(ပြသနာအရင်းအမြစ်ကိုတိကျသေချာစွာမသိဘဲ ထုတ်ပြန်ခြင်းဟုထင်မိကြောင်းဆရာဦးဇေယျာထွန်းတုံ့ပြန်)

၇ခိုင်ပြည်နယ်၊စစ်တွေမြို့၊ အထက(၁)ကျောင်းတွင် အစမ်း စာမေးပွဲဖြေဆိုနေသည့်Grade- 11 ကျောင်းသားတစ်ဦးအား အခန်းစောင့်ဆရာမှ ကိုယ်ထိလက်ရောက်ရိုက်နှက်မှုကျူးလွန်ခဲ့ကြောင်း အခြေခံကျောင်းသားများသမဂ္ဂ(စစ်တွေမြို့နယ်)ကထုတ်ပြန်သည်။

ထိုသို့ကိုယ်ထိလက်ရောက်ရိုက်နှက်မိခဲ့သည့်ဆရာမှာ စစ်တွေမြို့အထက(၁)မှဦးဇေယျာထွန်းဖြစ်ပြီး ရိုက်နှက်ခံခဲ့၇သူမှာ Grade- 11 ကျောင်းသားမောင်ပြည့်ဖြိုးကျော်ဖြစ်ကြောင်း သိ၇သည်။

အဆိုပါ ကိစ္စနှင့် ပတ်သက်ပြီးကိုယ်ထိလက်ရောက်ရိုက်နှက်ခဲ့သည်ဟု စွပ်စွဲခံထားရသူ  ဆရာဦးဇေယျာထွန်းကိုဆက်သွယ်မေးမြန်းခဲ့ရာ ကျောင်းသားသမဂ္ဂ၏ထုတ်ပြန်ချက်မှာ ပြသနာအရင်းအမြစ်ကို တိကျသေချာစွာမသိဘဲ မိမိ၏ယူဆချက်သဘောထားတစ်ခုတည်းဖြင့် ထုတ်ပြန်ခြင်းဟုထင်မိကြောင်း နိရဉ္စရာသတင်းဌာနသို့ပြောသည်။

"ပြသနာရဲ့အရင်းအမြစ်ကိုတိကျသေချာစွာမသိဘဲမိမိရဲ့ ယူဆချက်သဘောထားတစ်ခုတည်းနဲ့အခုလိုစာထုတ်လိုက်တယ်လို့မြင်မိပါတယ်" ဟု ဆရာဦးဇေယျာထွန်းကပြောသည်။

ဇူလိုင်လ၂၆ ရက်က Grade-11(A) အခန်းတွင် အစမ်းစာမေးပွဲဖြေဆိုနေစဥ် ဆရာဦးဇေယျာထွန်းက မောင်ပြည့်ဖြိုးကျော်၏ ဆံပင်အားဆောင့်ဆွဲပြီး လက်ဝါးဖြင့်နားထင်ကို အကြိမ်ကြိမ်ရိုက်နှက်ခဲ့ သည်ဟု အခြေခံကျောင်းသားများသမဂ္ဂ(စစ်တွေမြို့နယ်)၏ ထုတ်ပြန်ချက်တွင် ဖော်ပြသည်။

ယင်းထုတ်ပြန်ချက်ထဲတွင်ဦးဇေယျာထွန်းသည် မောင်ပြည့်ဖြိုးကျော်အား စာရေးခုံပေါ်တွင်လည်းဦးခေါင်းကိုဆွဲဆောင့်ခဲ့ကြောင်း၊ နံရံတွင်လည်း ဦးခေါင်းကိုထု၍ ကျောင်းသူ၊ ကျောင်းသားများ ရှေ့တွင် အရှက်အိန္ဒြေပျက်ပြားအောင် နားရွက်ကိုဆွဲ၍ "မင်းငါ့ကိုဘာကောင်ထင်လဲ။ မင်းငါ့အကြောင်းကိုစုံစမ်းကြည့်လိုက်။ တခြားကျောင်းသားတွေလည်း ကြည့်ထားကြ။ "ဟုပြောဆိုခြိမ်းခြောက်ခဲ့ကြောင်း ရေးသားထားသည်။

ယမန်နေ့ကစာမေးပွဲခန်းအတွင်း မောင်ပြည့်ဖြိုးကျော်မှာ ၄င်း၏ စာမေးပွဲခုံတွင်ဖြေဆိုနေစဥ် ဖြေဆိုပြီးသားအဖြေလွှာအားအနီးရှိ ကျောင်းသား တဦးက လှမ်းကြည့်ခဲ့ကြောင်း၊ ဆရာဦးဇေယျာထွန်းကမောင်ပြည့်ဖြိုးကျော်အား အဖြေလွှာကို တခြားသူများအား မပြရန် သတိပေးခဲ့ကြောင်း အဖြစ်ပျက်အားအစဆုံးမြင်တွေ့လိုက်ရသည့် တစ်ခန်းတည်းဖြေဆိုနေသူ ကျောင်းသားငယ်တစ်ဦးကနိရဥ္စရာသို့ပြောသည်။

