မိုခါတိုက်ခတ်သွားသည်မှာ ၃ လပြည့်သွားပြီဖြစ်သော်လည်း မုန်တိုင်းသင့်ပြည်သူများ ၇၀ ရာနှုန်းခန့် အမိုးအကာအောက်သို့မရောက်နိုင်သေး

မိုခါမုန်တိုင်း၇ခိုင်ကိုတိုက်ခတ်သွားသည်မှ ယနေ့ဩဂုတ်၁၄ ရက်နေ့၌၃လပြည့်သွားပြီဖြစ်သော်လည်းမုန်တိုင်းသင့်ပြည်သူများ၏ ၇၀ ရာခိုင်နှုန်းခန့်မှာ အမိုးအကာအောက်သို့မရောက်သေးကြောင်း ရခိုင်မှ လူမူကူညီရေးပြုလုပ်နေသူများကပြောဆိုကြသည်။

အဓိကမုန်တိုင်းဒဏ်ခံ၇သည့် စစ်တွေ၊ ပုဏ္ဏားကျွန်း၊ ၇သေ့တောင်၊ကျောက်တော်၊ မြေပုံ၊ မင်းပြား၊ ပေါက်တော၊ ဘူးသီးတောင်၊ မောင်တော၊ အမ်း၊ရမ်းဗြဲ စသည့်မြို့နယ်များတွင် လုံခြုံသည့် အမိုးအကာ အောက်သို့ရောက်ရှိရန် အခက်အခဲများရှိနေသေးသည်ဟု ဆိုကြသည်။

ကျောက်တော်မြို့နယ်၊ အပေါက်၀လူငယ်များအစည်းအရုံးမှအဖွဲ့ဝင်အမျိုးသမီးတစ်ဦးက “ကျောက်တော်ဘက်တွေမှာဆိုရင်မိုခါပြီးလို့ ပြန်ပြီးတည်ဆောက်နိုင်တာက ၂၅ ရာခိုင်နှုန်းလောက်သာရှိသေးတယ်။ များသောအားဖြင့်က တာပေါ်လင်စတွေနဲ့ ယာယီတည်ဆောက်ထားတဲ့ နေရာတွေမှာ မလုံတလုံ မိုးထားတာလောက်နဲ့ပဲနေနေ၇တယ်။ ပြောရရင်ဟိုက်ဝေးလမ်းထက်ဝေးတဲ့ ယိုချောင်းဖက်တွေမှာဆို လုံး၀ ပြန်ပြီး မလုပ်၇သေးတာများတယ်” ဟုပြောသည်။

အမိုးအကာမရောက်သေးသည့်နေရာများသည်သတင်းအချက်အလက် မစီးဆင်းနိုင်သည့် နေရာများဖြစ်သည့်အပြင်ထောက်ပံ့ကူညီရေးအဖွဲ့များနှင့် အချိတ်အဆက်မမိသည့် နေရာများ ဖြစ်ကြောင်း ၎င်းက ဆက်ပြောသည်။

“နဂိုကတည်းကသူတို့ဆီမှာ သတင်းအချက်လက်တွေလည်း မရောက်တော့ စားဝတ်နေရေးနဲ့ ပတ်သက်ပြီးအခက်ခဲရှိတယ်။ အခုက ပိုပြီးတော့မှခက်ခဲတယ်လို့ပြောလို့၇ပါတယ်။ နောက်တစ်ခုက မျိုး စပါးတွေပျက်သွားတယ်။သူတို့ဘက်မှာက ဥယျာဉ်လုပ်စားတယ်။ အပင်တွေ ပျက်စီးမှုရှိတယ်ဆိုတော့စားဝတ်နေရေးကလည်း အဆင်မပြေဘူး” ဟုပြောသည်။

လက်ရှိမြေပြင်တွင်အကူညီကယ်ဆယ်ရေးလုပ်ငန်းတချို့ကို ရက္ခိုင်တပ်တော့် (AA)က ထောက်ပံ့မှု ပြုလုပ်နေသော်လည်းမုန်တိုင်းကြောင့်ထိခိုက်ပျက်စီးမှုများသည့်အတွက် AA ကလည်း အားလုံး လွှမ်းခြုံနိုင်အောင်ထောက်ပံ့နိုင်ခြင်းမရှိကြောင်း အရပ်ဘက်အဖွဲ့အစည်းများက ထောက်ပြကြသည်။

ရသေ့တောင်မြို့နယ်ရှိ အရပ်ဘက်အဖွဲ့အစည်းတစ်ခုမှလူငယ်တစ်ဦးက “ရွာတွေကလည်းများတော့ သူတို့တွေကလည်းအကုန်လုံးကို မရောက်နိုင်ဘူး။ ရသေ့တောင်ဆိုရင် တစ်နယ်လုံး ပျက်စီးသွားတယ်ဆိုတော့အကုန်လုံးကို လက်လှမ်းမမီတာလည်းပါတယ်” ဟု ဆိုသည်။

