ရခိုင်တွင်
ရာသီဥတုအခြေအနေ ဆိုးရွားနေသဖြင့် စစ်တွေ-ကျောက်ဖြူ-ရမ်းဗြဲ-တောင်ကုတ်ဘက်သို့
ပြေးဆွဲနေသည့် ပြည်တွင်းရေကြောင်းခရီးစဉ်ကို ဖျက်သိမ်းထားကြောင်း သိရသည်။
သြဂုတ် ၈
ရက်တွင်ပြေးဆွဲမည့် စစ်တွေ-မြေပုံ-တောင်ရှည်-ကျောက်ဖြူ-ရမ်းဗြဲ-တောင်ကုတ် ခရီးစဉ်နှင့် သြဂုတ် ဂုတ် ၉
ရက်တွင်ပြေးဆွဲမည့် တောင်ကုတ်-ရမ်းဗြဲ-ကျောက်ဖြူ-တောင်ရှည်-မြေပုံ-စစ်တွေ
ခရီးစဉ်တို့ကို ဖျက်သိမ်းထားခြင်းဖြစ်သည်ဟု ရွှေပြည်တန်အမြန်ရေယာဉ်လိုင်းမှ သိရသည်။
ဖျက်သိမ်းထားသည့်ခရီးစဉ်များအနက် သြဂုတ်လ
၈ ရက်တွင် ပြေးဆွဲမည့်ခရီးစဉ်ကို သြဂုတ်လ ၉ ရက်တွင်လည်းကောင်း၊ သြဂုတ်
၉ ရက်တွင် ပြေးဆွဲမည့်ခရီးစဉ်ကို သြဂုတ် ၁ဝ ရက်တွင် လည်းကောင်း ပြောင်းလဲပြေးဆွဲသွားမည်ဟုလည်း
ရွှေပြည်တန်အမြန်ရေယာဉ်လိုင်းက ဆိုသည်။
ယခုကဲ့သို့ တစ်ရက်ရပ်နားရခြင်းမှာ
ပင်လယ်ပြင်အတွင်း လေပြင်းတိုက်ခတ်မှုများရှိနေသဖြင့်
အန္တရာယ်ကင်းရှင်းစေရေးအတွက်ဖြစ်သည်ဟု အဆိုပါရေယာဉ်လိုင်းဝန်ထမ်းတစ်ဦးက
နိရဉ္စရာကို ပြောသည်။
"ရာသီဥတု အခြေအနေမကောင်းလို့
တောင်ကုတ်ဘက်ကို တစ်ရက်နောက်ဆုတ်လိုက်တာပါ။ နောက်တစ်ရက်မှ
ထွက်မှာပေါ့။ ကျန်တဲ့ဘက်တွေ အကုန်ထွက်ပါတယ်"ဟု ဆိုသည်။
လက်ရှိ ရခိုင်တွင်
သြဂုတ် ၁ ရက်မှစတင်ကာ မိုးအဆက်မပြတ်ရွာသွန်းနေသည့်အတွက်
မြောက်ဦး၊
ကျောက်တော်၊ သံတွဲ၊ မင်းပြား၊ တောင်ကုတ် စသည့်မြို့နယ်အများအပြားတွင်
မြစ်ရေတိုးမှုနှင့်အတူ ရေနစ်မြုပ်မှုများကြောင့်
စစ်ဘေးရှောင်များနှင့် ဒေသခံများ ထောင်နှင့်ချီကာ ကုန်းမြင့်ဒေသများသို့
ရှောင်တိမ်းနေကြရကြောင်း သိရသည်။