ရခိုင်မြို့နယ်တချို့တွင် ယခုနှစ်မိုးရာသီစပါးဈေးနှုန်းမှာယခင်နှစ်ကထက် ပိုကောင်းနေပြီး စပါးအများ သိုလှောင်ထားနိုင်သူလယ်သမားများနှင့်ကုန်သည်များမှာ အဆင်ပြေနေကြောင်း လယ်ယာလုပ်ငန်း လုပ်ကိုင်နေသူများကနိရဥ္စရာသို့ပြောသည်။

သံတွဲမြို့နယ်တွင် ယခင်နှစ်ကတစ်တင်းကို ၁၁၀၀၀ ကျပ်ခန့်ရှိသည့်ဆင်းသွယ်လတ်၊ မလိခနှင့် ရှမ်းမလေးစပါးများကို လက်ရှိတွင် ဆန်စက်လုပ်ငန်းရှင်များနှင့်စပါးကုန်သည်များက တစ်တင်းကို ၁၆၀၀၀ ကျပ်အထိဈေးနှုန်းမြင့်၍ ဝယ်ယူမှုများရှိနေကြောင်းဒေသခံလယ်သမားများကနိရဥ္စရာသို့ ပြောသည်။

သံတွဲမြို့နယ်၊ တောင်ညိုကျေးရွာမှ လယ်မြေ ၈ဧကခန့်ကိုထွန်ယက်လုပ်ကိုင်နေသည့် လယ်သမား
ဦးကျောက်ခဲက"အခုနှစ်စပါးဈေးကောင်းနေပါတယ်။ စပါးတစ်တင်းကိုအရင်နှစ်ကထက် တစ်ဆမကဈေးပိုရနေတယ်။ ဆန်စက်ပိုင်ရှင်တွေနဲ့ ကုန်သည်တွေဝယ်နေတဲ့ဈေးပေါ့လေ"ဟုနိရဥ္စရာသို့ပြောသည်။

ဂွမြို့နယ်တွင်လည်း လက်ရှိစပါးဈေးနှုန်းမှာ ယခင်နှစ်ကထက်ဈေးပိုကောင်းနေသည်ဟု လယ်လုပ်ငန်း လုပ်ကိုင်သူများက ပြောသည်။

ဂွမြို့နယ်တွင် အဓိကစိုက်ပျိုးသည့် ဆင်းသွယ်လတ်၊ရာထွန်းစသည့်စပါးများမှာ ယခင်နှစ်က တစ်တင်းကို ၁၂၀၀၀ ကျပ်လောက်ဈေးနှုန်းရှိပြီး ယခုနှစ်မိုးရာသီတွင် တစ်တင်းလျှင် ၁၇၅၀၀ ကျပ် လောက်ဈေး ပေါက်နေကြောင်းရဟိုင်ကူးတို့ကျေးရွာမှ လယ်ယာလုပ်ငန်းလုပ်ကိုင်သူ အမျိုးသားတစ်ဦး က ပြောသည်။

"မနှစ်ကထက် စပါးကဈေးကောင်းနေပါတယ်။ သုံးနှစ်အတွင်းဈေးတော်တော် မြင့်သွားတယ်လို့ ပြောရမယ်။ လယ်ဧကအများကြီးနဲ့စပါးအများသိုလှောင်ထားတဲ့သူတွေဆိုရင်တော့ အဆင်ပြေတာပေါ့။ ပြီးတော့လယ်သမားတွေဆီက ပြန်ဝယ်ပြီးသိုလှောင်ထားတဲ့ ကုန်သည်တွေကပိုပြီးအဆင်ပြေနေတာပေါ့" ဟု ပြောသည်။

ယင်းသို့စပါးဈေးနှုန်းမြင့်တက်လာ၍လယ်ဧကအမြောက်အများလုပ်ကိုင်သည့်လယ်သမားများနှင့် စပါး သိုလှောင်ထားနိုင်သူများသာအဓိက အဆင်ပြေကြပြီးသာမန်တစ်ပိုင်တစ်နိုင် လယ်လုပ်ကိုင်သူများမှာ စပါးသိုလှောင်မထားနိုင်သောကြောင့်အဆင်မပြေကြောင်းပြောဆိုကြသည်။

