၇ခိုင်ပြည်နယ်၊ ကျောက်ဖြူမြို့၊ ငလပွေ့ချောင်းကို လက်ပစ်ဖြတ်ကူးရင်း ရေနစ်ပျောက်ဆုံးနေသည့် ၆ တန်းကျောင်းသားနှစ်ဦး၏ အလောင်းအား ယနေ့ဇူလိုင်လ ၁၀ ရက်၊ နံနက်ပိုင်းတွင် ရှာတွေ့ခဲ့ကြောင်း င/လ ပွေ့ရပ်ကွက်အုပ်ချုပ်ရေးမှူးက အတည်ပြုပြောသည်။

ရှာဖွေ့တွေ့ရှိသည့် အလောင်းများမှာ ကျောက်ဖြူမြို့၊ င/လ ပွေ့ရပ်ကွက်မှ ဦးညီရွှေဝင်း၏သားဖြစ်သူ မောင်ညီကိုဝင်းနှင့် ဒေါ်စိတ်ကေမ၏သားဖြစ်သူ အရပ်ခေါ်နာမည် မောင်ပုတုတို့ဖြစ်ကြောင်း သိ၇သည်။

၄င်းတို့နှစ်ဦးထဲမှ တစ်ဦး၏အလောင်းကို မနက် ၆ နာရီတွင် ပြန်တွေ့ခဲ့ပြီး ကျန်တစ်ဦး၏အလောင်းကို
မနက် ၈ နာရီအချိန်တွင်ရှာတွေ့ခဲ့ပြီး ကျောက်ဖြူမြို့ဆေးရုံသို့ပို့ဆောင်ထားကြောင်း င/လ ပွေ့ရပ်ကွက် အုပ်ချုပ်ရေးမှူး ဦးထွန်းထွန်းနိုင်ကပြောသည်။

" အလောင်းတွေပြန်တွေ့ထားပါပြီ။ အခုမနက်ပိုင်းလေးမှာပဲ ပြန်တွေ့လို့ ဆေးရုံကိုပို့ထားတယ်။ လောလောဆယ်ကျနော်လည်းအလုပ်အရမ်းရှုပ်နေလို့ပါ" ဟု သူကပြောသည်။

ယခုရေနစ်သေဆုံးခဲ့သည့် ကျောင်းသားနှစ်ဦးစလုံးမှာ ကျောက်ဖြူမြို့၊ င/လ ပွေ့အလယ်တန်းကျောင်းတွင် ၆ တန်းအတန်းပညာသင်ယူနေသည့် ကျောင်းသားငယ်များ ဖြစ်ကြောင်းသိ၇သည်။

ဇူလိုင်လ ၈ ရက် နေ့လယ်တစ်နာရီကျော်လောက်က အဆိုပါကျောင်းသားနှစ်ဦး၊ နောက်ထပ်
နောက်ထပ် ၆ တန်းကျောင်းသားတစ်ဦးနှင့် ရွယ်တူသူငယ်ချင်းတစ်ဦးတို့မှာ ငလပွေ့ကမ်းဖက်မှ တစ်ဖက်ကမ်းရှိ တောင်ရှည်ကျေးရွာဖက်သို့ ငှက်ပစ်ရင်းနှင့် မလင်စွပ်ကယ်သီးစားရန် သွားရောက်ခဲ့ကြခြင်းဖြစ်သည်။

အဆိုပါ တောင်ရှည်ရွာဖက်ကမ်းမှ အပြန်တွင် ဖျား(ဒီရေ)ကျချိန်ဖြစ်၍ ငလပွေ့ဖက်ကမ်းသို့ ချောင်းမှလက်ပစ်ဖြတ်ကူးကြစဥ် မောင်ညီကိုဝင်းနှင့် မောင်ပုတုတို့မှာ ရေနစ်ပျောက်ဆုံးနေခြင်း ဖြစ်ကြောင်း သူကပြောသည်။

၄င်းတို့နှစ်ဦးရေနစ်မြုပ်ပျောက်ဆုံးနေသည့် ဇူလိုင်လ ၈ ရက်၊ ညနေပိုင်းမှစတင်ကာ ရပ်ကွက် တာဝန်ရှိသူများနှင့် ကယ်ဆယ်ရေးအဖွဲ့များက ချောင်းကြောင်း တစ်လျှောက် လိုက်လံရှာဖွေခဲ့ပြီး နှစ်ရက်အကြာ ယနေ့ဇူလိုင်လ ၁၀ ရက်မနက်ပိုင်းတွင် အလောင်းများအား ပြန်တွေ့ခဲ့ခြင်းဖြစ်သည်။ (NN-23)

ဓာတ်ပုံ-ရင်ထဲကကျောက်ဖြူ