ဗြိတိန်နိုင်ငံ၏ ဓနသဟာယနှင့်ဖွံ့ဖြိုးတိုးတက်ရေးရုံး (Foreign, Commonwealth & Development Office- FCDO)ကမြန်မာနိုင်ငံအတွင်း ဗြိတိန်နိုင်ငံသားခရီးသွားများအတွက် အန္တရာယ်ရှိနေရာများသတိပေးချက်ထုတ်ပြန်ရာတွင် ရခိုင်ဒေသအချို့လည်း ပါဝင်နေကြောင်း သိ၇သည်။

FCDO ကမြန်မာနိုင်ငံအတွင်း ရန်ကုန်၊ နေပြည်တော်၊ ပဲခူး၊ ဧရာ၀တီနှင့် ရခိုင်ပြည်နယ်တောင်ပိုင်းမှ အပ ကျန်ပြည်နယ်နှင့် တိုင်းအားလုံးရှိ ဒေသများသည်ခရီးသွားများအတွက် အန္တရာယ်ရှိနေသည်ဟု ယမန်နေ့ ဇူလိုင်လ ၁၉ ရက်တွင် သတိပေးချက်ထုတ်ပြန်လိုက်ခြင်းဖြစ်သည်။

အဆိုပါသတိပေးချက်တွင် ဗြိတိန်နိုင်ငံသားများအနေဖြင့်မြန်မာနိုင်ငံအတွင်း ရခိုင်ပြည်နယ် မြောက်ပိုင်းဒေသများအပါအဝင် မွန်၊ကချင်၊ ချင်း၊ ကယား၊ ကရင်၊ စစ်ကိုင်းနှင့် မကွေးတိုင်းသို့ခရီးမသွားကြရန် ထည့်သွင်းတားမြစ်ထားသည်။

အလားတူ ရခိုင်ပြည်နယ်အလယ်ပိုင်းအပါအဝင် ရှမ်းပြည်နယ်၊မန္တလေးတိုင်းနှင့် တနင်္သာရီတိုင်းသို့လည်း ခရီးမသွားကြရန်နှင့် မသွားမဖြစ်မှသာသွားကြရန်လည်း  FCDO က တိုက်တွန်းထားသည်။

မြန်မာနိုင်ငံအနှံ့အပြားတွင် လေကြောင်းတိုက်ခိုက်မှုများ၊လက်နက်ကြီးများဖြင့် တိုက်ခိုက်ခြင်း၊ ဗုံးကြဲခြင်း၊မြေမြှုပ်မိုင်းအန္တရာယ်နှင့် လက်နက်ကိုင်တိုက်ပွဲများဖြစ်ပေါ်နေပြီးပဋိပက္ခနှင့် သိသာထင်ရှားသော အကြမ်းဖက်မှုများရှိနေသည်ဟုလည်း သတိပေးချက်တွင်ဖော်ပြထားသည်။

FCDO ကအန္တရာယ်ရှိဒေသများအဖြစ်ထုတ်ပြန်ရာတွင်ပါဝင်သော ၇ခိုင်ပြည်နယ်တွင်မူ၂၀၁၈ ခုနှစ်မှ ၂၀၂၀ ပြည့်နှစ်အထိနှင့် ၂၀၂၂ ခုနှစ်တို့တွင်သာမြန်မာစစ်ကောင်စီတပ်နှင့် ရက္ခိုင့်တပ်တော်(AA)တို့ တိုက်ပွဲများအပြင်းအထန်ဖြစ်ပွားခဲ့ပြီးဒေသမတည်မငြိမ်ဖြစ်နေခဲ့ခြင်းဖြစ်သည်။

၂၀၂၂ ခုနှစ်၊နိုဝင်ဘာလ ၂၆ ရက်မှစတင်ကာ စစ်ကောင်စီတပ်နှင့် AA တို့ နှစ်ဘက်နားလည်မှုဖြင့်ယနေ့အထိ အပစ်အခတ်ရပ်စဲလျက်ရှိရာ FCDO ကထုတ်ပြန်ထားသလို ရခိုင်တွင် တိုက်ပွဲများဖြစ်ပွားခြင်းများနှင့်အကြမ်းဖက်တိုက်ခိုက်မှုများရှိမနေဘဲ ဒေသတည်ငြိမ်နေသည်ဟု ဒေသခံများက ပြောသည်။(NN-16)

(ဓာတ်ပုံ) - FCDO