လက်တွေ့မြေပြင်တွင် စစ်ကောင်စီ၏ပြန်လည်ထူထောင်ရေးလုပ်ငန်းများ အားနည်းပြီး ဒေသတွင်း အမိုးအကာ အောက်မရောက်သေးသည့် ဒေသခံများစွာရှိနေသေးသည်ဟု ကာယကံရှင်များနှင့်လူမှုအဖွဲ့အစည်းများကပြောကြသည်။

စစ်ကောင်စီအနေဖြင့် ၇ခိုင်ပြည်နယ်မှမြို့နယ် (၁၇)မြို့နယ်စလုံးအား သဘာ၀ ဘေးအန္တရာယ် ကျရောက်သည့်ဒေသများအဖြစ် ကြေညာခဲ့ပြီး မုန်တိုင်းတိုက်ပြီး ၂ လအတွင်း ပြန်လည် ထူထောင်ရေးလုပ်ငန်းများအားအရှိန်အဟုန်မြှင့်တင်ဆောင်ရွက်သွားမည်ဖြစ်ကြောင်း ထုတ်ပြန်ခဲ့သည်။

သို့သော် မုန်တိုင်းသင့်ဒေသများအား နိုင်ငံတကာ အဖွဲ့အစည်းများနှင့် လူမှုကူညီရေး အဖွဲ့အစည်းများအား ကူညီထောက်ပံ့ပေးအား စစ်ကောင်စီက ဇွန်လ ၇ ရက်မှစတင်ကာပိတ်ထားခဲ့ခြင်းဖြစ်သည်။

ယင်းအပေါ်တွင်ကုလသမဂ္ဂ လူသားချင်းစာနာမှုဆိုင်ရာညှိနှိုင်းရေးရုံး (UNOCHA)ကစစ်ကောင်စီ၏ ပိတ်ပင်မှုအားစိုးရိမ်ကြောင်း ဇွန်လ ၉ ရက်က ထုတ်ပြန်ခဲ့သည်။

မုန်တိုင်းသင့်ပြည်သူများ၏ဘ၀ ပြန်လည်ထူထောင်လာနိုင်ရေးသွားလာကူညီခွင့်ပေးရန်လည်း နိုင်ငံတကာအဖွဲ့အစည်းများကအကြိမ်ကြိမ်တောင်းဆိုလျက်ရှိသည်။

မုန်တိုင်းသင့် ဒေသကပြည်သူများအနေဖြင့် လက်ရှိအချိန်ထိ ပြန်လည်ထူထောင်ရေးပိုင်းတွင် ထိထိရောက်ရောက်လုပ်ဆောင်နိုင်ဖို့ နိုင်ငံတကာ အကူအညီရရှိမှု လိုအပ်နေဆဲဖြစ်သည်။

ပြီးခဲ့သည့် ဇူလိုင်လအစောပိုင်းတွင် စစ်ကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကိုယ်တိုင်စစ်တွေ၊ ဘူးသီးတောင်နှင့် ရသေ့တောင်မြို့နယ်များသို့သွားရောက်ကာမုန်တိုင်းသင့်ပြည်သူများ၏ ပြန်လည်ထူထောင်ရေးလုပ်ငန်းများ အောင်မြင်နေပြီဟုဆိုခဲ့သည်။

သို့ရာတွင် မြေပြင်တွင် ထိုသို့ မဟုတ်ဘဲမုန်တိုင်းသင့်ပြည်သူများမှာမည်မည်ရ၇ မည်သည့် အကူအညီမှ စစ်ကောင်စီထံမှ တစ်စုံတစ်ရာ မ၇ဘဲ အခက်အခဲအကျပ်အတည်းများဖြင့် ရင်ဆိုင်နေကြ၇ပြီး ပြည်သူအများစုမှာလည်း အိမ်များကိုပြန်မပြင်ဘဲ ဖြစ်နေကြ၇သည်။

မိုခါမုန်တိုင်းသည်ပြီးခဲ့သည့် မေလ ၁၄ ရက်ကတိုက်ခတ်သွားခဲ့ခြင်းဖြစ်ပြီး ၇ခိုင်မှ လူပေါင်း ၁၄၈ဦးသေဆုံးပြီး အဆောက်အအုံပေါင်း သိန်းနှင့်ချီ ပျက်စီးဆုံးရှုံးခဲ့၇သည်။

ကျွဲနွားတိရစ္ဆာန်များ ကောင်ရေသောင်းနှင့်ချီထိခိုက်သေဆုံးကာ လယ်ယာမြေအများအပြားလည်း ဆားငန်ရေဝင်ရောက်ပျက်စီးခဲ့သလိုလယ်သမားများတွင် သိုလှောင်ထားသည့် မျိုးစပါးများလည်းထိခိုက်ပျက်စီးဆုံးရှုံးသွားခဲ့၇သည်။

ဆက်စပ် အကြောင်းအရာများ

နောက်ဆုံးရသတင်းများ