သံတွဲမြို့နယ်၊ ဇာဒီပြင်ကျေးရွာဒေသခံ ဦးမျိုးဝင်းက "စပါးဈေးကောင်းပေမယ့် လယ်အများကြီး မရှိတဲ့လယ်သမားတွေအတွက်တော့မထူးပါဘူး။ စပါးအများကြီးသိုလှောင်နိုင်တဲ့သူတွေတော့ အဆင်ပြေတာပေါ့။လယ်တစ်ဧက နှစ်ဧကပဲ လုပ်နေတဲ့လူတွေကျတော့ စပါးက သိုလှောင်နိုင်တာမရှိတဲ့ အပြင်ဆန်ကိုပါ ပြန်ဝယ်စားနေရတဲ့ အခြေအနေ ဖြစ်နေတယ်" ဟု နိရဥ္စရာသို့ပြောသည်။

မိုခါမုန်တိုင်းကြောင့် စစ်တွေ၊ပေါက်တော၊ ပုဏ္ဏားကျွန်း၊ ရသေ့တောင်၊မြောက်ဦးစသည့် မြို့နယ်များတွင်မူ လယ်မြေ ဧကအမြောက်အများပျက်စီးမှု၊မျိုးစပါးများပျက်စီးမှု၊ ကျွဲနွားတိရစ္ဆာန်သောင်းနှင့်ချီသေဆုံးမှုများဖြစ်ပေါ်ခဲ့ပြီးလက်ရှိစပါးစိုက်ပျိုးရာသီတွင် လယ်သမားများမှာ အခက်အခဲအကျပ်တည်းများစွာဖြစ်ပေါ်လျက်ရှိသည်။

ယင်းဒေသများမှ လယ်သမားများမှာ ရှိသမျှငွေကြေးများကို နေအိမ်များ ပြန်လည်ပြုပြင်တည်ဆောက်လိုက်ရသည့် အတွက် လယ်ယာအတွက် သွင်းအားစုဖြစ်သည့် ဓာတ်မြေသြဇာများ သုံးစွဲရန်ပင်မမျှော်လင့်နိုင်တော့ကြောင်းလည်း ပြောဆိုကြသည်။

အဆိုပါမုန်တိုင်းသင့်မြို့နယ်များတွင်လည်း စပါးဈေးနှုန်းယခင်နှစ်ထက်အနည်းငယ် ပိုကောင်းနေသော်လည်း လယ်သမားများမှာ ထုတ်ရောင်းရန်စပါးပင်မရှိတော့သည့်အတွက်ထူးမခြားနားကြောင်း နိရဥ္စရာသို့ပြောသည်။

ပြီးခဲ့သည့် ၂၀၂၂ ခုနှစ်မိုးရာသီကလည်းမိုခါမုန်တိုင်းသင့်မြို့နယ်များတွင် မိုးရေချိန် အလွန်နည်းပါးခဲ့သည့်အတွက်လယ်သမားများစိုက်ပျိုးထားသည့် စပါးဧက အများအပြား ပျက်စီးဆုံးရှုံးခဲ့၇ပြီး စပါးအထွက်နည်းကာလယ်သမားများမှာ မျိုးစပါးလောက်သာ သိုလှောင်နိုင်ခဲ့သည်ဟု ဆိုသည်။

သိုလှောင်ထားသည့် မျိုးစပါးများမှာလည်း မေလ ၁၄ ရက်ကတိုက်ခတ်ခဲ့သည့်အင်အားပြင်း မိုခါဆိုင်ကလုန်းမုန်တိုင်း အတွင်း ရေစိုပျက်စီးမှုများရှိခဲ့ကြောင်းလယ်သမားများက ပြောသည်။

မျိုးစပါးများ မိုးစိုပျက်စီးသွားခဲ့သည့်လယ်သမားများတွင်ယခုစိုက်ပျိုးရာသီ၌ မျိုးစပါးအခက်အခဲ အလွန်တရာ ဖြစ်ပေါ်လျက်ရှိသည်ဟုလည်းသိ၇သည်။ (NN-23)