စစ်ကောင်စီကတိုင်းရင်းသားလက်နက်ကိုင်အဖွဲ့များ(EAOs)နှင့်ဆက်စပ်သူ ၇၂ ဦး၏ တရားရုံး စစ်ဆေးဆဲအမှုများကို ပိတ်သိမ်းပြီး လွတ်ငြိမ်းခွင့်ပေးလိုက်ရာတွင်ရက္ခိုင့်တပ်တော်(AA)နှင့် ဆက်စပ်သံသယဖြင့် အမှုရင်ဆိုင်နေ၇သူ၆၁ ဦးပါဝင်ကြောင်းသိ၇သည်။

လွတ်လာသူ  ၆၁ ဦးအထဲတွင်  စစ်တွေမှ ၁၂ ဦး၊ ကျောက်ဖြူမှ ၁၀ ဦး၊ သံတွဲမှ ၁၆ဦး၊ ဘူးသီးတောင်မှ၉ ဦး၊ ကျောက်တော်မှ ၂ ဦး၊ တောင်ကုတ်မှ ၃ ဦး၊ မောင်တောမှ ၄ ဦးနှင့် အမ်းမှ ၅ဦးတို့ဖြစ်ကြောင်း ၇ခိုင်ပြည်နယ်စစ်ကောင်စီကထုတ်ပြန်ချက်တွင်ဖော်ပြသည်။

ရခိုင်ပြည်နယ် အစိုးရအာဘော်များကို ဖော်ပြသည့် ၇ခိုင်နေ့စဉ်ထုတ်ပြန်ချက်တွင်“၁ - ၈ - ၂၀၂၃ရက်နေ့တွင် ကျရောက်သည့် ဓမ္မစကြာအခါတော်နေ့ အထိမ်းအမှတ်အားဖြင့်လည်းကောင်း၊တိုင်းရင်းသားစည်းလုံးညီညွတ်ရေးနှင့် ပြည်တွင်းငြိမ်းချမ်းရေးကိုရှေးရှုသောအားဖြင့် လည်းကောင်း ရခိုင်ပြည်နယ်အတွင်းရှိတရားရုံးများတွင် တရားစွဲဆိုထားဆဲဖြစ်သော တိုင်းရင်းသား လက်နက်ကိုင်အဖွဲ့နှင့် ဆက်စပ်သူ ၆၁ဦးတို့၏ ပြစ်မှုဆိုင်ရာအမှုများကိုပိတ်သိမ်း၍ အချုပ်များမှ ယနေ့ညနေ ၆ နာရီတွင် ဖော်ပြပါမြို့နယ်များအလိုက်ပြန်လည်စေလွှတ်လိုက်ကြောင်း သတင်းရရှိသည်”ဟု ဖော်ပြထားသည်။

သူတို့ထဲတွင်မတရားအသင်းဆက်သွယ်မှုဥပဒေပုဒ်မ ၁၇(၁)၊ ၁၇(၂)အပါအဝင် နိုင်ငံတော်ဆူပူ လှုံဆော်မှုဆိုင်ရာပုဒ်မ ၅၀၅(က)ဖြင့် တရားရင်ဆိုင် နေရသူများလည်းပါကြောင်း နိရဥ္စရာက စုံစမ်းသိ၇သည်။

ယခု ၆၁ဦးထဲတွင် တောင်ကုတ်မြို့၊ ချောင်းကောက်ရပ်ကွက်မှ သွားဆရာဝန်ဒေါက်တာကျော်သူ၇ထွန်း၊ စစ်တွေမှ ဦးခင်မောင်ကျော်၊ သံတွဲမှ လူမှုရေးလှုပ်ရှားသူနှင့်တေးရေးဆရာ ကိုစန်းကို၊ ကျောက်တော်မြို့ ကဝိရတနာစစ်ရှောင်စခန်းမှအရပ်သားဆေးဆရာ ဦးကျော်ဟိန်းနှင့် ကျောက်တော်မြို့နယ် သရက်တပင်ကျေးရွာမှဦးမောင်စောသာတို့လည်း ပါဝင်ခဲ့သည်။

စစ်ကောင်စီက သြဂုတ်လ၁ ရက်တွင် တစ်နိုင်ငံလုံးရှိ အကျဉ်းထောင်၊ အချုပ်ထောင်၊ စခန်းအသီးသီးတွင်ပြစ်ဒဏ်ကျခံလျက်ရှိသော အကျဉ်းသား/သူ ရ၇၄၉ ဦးတို့ကိုလည်း ပြစ်ဒဏ် လျှော့ပေါ့ကာပြစ်ဒဏ်လွတ်ငြိမ်းခွင့်ပြုခဲ့သည်။

ယင်းအပြင် နိုင်ငံတော်သမ္မတဟောင်း ဦးဝင်းမြင့်နှင့် နိုင်ငံတော်၏ အတိုင်ပင်ခံပဂ္ဂိုလ်ဟောင်းဒေါ်အောင်ဆန်းစုကြည်တို့ကိုလည်း ပြစ်ဒဏ်များလျော့ပေါ့ သက်သာခွင့်ပြုခဲ့သည်။

အလားတူတိုင်းရင်းသားလက်နက်ကိုင် အဖွဲ့ဝင် ၂၂ ဦးကိုလည်းလွတ်ငြိမ်းခွင့်ပြုခဲ့ပြီး နိုင်ငံခြားသား အကျဉ်းသူ/သား ၁၂၅ဦးကိုလည်း ပြစ်ဒဏ်လွတ်ငြိမ်းခွင့်ပြုကာ ပြည်နှင်ဒဏ်ပေးခဲ့သည်။

နိရဉ္စရာသတင်းဌာနမှ ယမန်နေ့ ညနေကအေအေနှင့် ဆက်စပ်သံသယဖြင့် ဖမ်းဆီးခံထား၇သူ ၅၅ ဦး လွတ်မြောက်လာကြောင်း ရေးသားဖော်ပြခဲ့ပြီးနောက်ထပ် ၆ ဦးတိုးလွတ်လာသဖြင့် စုစုပေါင်း ၆၁ ဦး လွတ်မြောက်လာကြောင်း သိရှိ၇သည်။

ဓာတ်ပုံ - သြဂုတ် ၂ရက်တွင် စစ်တွေထောင်မှ လွတ်မြောက်လာသူများအားတွေ့၇စဉ်။