(ပြသလိုသူများလူဦးရေအကန့်အသတ်မရှိ စာရင်းပေးသွင်းနိုင်ပြီ)

၇ခိုင်ပြည်နယ်၊ စစ်တွေမြို့ရှိပြည်သူ့ဆေးရုံကြီးတွင် ဇူလိုင် ၁၅ ရက်နှင့် ၁၆ ရက်တို့၌ ရန်ကုန်မှ ဝါရင့်အထူးကု၊ ပါမောက္ခနှင့်၊ သမားတော်ကြီးများက ဒုတိယအကြိမ် အခမဲ့လာရောက်ကုသပေးမည်ဟု သိ၇သည်။

ဇူလိုင်လ ၁၅ရက်(စနေနေ့)တွင် နံနက် ၉ နာရီမှ ညနေ ၄ နာရီအတွင်း၊ ဇူလိုင်လ ၁၆ ရက် (တနင်္ဂနွေနေ့)တွင် နံနက် ၈နာရီမှ နံနက် ၁၀ နာရီအတွင်း အခမဲ့စမ်းသပ်ကုသပေးသွားမည်ဟု စစ်တွေဆေးရုံကြီးမှကျန်းမာရေးဝန်ထမ်းတစ်ဦးက ပြောသည်။

“ပြသလိုတဲ့ လူနာတွေအနေနဲ့စစ်တွေဆေးရုံကြီး ပြင်ပလူနာဆောင်ဖြစ်တဲ့ ၄ ထပ်ဆောင် အောက်ထပ်က စာရင်းလက်ခံဌာနမှာကြိုတင်စာရင်းပေးသွင်းနိုင်ပါပြီ”ဟု ပြောသည်။

ယခု ဒုတိယအကြိမ်လာရောက်ကုသပေးမည့်သူများတွင် အထွေထွေရောဂါအထူးကု၊နှလုံးရောဂါ အထူးကု၊ ဦးနှောက်၊အာရုံကြောနှင့် အတက်ရောဂါအထူးကု၊ အရိုး၊ အဆစ်သွေးလေးဖက်နာ၊သွေးနှလုံးရောဂါအထူးကု၊ အစာအိမ်နှင့် အူလမ်းကြောင်းအထူးကု၊အသည်းရောဂါအထူးကု၊ သွေးရောဂါအထူးကု၊ အရေပြားရောဂါအထူးကုနှင့်ခွဲစိတ်အထူးကုဆရာဝန်ကြီးတို့ပါဝင်မည်ဖြစ်သည်။

ရခိုင်ပြည်နယ်၊ပြည်သူ့ကျန်းမာရေးနှင့် ကုသရေးဦးစီးဌာနမှ ဌာနမှူးလည်းဖြစ်၊ စစ်တွေ ဆေးရုံအုပ်ကြီးလည်းဖြစ်သည့်ဒေါက်တာကြည်လွင်၏လူမှုကွန်ရက်စာမျက်နှာတွင်လည်း “မည်သူမဆို လာရောက်ပြသနိုင်ပါကြောင်းအသိပေးအပ်ပါသည်”ဟုဖော်ပြထားသည်။

ယခုအစီအစဉ်ကိုစစ်ကောင်စီလက်အောက်ခံ ကျန်းမာရေးဝန်ကြီးဌာန၏အစီအစဉ်ဖြင့်ပြုလုပ်ခြင်းဖြစ်သည်။

ပြီးခဲ့သည့် ဇွန်လ ၂၅ရက်(တနင်္ဂနွေနေ့)ကလည်း စစ်တွေဆေးရုံကြီးတွင် ကျန်းမာရေး ဝန်ကြီးဌာန၏အစီအစဉ်ဖြင့်ယခုကဲ့သို့ ရန်ကုန်မှ ဝါရင့် အထူးကု၊ ပါမောက္ခနှင့်၊ သမားတော်ကြီးများက ပထမအကြိမ်အခမဲ့ လာရောက်ကုသပေးခဲ့သည်။

ပထမအကြိမ်ကုသပေးခဲ့စဉ်က စစ်တွေအပါအဝင်အခြားမြို့နယ်များမှ လူနာ ၁၁၄၄ ဦးကို အခမဲ့ကုသပေးနိုင်ခဲ့သည်ဟုကျန်းမာရေးဝန်ကြီးဌာနက ထုတ်ပြန်ခဲ့သည်။ (NN-16)

ဓာတ်ပုံ -ကျန်းမာရေးဝန်ကြီးဌာန