ကုန်ကြမ်းပစ္စည်းများ ဈေးအဆမတန်မြင့်တက်နေ၍ ရခိုင်ဖိုင်ဘာစက်လှေလုပ်ငန်း ရပ်နားနိုင်ခြေရှိ

ဖိုင်ဘာစက်လှေပြုလုပ်ရာတွင်အသုံးပြုသည့်ကုန်ကြမ်းပစ္စည်းများပြတ်လပ်ကာ ဈေးနှုန်းအဆ မတန်မြင့်တက်နေ၍ ရခိုင်ဖိုင်ဘာစက်လှေလုပ်ငန်းများ၏ကုန်ထုတ်လုပ်မှုအပိုင်းတွင် အခက်ခဲကြုံနေရပြီး လုပ်ငန်းရပ်နားထားရမည့်အခြေအနေရှိနေကြောင်း သိရသည်။

၇ခိုင်မှ ဖိုင်ဘာစက်လှေလုပ်ငန်းများအနေဖြင့်ထိုင်း-မြန်မာနယ်စပ် မြ၀တီမြို့မှတင်သွင်းလာသည့် ကုန်ကြမ်းပစ္စည်းများအားရန်ကုန်မှတဆင့်မှာယူနေရခြင်းဖြစ်ပြီး ယခုလထဲတွင် ကုန်ကြမ်းပစ္စည်းများ ပြတ်လပ်ကာဈေးနှုန်းအဆမတန်မြင့်တက်နေခြင်းဖြစ်ကြောင်း လုပ်ငန်းရှင်များကပြောသည်။

မြ၀တီ-ကော့ကရိတ် အာရှလမ်းမကြီးမြေပြိုပျက်စီးနောက် ပြည်တွင်းသို့ကုန်ကြမ်းပစ္စည်း မတင်သွင်းနိုင်ဘဲရှိရာရန်ကုန်မှတဆင့်မှာယူရသည့် လက်ကျန်ကုန်ပစ္စည်းများမှာလည်း ဈေးအဆမတန်မြင့်တက်နေသည်ဟုမြေပုံမြို့နယ်၊ သရက်တောင်ကျေးရွာမှ ဖိုင်ဘာစက်လှေလုပ်ငန်းရှင်ဦးမောင်သန်းမြင့်ကပြောသည်။

"ကျွန်တော်တို့အခုလက်ရှိလုပ်နေရတဲ့အခြေအနေမှာဆိုရင်ပစ္စည်းတွေကိုမှာယူလို့မရတဲ့အခြေအနေဖြစ်နေပါတယ်။ကျွန်တော်တို့မှာက ပစ္စည်းတွေက ပြည်ပကလာတာတွေကို ရန်ကုန်ကတဆင့်ဝယ်ယူနေရတယ်လေ။အာရှလမ်းမကြီး ပိတ်သွားပြီးနောက်ပိုင်းနိုင်ငံခြားက တင်သွင်းတဲ့ပစ္စည်းဖြစ်လို့ပစ္စည်းဈေးကအဆမတန်တက်နေပါတယ်" ဟု ပြောသည်။

မြေပုံမြို့နယ်တစ်ခုလုံးတွင် ဖိုင်ဘာစက်လှေလုပ်ငန်းရ ခုခန့်အထိရှိပြီး ပြီးခဲ့သည့် ၂၀၁၇ ခုနှစ်ခန့်မှစ၍ ဒေသတွင်း ရေလုပ်ငန်းများ အတွက်စက်လှေများကို အဓိကထုတ်လုပ်ရောင်းချနေခြင်းဖြစ်ကြောင်း သိရသည်။

ဖိုင်ဘာစက်လှေပြုလုပ်ရာတွင်Resin ကော်ရည်၊ Mat လိပ်(ဖျင်လိပ်)၊ Hadanerခြောက်ဆေးရည်၊ Monomerဆေးရည်၊ကျောက်မှုန့်၊ ဖယောင်းတို့အပါအဝင် ကုန်ကြမ်းပစ္စည်းစုစုပေါင်း ၁၃ မျိုးခန့်အသုံးပြုရပြီးယင်းပစ္စည်းများအားလုံးမှာ ဈေးအဆမတန်မြင့်တက်နေခြင်းဖြစ်ကြောင်းသိရသည်။

ယင်းအထဲမှ ဖိုင်ဘာစက်လှေပုံသွင်းသွန်းလောင်းရာတွင်ကနဦးအဆင့်ကုန်ကြမ်းပစ္စည်းများဖြစ်သည့် Resin ကော်ရည်တစ်ပေပါကို ဇူလိုင်လအတွင်းက ၁ရသိန်းခွဲရှိရာမှ ယခုဩဂုတ်လတွင် ၂၂ သိန်းကျော်၊ Mat ၄၅၉ (ဖျင်လိပ်) တစ်လိပ်မှာ ယခင်လက၁၇၀၀၀၀ ကျပ်ရှိရာမှလက်ရှိတွင် ၂ သိန်းကျော်ထိဈေးမြင့်နေကြောင်းသိရသည်။

ကုန်ကြမ်းပစ္စည်းများအဆမတန်ဈေးနှုန်းမြင့်တက်မှုကိုလိုက်၍စက်လှေများကို ဈေးနှုန်းမြှင့် ရောင်းရန်လည်းဒေသအခြေအနေအရမဖြစ်နိုင်သည့်အတွက် လက်ကျန်ကုန်ပစ္စည်းများ ကုန်လျှင် လုပ်ငန်းရပ်နားထားရမည့် အခြေအနေရှိကြောင်းမြေပုံမြို့နယ်၊ သဝင်စေ့ကေကျေးရွာမှ M ဖိုက်ဘာစက်လှေလုပ်ငန်းရှင်ကိုဇော်မင်းဦးက ပြောသည်။

