ရခိုင်ပြည်နယ်၊ ဘူးသီးတောင်မြို့နယ်တွင်အာဆာ (ARSA) အကြမ်းဖက်အဖွဲ့က မွတ်ဆလင်ရပ်မိရပ်ဖ ၁ ဦးကို  ဖမ်းဆီးသတ်ဖြတ်လိုက်သည်ဟုဒေသခံများက ပြောသည်။

အသတ်ခံရသူမှာဘူးသီးတောင်မြို့နယ်မြောက်ပိုင်းရှိ မီးကျောင်းခေါင်းဆွဲကျေးရွာမှ အသက် ၆၀ကျော်အရွယ် ရပ်မိရပ်ဖ ဦးမာမတ်ရူရ်ကူရ်းဖြစ်သည်။

သူသည် ပြီးခဲ့သည့်စက်တင်ဘာလ ၉ ရက်၊ ညအချိန်တွင် ကျေးရွာအတွင်းရှိ နေအိမ်မှ ARSA အဖွဲ့ဝင်များ၏ဖမ်းဆီးခြင်းကိုခံခဲ့၇သည်ဟု ဒေသခံများက ပြောသည်။

နောက်တစ်နေ့စက်တင်ဘာလ ၁၀ ရက်တွင် သေဆုံးနေပြီဖြစ်သည့်သူ၏ရုပ်အလောင်းကိုရွာနှင့်မနီးမဝေးရှိ မောင်နှမတောင်အနီးတွင် ဒေသခံများက တွေ့ရှိခဲ့ခြင်းဖြစ်သည်ဟုဒေသခံတစ်ဦးက ပြောသည်။

“သူက ရပ်မိရပ်ဖပေါ့။သူက ရွာမှာ သြဇာအာဏာရှိတယ်လေ။ အဲလိုဆိုတော့ သူ့ကို သူတို့က စည်းရုံးလိမ့်မယ်။ပိုက်ဆံလည်း တောင်းလိမ့်မယ်။ သူက အာဆာကိုမထောက်ခံဘူးပေါ့။မထောက်ခံဘူးဆိုတော့ သူတို့က အာဆာ ကအဲလိုလူမျိုးတွေကို လုံး၀ကို မကျေနပ်ဘူးလေ။ ဒါကြောင့် သတ်ပစ်တာ”ဟု ပြောသည်။

ဦးမာမတ်ရူရ်ကူရ်းကို သေနတ်ဖြင့်ပစ်သတ်ခြင်း မဟုတ်ဘဲဓားဖြင့်ထိုးသတ်ခဲ့ခြင်း ဖြစ်သည်ဟု ကျေးရွာသားများက ပြောဆိုသည်။

နောက်ထပ်ဒေသခံမွတ်ဆလင်တစ်ဦးက “သူ့မှာသေနတ်ဒဏ်ရာတော့ မပါဘူး။ ဓားနဲ့ ထိုးသတ်ခံ၇တာ”ဟု ပြောသည်။

အသတ်ခံလိုက်ရသူ၏အလောင်းကို ယမန်နေ့ကနေ ဒေသခံများကသင်္ဂြိုလ်လိုက်ပြီဟု သိရသည်။

အာဆာအဖွဲ့သည် စစ်ကောင်စီတပ်နှင့် နားလည်မူ ရယူကာ ဘူးသီးတောင်နှင့် မောင်တောမြို့နယ်များတွင်ကျယ်ကျယ်ပြန့်ပြန့် လှုပ်ရှားနေကြောင်း သတင်းများ ထွက်ပေါ်နေပြီး စစ်တပ်က ၎င်းအဖွဲ့၏လှုပ်ရှားမှုများအပေါ် တစ်စုံတစ်ရာ အရေးယူဆောင်ရွက်ခြင်း မရှိကြောင်း သေခံများက ပြောဆိုသည်။

ယခုကဲ့သို့ ရပ်မိရပ်ဖတစ်ဦး အသတ်ခံလိုက်ရသည့်အတွက်ဒေသခံများအကြား စိုးရိမ်မှု မြင့်တက်လျက် ရှိသည်ဟုလည်းသိရသည်။

ARSA အကြမ်းဖက်အဖွဲ့သည်ဘင်္ဂလားဒေ့ရှ်နိုင်ငံရှိ ဒုက္ခသည်စခန်းများတွင် ခြေကုပ်ယူထားခြင်း ဖြစ်ပြီး  ယခုနောက်ပိုင်းတွင် ဘင်္ဂလားဒေ့ရှ်အာဏာပိုင်များကဖော်ထုတ်ဖမ်းဆီးအရေးယူမှုများပြုလုပ်လာနေ၍ ရခိုင်ပြည်၊မောင်တောနှင့် ဘူးသီးတောင်မြို့နယ်များသို့ စိမ့်ဝင်လှုပ်ရှားလာနေကြခြင်းဖြစ်သည်ဟုသိရသည်။

မောင်တောနှင့် ဘူးသီးတောင်မြို့နယ်များတွင်စခန်းချနေထိုင်ခြင်း၊ မွတ်ဆလင်ကျေးရွာများကို လက်နက်ပြပြီးစည်းရုံးရေးဆင်းခြင်း၊ မွတ်ဆလင်စီးပွားရေးလုပ်ငန်းရှင်အချို့ ပြန်ပေးဆွဲခြင်း၊ငွေညှစ်တောင်းခံခြင်းများကိုလည်း ပြုလုပ်လျက်ရှိသည်ဟု သိ၇သည်။

(NN-16)

Photo by Asia Times