ကျောက်ပူတင်းငါး (Flatfish Sole) (ဒေသအခေါ်ငါးသံ)သည် ရခိုင်ဒေသတွင် ဈေးကွက်မရှိသော်လည်း တရုတ်နိုင်ငံသို့တင်ပို့ရန်ဈေးကောင်းပေး ဝယ်ယူနေကြသည့်အတွက် ရခိုင်၌ ဖမ်းဆီးရှာဖွေမှုများတွင်ကျယ်လာနေသည်ဟု သိရသည်။

ပြည်တွင်းစားသုံးသူဈေးကွက်မရှိသော်လည်း တရုတ်စားသုံးသူဈေးကွက်၌တွင်တွင်ကျယ်ကျယ်ရှိသည့် အတွက် ငါးတင်ပို့ရေးလုပ်ငန်းရှင်များကဈေးကောင်းပေး ဝယ်ယူကြကြောင်းဂွမြို့မှ ကျောက်ပူတင်းငါးအဝယ်ဒိုင်လုပ်ငန်းရှင်ဦးဖေပုက နိရဥ္စရာသို့ပြောသည်။

"ပုံမှန်အားဖြင့်ဆိုရင် စက်တင်ဘာလဆန်းပိုင်းကနေနှစ်ကုန်တဲ့အထိဖမ်းကြတယ်။ အဲဒီအချိန်တွေမှာ ငါးက တက်တယ်။ဒါပေမယ့် အရင်နှစ်ကရာသီမှာ ငါးဖမ်းစက်လှေတစ်စင်းကို သိန်းထောင်နဲ့ချီ၇သွားကြတော့ဒီနှစ်မှာ လုပ်ငန်း ၄၀ ရာခိုင်နှုန်းလောက်က အခုဩဂုတ်လထဲကပဲဖမ်းနေကြပြီပေါ့လေ" ဟု ပြောသည်။

အဆိုပါကျောက်ပူတင်းငါးကို ပြီးခဲ့သည့်နှစ်တွင်အဝယ်ဒိုင်များက တစ်ပိဿာလျှင် ကျပ် ၁၀၀၀၀ မှ ၁၃၀၀၀ ကျပ်အထိဈေးပေးဝယ်ယူပြီး ရန်ကုန်ဈေးကွက်သို့ပို့ကာ ယင်းမှတဆင့် တရုတ်ဈေးကွက်သို့ တင်ပို့ခြင်းဖြစ်ကြောင်း သိ၇သည်။

အဆိုပါငါးကို ၇ခိုင်တွင်ပြီးခဲ့သည့် ၂၀၁၉ ခုနှစ်ခန့်မှစတင်ကာ တရုတ်နှင့် ထိုင်းထုတ် ကော်ချောင်းပိုက်များသုံး၍တွင်တွင်ကျယ်ကျယ်ဖမ်းဆီးလာခြင်းဖြစ်ပြီး သံတွဲ၊ ကျိန္တလီ၊ဂွကမ်းခြေတစ်လျှောက်ရှိ ကမ်းနီးငါးဖမ်းစက်လှေများ၏ ၈၀ ရာခိုင်နှုန်းမှာကျောက်ပူးတင်း ငါးဖမ်းလုပ်ငန်းကို လုပ်ကိုင်ကြောင်းဦးဖေပုက ပြောသည်။

"လွန်ခဲ့တဲ့ လေးနှစ်လောက်ကပဲဒီလုပ်ငန်းကို လုပ်လာကြတာပေါ့။ ဟိုးအရင်ကဆိုတော့ ခေတ်မီငါးဖမ်းကိရိယာတွေလည်းမရှိ၊ ငါးတွေရဲ့တည်နေရာကိုလည်း မသိကြတော့ အများအစားမဖမ်းနိုင်ခဲ့ကြဘူး"ဟု ပြောသည်။

