ရခိုင်ပြည်နယ်၊ကျောက်တော်မြို့တွင် မတရားအသင်းဆက်သွယ်မှုပုဒ်မ ၁၇(၁)ဖြင့် တရားစွဲခံထားရသည့် အရပ်သား  ရ ဦး၏ အမှုကို ကျောက်တော်မြို့နယ် စစ်ကောင်စီတရားရုံးက  စက်တင်ဘာလ ၂၁ ရက်သို့ရုံးချိန်းထပ်ရွှေ့ခံလိုက်ရသည်ဟု သိ၇သည်။

အဆိုပါအမှုတွင်ပါဝင်သူ ၇ဦးကို ယနေ့စက်တင်ဘာလ ၁၃ ရက်၊ နံနက် ၁၁ နာရီက ကျောက်တော်မြို့နယ် တရားရုံးတွင် ရုံးထုတ်ခဲ့ခြင်းဖြစ်ပြီး စစ်ကောင်စီ မြို့နယ်တရားသူကြီးဖြစ်သည့် ဦးအောင်ကျော်သူကလိုပြသက်သေမရောက်ဟုဆိုကာ စစ်ဆေးခဲ့ခြင်းမရှိဘဲ လာမည့်စက်တင်ဘာလ၂၁ ရက်နေ့သို့ ရုံးချိန်းထပ်ရွှေ့လိုက်ခြင်းဖြစ်သည်။

တရားစွဲခံထားရသူ ရဦးနှင့်နီးစပ်သူတစ်ဦးက "မြို့နယ်တရားသူကြီးက လိုပြသက်သေ မရောက်ဘူးလို့ ပြောပါတယ်။ အဲ့ဒါနဲ့ရုံးချိန်းထပ်ရွှေ့လိုက်ပါတယ်။ ဒီလိုပဲ ရုံးချိန်းရွှေ့ခံနေရတာကမကောင်းဘူးပေါ့" ဟု ပြောသည်။

မတရားအသင်းဆက်သွယ်မှုပုဒ်မ၁၇(၁)ဖြင့် တရားစွဲခံထားရသူများမှာ မင်းပြားမြို့နယ်မှ အပျော်တမ်းဓာတ်ပုံဆရာ ဦးစောမိုးကျော်၊ ကျောက်တော်မြို့နယ်၊၀ပြန်ကျေးရွာမှ ကိုမောင်သန်းဌေးနှင့် ကိုမောင်ထွန်းလှိုင်၊ပုဏ္ဏားကျွန်းမြို့နယ်၊ ရဲရိုးပြင်ကျေးရွာမှ ဦးသန်းစိုး၊အောင်ဖြူပြင်ကျေးရးရွာမှ ကိုမျိုးဦး၊ မြေပုံမြို့နယ်၊ အငူကျေးရွာသစ်မှကိုမောင်ချေ(ခ)မောင်မျိုးကို၊ မြောက်ဦးမြို့၊ မဟိန်ဂျီရပ်ကွက်မှကိုကျော်မောင်လင်းတို့ဖြစ်သည်။

သူတို့သည်ပြီးခဲ့သည့် ၂၀၂၂ ခုနှစ်က တကျော့ပြန်တိုက်ပွဲကာလအတွင်းကျောက်တော်မြို့နယ်အတွင်းရှိ စစ်ကောင်စီ၏စစ်ဆေးရေးဂိတ်အသီးသီးတွင်ဖမ်းဆီးခံခဲ့ရခြင်းဖြစ်သည်။

ထိုသို့ဖမ်းဆီးခံရပြီးနောက် ရက္ခိုင့်တပ်တော်(AA)နှင့်ဆက်စပ်သည်ဟုဆိုကာ မတရားအသင်း ဆက်သွယ်မှုပုဒ်မ ၁၇(၁)ဖြင့် တရားစွဲဆိုထားခြင်းဖြစ်သည်။

လက်ရှိတွင် ၎င်းတို့ကိုကျောက်တော်မြို့မ ရဲစခန်းတွင် ချုပ်နှောင်ထားသည်ဟုလည်း သိရသည်။

ရုံးချိန်းများကိုအကြိမ်ကြိမ်ရွှေ့ဆိုင်းခံနေရသည့်အတွက် မတရားဖမ်းဆီးခံနေရသူများမှာနစ်နာမှုများရှိသည်ဟုလည်း သိ၇သည်။ (NN-12)

ဓာတ်ပုံ - ArakanNews