ၆၁ ရာခိုင်နှုန်းအထိ တိုးတက်ခဲ့သည်။

ပြီးခဲ့သည့်နှစ်က၇ခိုင်တွင် တက္ကသိုလ်ဝင်တန်းစာမေးပွဲကို ကျောင်းသား၊ ကျောင်းသူ (၄၁၇၅၅)ဦး ဝင်ရောက်ဖြေဆိုခဲ့ကြပြီး(၁၉၇၂၉)ဦးအောင်မြင်ကာ အောင်ချက်ရာခိုင်နှုန်းမှာ ၄၇ ဒသမ ၂၅ရာခိုင်းနှုန်းရှိခဲ့သည်ဟု ပြည်နယ်ပညာရေးမှူးရုံးစာရင်းများအရ သိ၇သည်။ (NN-16)