တရုတ်နှင့် ယိုးဒယား (ထိုင်း)ထုတ် ကော်ချောင်းပိုက်များကိုဧရာ၀တီတိုင်း၊ ပုသိမ်မြို့နယ်မှ ပိုက်ထိုးလုပ်ငန်းများထံသုံးထပ်ပိုက်ပုံစံပြန်ဆင်ပြီး ကမ်းခြေနှင့် ရေမိုင် ၂၀ဝန်းကျင်ခန့်ရှိသည့် ကျွန်းနှင့်၊ သန္တာကျောက်တန်းများတစ်ဝိုက်တွင်ပိုက်ချသွယ်တန်းဖမ်းဆီးကြခြင်းဖြစ်သည်။

ငါးဖမ်းစက်လှေတစ်စင်းတွင် ရေလုပ်သားအနည်းဆုံး၆ ဦးရှိပြီး အရှည်ပေ ၁၄၀ ခန့်ရှိသည့် ငါးဖမ်းပိုက် အလက် ၃၀ မှ ၈၀ခန့်အထိ အသုံးပြုကြောင်း သိရသည်။

ငါးဖမ်းစက်လှေမှ ရေလုပ်သားများမှာလည်း စက်လှေပိုင်ရှင်အတွက်သတ်မှတ်ထားသည့် ဝေစုခွဲထုတ်ကာကျန်သည့်ဝေစုကို အချိုးကျရရှိကြသဖြင့် ငါးများများရရှိလေ ဝင်ငွေပိုကောင်းလေ ဖြစ်ကြောင်း ဂွမြို့နယ်၊ရဟိုင်ကူးတို့ကျေးရွာမှ ဒေသခံရေလုပ်သားတစ်ဦးက ပြောသည်။

"သာမန်အားဖြင့်ရရှိတဲ့ငါးကို သုံးပုံပုံပြီး နှစ်ပုံကို စက်လှေပိုင်ရှင်အတွက်ခွဲပြီးကျန်တစ်ပုံကို လုပ်သားတွေက ခွဲယူရလေ့ရှိတယ်။ ငါးအများရရင်ပိုင်ရှင်အတွက်လည်းကောင်းပြီး လုပ်သားတွေအတွက်လည်း အဆင်ပြေတာပေါ့။မနှစ်ကဆိုရင် စက်လှေတစ်စင်းကို သိန်းထောင်နဲ့ချီ၇လိုက်ကြတယ်" ဟုပြောသည်။

၄င်းတို့၏ရဟိုင်ကူးတို့ကျေးရွာတွင်လည်း ကမ်းနီးငါးဖမ်းစက်လှေ အစင်း ၃၀ ခန့်ရှိရာ အစင်း ၁၀ခန့်မှာ ကျောက်ပူတင်း ငါးဖမ်းလုပ်ငန်း စတင်လုပ်ကိုင်နေကြပြီဟု သူက ပြောသည်။

ကျောက်ပူတင်းငါးမှာ သန္တာကျောက်တန်းများအနီးနေထိုင်သည့် ငါးတစ်မျိုးဖြစ်ပြီး ပုံမှန်အားဖြင့် စက်တင်ဘာလဆန်းပိုင်းမှဒီဇင်ဘာလအထိ ဖမ်းဆီးနိုင်ကြောင်း သိရသည်။

ကျောက်ပူတင်ငါးကို ရခိုင်ဒေသအခေါ်ငါးသံဟုခေါ်ရခြင်းမှာ အဆိုပါငါး၏အရေခွံမှာ ဓားနှင့်ခုတ်၍မပေါက်အောင်အလွန်မာကျောသောကြောင့်ဟု ဒေသခံရေလုပ်သားများက ပြောသည်။

လက်ရှိတွင်မိုးနှောင်းပိုင်းရောက်ရှိလာပြီး ဈေးကောင်းရသည့်ကျောက်ပူတင်းငါးဖမ်းရာသီလည်း ရောက်ရှိလာပြီဖြစ်၍အဆင်ပြေပြေဖမ်းနိုင်ရေးနှင့် စီးပွားရေး၊ စားဝတ်နေရေးများပိုမိုချောင်လည်လာရန် ရခိုင်ကမ်းနီးငါးဖမ်းလုပ်ငန်းရှင်များနှင့်ရေလုပ်သားများက လိုလားနေကြခြင်းဖြစ်သည်။