မြန်မာ-ဘင်္ဂလားဒေ့ရှ် နယ်စပ်တစ်လျှောက်ရှိနတ်မြစ်အတွင်းတွင် နှစ်နိုင်ငံ နယ်ခြားစောင့် တပ်ဖွဲ့များသည် ရေကြောင်းကင်းလှည့်မူ ပြုလုပ်နေကြောင်းသိ၇သည်။

ရေကြောင်းကင်းလှည့်ခြင်းများကိုယမန်နေ့ ဇူလိုင်လ၁၈ ရက်၊ ၂၀ ရက်နှင့် ၂၂ ရက်တို့တွင် ၃ ရက်ကြာ ဆောင်ရွက်နေခြင်းဖြစ်သည်။

ယင်းသို့ဆောင်ရွက်မှုကိုမြန်မာနိုင်ငံမှ အမှတ်(၁)နယ်ခြားစောင့်ရဲတပ်ဖွဲ့ခွဲနှင့်ဘင်္ဂလားဒေ့ရှ်နိုင်ငံမှ အမှတ်(၂)ဘင်္ဂလားဒေ့ရှ်နယ်ခြားစောင့်တပ်တို့မှအရာရှိဦးစီး ကိုယ်စားလှယ်အဖွဲ့တို့ကပူးပေါင်းဆောင်ရွက်နေကြခြင်းဖြစ်သည်။

ယင်းသို့ဆောင်ရွက်ရာတွင် မူးယစ်ဆေးဝါးနှင့်တရားမဝင် လူဝင်ထွက်မှုများ မရှိစေရေး၊ ရေကြောင်းပြောင်းလဲမှုနှင့်ဝင်ထွက်ပေါက်များ စစ်ဆေးခြင်း၊ နှစ်ဘက် ကင်းလှည့်မှုမှတ်တမ်းတွင် လက်မှတ်ရေးထိုးခြင်းနှင့် နှစ်ဘက်သတင်းဖလှယ်ခြင်းများကိုဆောင်ရွက်လျက်ရှိသည်ဟုလည်း စစ်ကောင်စီပိုင်သတင်းစာများတွင် ဖော်ပြသည်။

မောင်တောမြို့နယ်မှပြည်နယ်လွှတ်တော်အမတ်ဟောင်း ဦးမောင်အုန်းက တရားဥပဒေစိုးမိုးမှုကို နယ်စပ်တွင် တင်းတင်းကျပ်ကျပ်လုပ်ရန်လိုသည်ဟု နိရဥ္စရာကို ပြောသည်။

“သူတို့ကအမြဲတမ်းကင်းလှည့်နိုင်မှာတော့ မဟုတ်ဘူး။ သူတို့ဒီဘက်ကကင်းလှည့်ရင် နောက်တစ်ဘက်က သွားမယ်လေ။ အဓိကတော့ အဲဒီကိစ္စနဲ့ပတ်သက်လာရင်ကူးတို့သည်တွေကိုပဲ အဓိက ဖမ်းရမယ်။ အခုက ကူးတို့သည်ကိုသူတို့က မွေးစားထားသလိုဖြစ်နေတယ်။ ကူးတို့သည်ကိုဖမ်းလိုက်တယ်ဆိုရင်သူတို့ နယ်စပ်ဖြတ်ကျော်မှုမရှိတော့ဘူး။ ပြီးတော့မူးယစ်ဆေးဝါးကျလာရင်လည်း အဲဒီကူးတို့သည်နဲ့ပဲ၊ ကူးတို့နဲ့ပဲသွားနေရတာကိုး။နယ်ခြားဖြတ်ကျော်မှုကို ဥပဒေစိုးမိုးမှုရှိပြီး တင်းတင်းကျပ်ကျပ်လုပ်ဖို့လိုတယ်။အဓိကတော့ တရားဥပဒေစိုးမိုးမှုရှိဖို့လိုတယ်လို့ မြင်တယ်”ဟု ပြောသည်။

ယခုကဲ့သို့ နှစ်နိုင်ငံနယ်စပ်တစ်လျှောက်တွင်ရေကြောင်းကင်းလှည့်ခြင်းများကို နှစ်နိုင်ငံ နယ်ခြားစောင့်တပ်ဖွဲ့များကလစဉ်ပြုလုပ်နေကျဖြစ်သည်ဟုလည်း စစ်ကောင်စီက ထုတ်ပြန်ထားသည်။ (NN-16)

ဓာတ်ပုံ -ယခင်ကပြုလုပ်ခဲ့သည့် ပုံဟောင်း။