ယနေ့ဩဂုတ်၁၃ ရက်နေ့တွင်ကျရောက်သည့်(၅၆)နှစ်မြောက် စစ်တွေဆန်ပြဿနာနေ့ဝမ်းနည်းအောက်မေ့ဖွယ်အခမ်းအနားကို စစ်တွေကျောင်းသားသမဂ္ဂရုံးတွင် ယနေ့ ကျင်းပခဲ့သည်။

"ကျွန်တော်တို့က ၇ခိုင်မှာ၁၉၆၇ ခုနှစ်က ဆန်စပါးရှားပါးပြီး အငတ်ဘေးကျရောက်ခဲ့တယ်။ ပြည်သူတွေက စစ်တွေမြို့ လမ်းပေါ်ကိုထွက်ပြီးဆန်ရရှိရေးအတွက် တောင်းဆိုဆန္ဒပြခဲ့ကြရာမှာ  ရာနဲ့ချီပြီးအသတ်ခံခဲ့ကြ၇တယ်။ ဒီဆန္ဒပြပွဲအတွင်း ကျဆုံးခဲ့ကြတဲ့ ၇ခိုင်လူမျိုးတွေအတွက်ကောင်းမှုကုသိုလ်လုပ်ပေးသလို တစ်ဘက်ကလည်း သူတို့အတွက် ဝမ်းနည်းအောက်မေ့ဖွယ် အခမ်းအနား ပြုလုပ်တာဖြစ်တယ်။ဘာသာရေး၊လူမျိုးရေးမုန်းတီးတဲ့ စိတ်နဲ့လုပ်တာမဟုတ်ဘူး" ဟု စစ်တွေတက္ကသိုလ်ကျောင်းသားသမဂ္ဂ ကိုဦးသန်းနိုင်က ပြောသည်။

၎င်းအောက်မေ့ဝမ်းနည်းဖွယ်အခမ်းအနားကို ယနေ့ နေ့လယ်တွင်အကျဉ်းချုံးကျင်းခဲ့ကြသည်ဟု သိ၇သည်။

စစ်တွေဆန်ပြဿနာနေ့သည် ၁၉၆၇ခုနှစ် ဩဂုတ် ၁၃ ရက်နေ့က ဖြစ်ပွားခဲ့ပြီး ဆန္ဒပြလူအုပ်ကြီးကို စစ်တပ်ကပစ်ခတ်၍ လူပေါင်း  ၃၀၀နီးပါး သေဆုံးခဲ့ရသည်ဟု သမိုင်းမှတ်တမ်းများအရ သိ၇သည်။

၎င်းအချိန်က တိုင်းပြည်အာဏာကိုရယူထားသည့် ဗိုလ်နေဝင်ဦးဆောင်သည့် တော်လှန်ရေး ကောင်စီအစိုးရသည် ရခိုင်ပြည်မှ ဆန်စပါးများကိုနိုင်ငံခြားတိုင်းပြည်များသို့ တင်ပို့ရောင်းချခဲ့သဖြင့် ဆန်စပါးရှားပါးပြီး ပြည်သူများစွာ အငတ်ဘေးကျရောက်ခဲ့ရာမှ မခံရပ်သည့် ပြည်သူများက စစ်တွေမြို့ လမ်းများပေါ်တက်ရောက်ဆန်ရရှိရေး တောင်းဆိုဆန္ဒပြခဲ့ကြသည်။

ပြီးခဲ့သည့်၂၀၂၂ ခုနှစ်၊ သြဂုတ်လ ၁၃ရက်နေ့ကလည်း စစ်တွေတက္ကသိုလ်ကျောင်းသားသမဂ္ဂအဖွဲ့မှစစ်တွေဆန်ပြဿနာနေ့ ဝမ်းနည်းအောက်မေ့ဖွယ်အခမ်းအနားကို ကျယ်ကျယ်ပြန့်ပြန့်ပြုလုပ်ခဲ့ပြီးယခုနှစ်တွင်ကား နိုင်ငံရေးအခြေအနေအမျိုးမျိုးကြောင်းအကျဥ်းချုပ်လုပ်ခဲ့ခြင်းဖြစ်သည်ဟု သိ၇သည်။

စစ်တွေဆန်ပြဿနာနေ့သည် ယနေ့သြဂုတ်လ၁၃ရက်နေ့တွင် (၅၆) နှစ်တိုင်ခဲ့သော်လည်း ရခိုင်လူထုတစ်ရပ်လုံးကစစ်အာဏာရှင်များ ကျူးလွန်ခဲ့ကြသည့် ရက်စက်သော လူသတ်ပွဲကြီးကိုအခုထိတိုင် မေ့မရနိုင်ဘဲ အမှတ်၇နေကြဆဲဖြစ်သည်။