၇ခိုင်တွင်ဆိုင်ကလုန်းမိုခါမုန်တိုင်းပြီးနောက် လူနေအိမ်များနှင့်အဆောက်အအုံးများစွာပျက်စီးခဲ့၍ တဟုန်ထိုးဈေးမြင့်တက်ခဲ့သောအိမ်မိုးသွပ်ဈေးမှာ ယခင်အတိုင်းပုံမှန်ဈေးပြန်ဖြစ်လာနေသည်ဟုအိမ်ဆောက်ပစ္စည်းအရောင်းဆိုင်များက ပြောသည်။

စစ်တွေမြို့မှအမည်မဖော်လိုသည့် အိမ်ဆောက်ပစ္စည်းအရောင်းဆိုင်ပိုင်ရှင်တစ်ဦးက"အိမ်မိုးသွပ်ဈေးတွေကတော့ ဈေးကျသွားပါတယ်။ အရင်ပုံမှန်ဈေးပြန်ဖြစ်သွားတယ်လို့ပြောလို့၇တယ်" ဟု ပြောသည်။

မုန်တိုင်းပြီးနောက် ၁ပေကို ၃၂၀၀ ကျပ် မှ ၃၅၀၀ ကျပ် ကြားရှိသော အိမ်မိုးသွပ်အထူအမျိုးအစားမှာ ယခုအခါ၁ ပေကို ၃၀၀၀ ကျပ်ဈေးနှုန်းရှိနေပြီဖြစ်သည်။

အလားတူမုန်တိုင်းပြီးနောက် ၂၀၀၀ ကျပ်မှ ၂၁၀၀ ကျပ်ကြားရှိခဲ့သော အိမ်မိုးသွပ်အပါး အမျိုးအစားမှာလည်း ယခုအခါ ၁ ပေကို၁၉၀၀ ကျပ်သာဈေးနှုန်းရှိနေသည်ဟု သိ၇သည်။

စစ်တွေမြို့မှ “ကျော်မြင့်မိုရ်”အိမ်ဆောက်ပစ္စည်းအရောင်းဆိုင်ပိုင်ရှင်က"ကျွန်တော်တို့ဆိုင်မှာကရန်ကုန်ကနေ တစ်ရက်ဖို့ အိမ်မိုးသွပ်ဈေးတွေ Update တွေရောက်တယ်။ အဲ့ဒီဘက်က ၁ ပေကို ၁၀၀ကျပ်တက်ရင် ဒီဘက်ကလည်း ၁၀၀ ကျပ်တက်လို့၇တယ်။ အဲ့လိုမျိုးပါ။ဒါပေမဲ့ အခုက ဈေးကျသွားတယ်။ အရင်ဈေးပုံမှန်ဖြစ်နေတယ်" ဟုပြောသည်။

၇ခိုင်တွင် မိုခါမုန်တိုင်းပြီးနောက်ပျက်စီးသွားသည့် သိန်းနှင့်ချီသော လူနေအိမ်များနှင့် အဆောက်အအုံများတွင်ပြန်လည် နေထိုင်အခြေချရန် အတွက် အချိန်မီပြန်ပြုပြင်ရန် လိုအပ်နေခဲ့ကြသည်။

ယင်းအချိန်တုန်းက အိမ်မိုးသွပ်များမှာဈေးကွက်တွင် ဝယ်လိုအားများပြီး ထုတ်လုပ်မှုလိုက်မမီ၍ ဈေးနှုန်းမြင့်တက်ခဲ့ကာဝယ်ယူမ၇နိုင်သည့် အခြေအနေအထိ ပစ္စည်းပြတ်လပ်မှုများလည်း ရှိခဲ့သည်။

“ကျော်မြင့်မိုရ်”အိမ်ဆောက်ပစ္စည်းအရောင်းဆိုင်ပိုင်ရှင်က"ဈေးကွက်သဘောသဘာ၀အရဝယ်လိုအားများရင် ထုတ်လုပ်မှုတွေက စက်ရုံမှာလိုက်မမီနိုင်ဘူး။ အဓိကဝယ်လိုအားများရင် ဈေးကွက်မှာ ပစ္စည်းပြတ်ပြီးဈေးတွေတင်လိုက်ကြတဲ့သဘောမျိုးလေ။ အခုက အိမ်မိုးသွပ်တွေ ပုံမှန်ဈေးဖြစ်နေပါပြီ" ဟုပြောသည်။

လက်ရှိတွင်မိုးရာသီဖြစ်နေသည်ကတစ်ပိုင်း၊ မုန်တိုင်းပြီးနောက် နေအိမ်များကို တစ်ပိုင်တစ်နိုင်ပြန်လည် ပြုပြင်ပြီးစီးသွားသည်ကတစ်ပိုင်း စသည့် အချက်များကြောင့်အိမ်မိုးသွပ်များဝယ်ယူမှု နည်းပါးလျက်ရှိသည်ဟု ကျောက်တော်မြို့နယ်မှအိမ်ဆောက်ပစ္စည်းအရောင်းဆိုင်ပိုင်ရှင်အမျိုးသမီးတစ်ဦးက ပြောသည်။

"ဒီအချိန်က မိုးတွင်းရောက်နေပြီလေ။မုန်တိုင်းဒဏ်ခံ၇တဲ့အိမ်တွေလည်း အကုန် မိုး၊ ကာ ပြီးစီးသွားပြီဆိုတော့အခုတော့ အရောင်းပါးသွားတယ်။ ကျွန်မတို့အိမ်မိုးသွပ်တွေရောင်းချမှုတွေနည်းနည်းပါးသွားပြီ" ဟု ပြောသည်။

ထို့အတူယခုရက်ပိုင်းအတွင်း စစ်ကောင်စီက ထုတ်ဝေမည့် ၂ သောင်းကျပ်တန်ငွေစက္ကူသစ်ကြောင့်လည်း ရန်ကုန်ရှိအိမ်မိုးသွပ်စက်ရုံများတွင်အရောင်းရပ်နားကာ ဈေးဖွင့်မရောင်းဘဲ အခြေအနေများကို စောင့်ကြည့်မှုများရှိနေသည်ဟုလည်းသိ၇သည်။ (NN-12)