ရခိုင်အမျိုးသမီးငယ် ၄ ဦးကို အရှေ့အလယ်ပိုင်းနိုင်ငံများသို့ ရောင်းစားခဲ့သည့် ပွဲစားအမျိုးသမီး သုံးဦးအနက်နှစ်ဦးအား ဖမ်းဆီးအမှုဖွင့်

ရခိုင်အမျိုးသမီးငယ် ၄ ဦးအား ယူအေအီးနိုင်ငံ၊ ဒူဘိုင်းမြို့မှ အလှပြင်ဆိုင်တစ်ခုတွင် လုပ်ကိုင်ရမည်ဟု လိမ်လည်ပြီး တခြားနိုင်ငံများသို့ ပို့ဆောင်ရောင်းစားခဲ့သည့် ပွဲစားအမျိုးသမီး ၃ ဦးထဲမှ ၂ နှစ်ဦးကိုဖမ်းဆီးအမှုဖွင့်ထားကြောင်း သတင်းရရှိသည်။

လက်ရှိဖမ်းဆီးအမှုဖွင့်ထားသူနှစ်ဦးမှာ ရွှေပြည်သာမြို့နယ်တွင်နေထိုင်သည့် ရခိုင်အမျိုးသမီး ပွဲစားမနန္ဒာ ဆိုသူနှင့် ဗမာအမျိုးသမီး ပန်ပန်(ခ)ခိုင်စန္ဒာတို့ဖြစ်ကြောင်း သိရသည်။

၄င်းတို့ကို ရန်ကုန်တိုင်း၊ မင်္ဂလာဒုံမြို့နယ်တရားရုံးတွင် ပြည်ပအလုပ်ကိုင်ဆိုင်ရာဥပဒေပုဒ်မ (၂၆) ဖြင့် အမှုဖွင့်ထားကြောင်း ရောင်းစားခံလိုက်ရသည့် ရခိုင်အမျိုးသမီးငယ်များအရေးကူညီပေးနေသည့် ရခိုင်အမျိုးသားကွန်ရက် ဥက္ကဋ္ဌ ဦးတင်ထူးအောင်က နိရဉ္စရာသို့ပြောသည်။

"လက်ရှိတော့ သူတို့နှစ်ယောက်ကိုအမှုဖွင့်ထားပြီပေါ့နော်။ ပြည်ပအလုပ်အကိုင်ပုဒ်မနဲ့ မင်္ဂလာဒုံ တရားရုံးမှာတရားစွဲထားတယ်။ ဇူလိုင် ၂ဝ ရက်က တရားရုံးချိန်းပေါ့။ လိမ်လည်ပို့ဆောင်ခံရတဲ့ အမျိုးသမီးငယ်တစ်ယောက်ရဲ့မိခင်လည်း တရားရုံးချိန်းမှာ ကိုယ်စားလာရောက်ခဲ့ပါတယ်" ဟု ပြောသည်။

အဆိုပါ ပွဲစားမနန္ဒာ၊ မခိုင်သန်းအေးနှင့် မပန်ပန်(ခ)ခိုင်စန္ဒာတို့သုံးဦးမှာ အသက် ၂၂ နှစ်မှ ၂၆ နှစ်အရွယ်ရှိ ရခိုင်အမျိုးသမီးငယ် ၄ ဦးတို့ကို ဒူဘိုင်းရှိအလှပြင်ဆိုင်သို့ပို့ပေးမည်ဟုဆိုကာ အီရတ်နှင့် ဆော်ဒီအာရေဗျနိုင်ငံများသို့ ရောင်းစားခဲ့ခြင်းဖြစ်ကြောင်း သူက ဆက်ပြောသည်။

"သူတို့ဟာ ဒူဘိုင်းကတဆင့် အီရတ်တို့၊ ဆော်ဒီအာရေဗျနိုင်ငံတွေကိုရောက်သွားရတယ်။ ဒူဘိုင်းမြို့မှာ အလှပြင်ဆိုင်မှာအလုပ်ရမယ်ဆိုပြီး သူတို့ကို ပြောပြီးတော့ လိမ်ညာခေါ်ဆောင်ပြီး ဆော်ဒီအာရေဗျတို့ကို ရောင်းစားလိုက်တယ်ပေါ့နော်" ဟု ပြောသည်။

ယင်းသို့လိမ်လည်ပို့ဆောင်ခံခဲ့ရ ၄ ဦးမှာ စစ်တွေ၊ ပုဏ္ဏားကျွန်း၊ မြောက်ဦးနှင့် ရသေ့တောင်မြို့နယ်များမှ တစ်မြို့နယ်လျှင် တစ်ဦးကျစီဖြစ်ကြောင်း သိရသည်။