" အဲဒီကျောင်းသားဆီကနောက်ကျောင်းသားတစ်ယောက်က စာကြည့်ပြီး ကူးရေးပါတယ်။ဆရာကအဲဒီစာရွက်ဖုံးထားလို့ပြောပါတယ်။ အဲဒါကို ကျောင်းသားကမဖုံးဖြစ်လိုက်ဘူးပေါ့နော်။ နောက်တခေါက်လာပြီးဖုံးဖို့ပြောတဲ့အချိန်မှာ ကျောင်းသားက သူ့လုပ်နေကျအကျင့်ပါနေတဲ့ပုံစံအတိုင်း ပါးစပ်ကအသံတမျိုးထွက်သွားပါတယ်။အဲဒါကလည်း ဆရာကိုမလေးမစားဆိုတဲ့ ပုံစံနဲ့လုပ်တာ မဟုတ်ပါဘူး။ သူ့မှာအကျင့်ပါနေတာပါ။အဲဒါကို ဆရာကသူ့ကိုပြောတယ်ထင်ပြီးတော့ လာပြီးရိုက်တာပါ" ဟုပြောသည်။

ယင်းနောက်ဆရာဦးဇေယျာထွန်းမှာမောင်ပြည့်ဖြိုးကျော်၏အဖြေလွှာကို သိမ်းယူကာကိုယ်ထိလက်ရောက် ရိုက်နှက်ခဲ့ကြောင်း အဆိုပါမျက်မြင် သက်သေ ကျောင်းသားတစ်ဦးကပြောသည်။

" ရိုက်တာကအရမ်းရိုက်ပစ်လိုက်တာပါ။ ဆံပင်ပုတ်တွေဆွဲပြီးတော့ နားအုံတွေကိုရိုက်တယ်။စာသင်ခုံမှာဆောင့်ပစ်လိုက်တာပါ" ဟု သူကပြောသည်။

အခြေခံကျောင်းသားများသမဂ္ဂ(စစ်တွေမြို့နယ်)၏ပြန်ကြားရေးမှူးကလည်း" အဲလိုရိုက်နှက်ပြီးတော့ဆရာကအပြင်ထွက်သွားပြီးတော့ ခဏနေပြန်လာပြီး ကျောင်းသားတွေရဲ့ အဖြေလွှာတွေ အားလုံးသိမ်းသွားတယ်လို့ပြောတယ်။ တချို့ကျောင်းသားတွေဆို စာမေးပွဲကောင်းကောင်း မဖြေလိုက်ရဘူးလို့ကျွန်တော်တို့သိထား၇တယ်" ဟု ပြောသည်။

ယင်းသို့ကိုယ်ထိလက်ရောက်ရိုက်နှက်မှုသည် အခြေခံကျောင်းသားထုတစ်ခုလုံးအား ခြိမ်းခြောက် စိန်ခေါ်ခြင်းဖြစ်ပြီး(န.၀.တ - န.အ.ဖ) ခေတ်၏ ယုတ်ညံ့သော စွမ်းအားရှင်အဖွဲ့လုပ်ရပ်ဟု မိမိတို့ အခြေခံကျောင်းသားများသမဂ္ဂ (စစ်တွေမြို့နယ်)မှမှတ်ယူကြောင်းလည်း ထုတ်ပြန်ချက်တွင် ရေးသားထားသည်။

ဆရာဦးဇေယျာထွန်း၏ဆရာကျင့်ဝတ်နှင့် သွေဖယ်ကာ လူမိုက်ဆန်ဆန် လုပ်ရပ်အား ကျောင်းသားများသမဂ္ဂမှအပြင်းအထန် ကန့်ကွက်ရှုံ့ချထားပြီး သက်ဆိုင်ရာ တာဝန်ရှိသူများအနေဖြင့်ရိုက်နှက်ခံရသည့် ကျောင်းသားဘက်မှ ကျေနပ်မှုရရှိသည်ထိအရေးယူဆောင်ရွက်ပေးရန် တောင်းဆိုထားသည်ကို တွေ့၇သည်။

ရက္ခိုင်ပြည်ကျောင်းသားသမဂ္ဂတာဝန်ရှိလူငယ်တစ်ဦးကလည်း ပညာရေးအသိုင်းအဝန်းတွင် ဆရာဆရာမများအနေဖြင့် စည်းမျဥ်းစည်းကမ်းထက်ကျော်လွန်၍ ကျောင်းသားကျောင်းသူများအား လူပုံအလယ်အရှက်တကွဲဖြစ်စေသည့် ဖြစ်ရပ်များရှိနေပြီးလုံး၀မဖြစ်သင့်ကြောင်း ပြောဆိုသည်။

ယင်းဖြစ်စဥ်နှင့်ပတ်သက်ပြီးယင်းနေ့တွင် မြို့နယ်ပညာရေးမှူးကိုယ်တိုင်ရောက်ရှိလာပြီး စစ်ဆေးမှုတချို့ လုပ်ခဲ့သော်လည်းမည်သို့ဆက်လက်ဆောင်ရွက်ခဲ့သည်ကို မသိရှိ၇သေးပေ။

ယခုကိစ္စမှာမိဘ၊ကျောင်းသား၊ဆရာ အစစအရာရာ ပြေလည်နေပြီးသားကိစ္စဟုလည်းဆရာဦးဇေယျာထွန်းက ပြောဆိုသည်။

(NN-23)