"အခုက ကုန်ကြမ်းပစ္စည်းဈေးကြောင့်တစ်လမှာ စက်လှေလေးငါးစီးလုပ်ဖို့တောင် မလွယ်တော့ဘူး။ သုံးလေးစီးပဲလုပ်ပြီးရပ်နားနေရတာတွေရှိတယ်။ လက်ထဲမှာရှိတဲ့ ကုန်ပစ္စည်းနဲ့ပဲလုပ်နေရတယ်။ကျွန်တော်တို့လက်ထဲမှာရှိတဲ့ ကုန်ပစ္စည်းတွေ ကုန်တာနဲ့ရပ်နားထားရမယ့်အခြေအနေရှိနေတယ်" ဟု ပြောသည်။

လက်ရှိဖိုင်ဘာစက်လှေများကို အရှည်ပေ ၃၀ တစ်စင်းလျှင် ၂၆ သိန်း၊ ၂၅ ပေတစ်စင်းကို ၁၈ သိန်းအစရှိသဖြင့် စက်လှေအရွယ်အစားအလိုက်ရောင်းချနေရပြီး ဒေသတွင်းရေလုပ်ငန်းများက အဓိကဝယ်ယူကြကြောင်းလုပ်ငန်းရှင်များက ပြောသည်။

M ဖိုင်ဘာစက်လှေလုပ်ငန်းရှင်ကိုဇော်မင်းဦးက "အခုကုန်ပစ္စည်းတွေ မှာယူလို့မရသလိုဈေးလည်း အရမ်းကြီးတော့စက်လှေတွေရောင်းတဲ့အခါ ဝယ်သူတွေမနည်းပြောပြပြီးတော့ဈေးနှုန်းနည်းနည်းမြှင့်ရောင်းနေရပါတယ်။ ဒါပေမယ့်ဆက်ပြီး ကုန်ပစ္စည်းဈေးတွေ ဆက်ကြီးနေမယ်ဆိုရင် အဲဒီဈေးနှုန်းကိုလိုက်ပြီးဈေးမြှင့်ရောင်းဖို့က မဖြစ်နိုင်ဘူးလေ။ တချို့ဒီမှာရှိတဲ့လုပ်ငန်းတွေကလည်း ရပ်နားထားဖို့စဉ်းစားနေကြတယ်လို့ ကျွန်တော်တို့ကိုပြောတာရှိတယ်"ဟုပြောသည်။

ဖိုင်ဘာစက်လှေများသည်သစ်သားလှေလောက် ပြုပြင်ထိန်းသိမ်းစရာမလိုဘဲ တာရှည်ခံသုံးနိုင်သည့် အတွက် ရခိုင်ဒေသတွင် သစ်ထွင်းလှေများနေရာတွင်ဖိုက်ဘာစက်လှေများကို အစားထိုးကာ တွင်တွင်ကျယ်ကျယ်အသုံးပြုလာကြခြင်းဖြစ်သည်။

ရခိုင်ပြည်နယ်အတွင်းမြောက်ဦး၊ မင်းပြားနှင့် မြေပုံမြို့နယ်တို့တွင် ဖိုင်ဘာစက်လှေများကိုအဓိကထုတ်လုပ်နေခြင်းလည်း ဖြစ်သည်။

ဩဂုတ်လ ရရက်က မိုးသည်းထန်စွာရွာသွန်းပြီး တောင်ကျရေစီးဆင်းမှုကြောင့်မြ၀တီ-ကော့ကရိတ်အာရှလမ်းမကြီး၏ တောနော်ရေတံခွန်အနီးရှိ လမ်းပိုင်းပြိုကျပျက်စီးပြီးနောက်သွားလာခွင့် ပိတ်ထားရာကုန်ပစ္စည်းများတင်သွင်းမှုလည်း ရပ်တန့်နေခဲ့ခြင်းဖြစ်သည်။

ပြိုကျပျက်စီးခဲ့သည့်အဆိုပါလမ်းပိုင်းနေရာတွင်ယနေ့ဩဂုတ်လ ၂၅ ရက်၌ ဘေလီတံတားခင်းခြင်း လုပ်ငန်းဆောင်ရွက်ပြီးစီးပြီဖြစ်၍လမ်းပြန်ဖွင့်ပြီး ယာဉ်ကြီး၊ ယာဉ်ငယ်များ ဖြတ်သန်းသွားလာနေပြီ ဖြစ်ကြောင်း သိ၇သည်။

ဓာတ်ပုံ -မြေပုံမြို့နယ်၊ သဝင်စေ့ကေကျေးရွာမှ M ဖိုက်ဘာစက်လှေလုပ်ငန်းကိုတွေ့၇စဉ်/ မျိုးမင်းဦး

ကုန်ကြမ်းပစ္စည်းများ ဈေးအဆမတန်မြင့်တက်နေ၍ ရခိုင်ဖိုင်ဘာစက်လှေလုပ်ငန်း ရပ်နားနိုင်ခြေရှိ

ဆက်စပ် အကြောင်းအရာများ

နောက်ဆုံးရသတင်းများ