သူတို့ ၄ ဦးကို ပွဲစားများက ယခုနှစ်၊ မေလ ၇ ရက်တွင် ရန်ကုန်မှ ယူအေးအီးနိုင်ငံ၊ ဒူဘိုင်းမြို့သို့ပို့ဆောင်ခဲ့ပြီး ယင်းမှတဆင့် ၃ ဦးကို အီရတ်နိုင်ငံသို့ဆက်လက်ပို့ဆောင်ကာ ကျန်တစ်ဦးကို ဆော်ဒီအာရေဗျနိုင်ငံသို့ ပို့ဆောင်ခဲ့ခြင်းဖြစ်ကြောင်း သိရသည်။

အမျိုးသမီးငယ်များထဲမှ အီရတ်နိုင်ငံသို့ပို့ဆောင်ခံခဲ့ရသူနှင့် မိသားစုဝင်များသည် ဇွန်လ ၂၁ ရက်တွင် အဆက်သွယ်ရရှိခဲ့ပြီး မိမိတို့မှာ ပွဲစားများ၏ ရောင်းစားခြင်းခံလိုက်ရပြီ ဖြစ်ကြောင်း ငိုယိုပြောဆိုလာသဖြင့် မိခင်ဖြစ်သူက စစ်တွေမြို့၊ အမှတ်(၁)ရဲစခန်းတွင် တိုင်ကြားအမှုဖွင့်ခဲ့သည်ဟု သိရသည်။

လက်ရှိတွင် ပွဲစားနှစ်ဦးကိုဖမ်းဆီးမိပြီးနောက်ပိုင်း စစ်တွေတွင်ဖွင့်လှစ်ထားသည့်အမှုအား မင်္ဂလာဒုံမြို့နယ်တရားရုံးသို့ ပြောင်းလွှဲအမှုဖွင့်ခဲ့ခြင်းဖြစ်ကြောင်း အမှုကိုကူညီပေးနေသည့်ရှေ့နေ ဦးကျော်စိုးနိုင်က နိရဥ္စရာသို့ပြောသည်။

"စစ်တွေမှာ ဖွင့်ထားတဲ့အမှုကို ရန်ကုန်ကိုလွှဲပြောင်းပေးလိုက်တာပါ။ တရားခံတွေကိုဖမ်းမိတဲ့ သက်ဆိုင်ရာနယ်မြေတရားရုံးကိုလွှဲပေးလိုက်တာပါ"ဟု ပြောသည်။

လက်ရှိအမှုဖွင့်ထားသည့်ပုဒ်မမှာ အာမခံရနိုင်သည့်ပုဒ်မဖြစ်နေ၍ တရားခံများအား လူကုန်ကူးမှုတားဆီးကာကွယ်ရေးဥပဒေပုဒ်မဖြင့် ဆက်လက်တရားစွဲဆိုနိုင်ရန် ဥပဒေကျွမ်းကျင်သူနှင့် ပူးပေါင်းဆောင်ရွက်နေကြောင်း ရခိုင်အမျိုးသားကွန်ရက်ဥက္ကဋ္ဌ ဦးတင်ထူးအောင်က ပြောသည်။

နိုင်ငံတွင်းအလုပ်အကိုင်အခွင့်အလမ်းရှားပါးမှုများကြောင့် ရခိုင်အပါအဝင် မြန်မာအမျိုးသမီးငယ်များမှာ အရှေ့အလယ်ပိုင်းဒေသနိုင်ငံများသို့ အလုပ်လုပ်ကိုင်နိုင်ရန် ပွဲစားများ၏အဆက်သွယ်ကိုအားကိုးပြီး နှစ်စဉ် သွားရောက်မှုများရှိနေကြသည်။

ယင်းသို့သွားရောက်အလုပ်လုပ်ကိုင်ရာတွင် အလုပ်ရှင်သူဌေးများ၏ မတရားခိုင်းစေရိုက်နှက်မှု၊ လိင်ပိုင်းဆိုင်ရာအကြမ်းဖက်မှု၊ အစာရေစာငတ်ပြတ်မှုများကိုကြုံတွေ့နေရပြီး ၄င်းတို့ကို တာဝန်ယူပို့ပေးခဲ့သည့်ပွဲစားများကိုတိုင်ကြားလျှင်လည်း ပွဲစားများက မဖြေရှင်းပေးဘဲ လျစ်လျူရှုထားသည်ဟု ကာယကံရှင်အမျိုးသမီးငယ်များက နိရဉ္စရာသို့ပြောဆိုထားကြသည်။ (NN-23)