ရွေးကောက်ပွဲအနိုင်ရ MFP ပါတီခေါင်းဆောင် အဖြစ်မှ ပီတ လင်မ်ဂျာရွန်ရတ် နှုတ်ထွက်

ပြီးခဲ့သည့် ထိုင်းရွေးကောက်ပွဲတွင် အမတ်ဦးရေအများဆုံးဖြင့် အနိုင်ရခဲ့သော Move Forward Party ခေါင်းဆောင် ပီတလင်မ်ဂျာရွန်ရတ် က ပါတီခေါင်းဆောင်အဖြစ်မှ နှုတ်ထွက်လိုက်ပြီဖြစ်ကြောင်း သူ၏ Facebook စာမျက်နှာမှတစ်ဆင့် ယနေ့ (သောကြာနေ့) ထုတ်ပြန်ကြေညာလိုက်သည်။

 ပါတီဝင်များ နှင့် ပြည်သူများအား ရည်ညွှန်းလျှက် ရေးသားထားသည့်စာတွင် MFP ပါတီသည် အမတ်ဦးရေ အများဆုံး အတိုက်အခံပါတီတစ်ခု ဖြစ်လာသော်လည်း ပါတီခေါင်းဆောင်တာဝန်ကို ၄င်းအနေဖြင့် ထမ်းဆောင်နိုင်ခြင်း မရှိသေးကြောင်း၊ ထိုင်း ဖွဲ့စည်းပုံအခြေခံဥပဒေ ခုံရုံးသည် ၄င်းအား လွှတ်တော်အမတ်အရည်အချင်း မပြည့်မီဟုဆိုကာ တားမြစ်ထားကြောင်း၊ထို့ကြောင့် လွှတ်တော်အတွင်း အတိုက်အခံပါတီ၏ တာဝန်များကို အပြည့်အဝထမ်းဆောင်နိုင်သူတစ်ဦးနှင့် အစားထိုးနိုင်ရန် ပါတီခေါင်းဆောင်အဖြစ်မှ နှုတ်ထွက်ရခြင်း ဖြစ်ကြောင်း ရေးသားထားသည်။

“ လက်ရှိ ဖွဲ့စည်းပုံအခြေခံဥပဒေအရ အတိုက်အခံပါတီခေါင်းဆောင်ဟာ လွှတ်တော်အမတ် ဖြစ်ရပါမယ်။ ခုချိန်ထိ ဒီတာဝန်ကို ကျွန်တော် မထမ်းဆောင်နိုင်သေးသလို ဆက်ပြီး ထမ်းဆောင်ဖို့လည်း မသေချာသေးပါဘူး။ ပါတီအလုပ်အမှုဆောင်တွေ လွှတ်တော်အမတ်တွေနဲ့ တိုင်ပင်ပြီးတဲ့အခါ အတိုက်အခံပါတီရဲ့ အရေးကြီးတဲ့ အခန်းကဏ္ဌနဲ့ အတိုက်အခံခေါင်းဆောင်ဟာ အဓိကအတိုက်အခံပါတီက ဖြစ်ရမယ်လို့ ဆုံးဖြတ်ပြီးတဲ့နောက် ပါတီကနေ သင့်လျော်သူတစ်ဦးကို ထပ်ပြီး ရွေးချယ်နိုင်အောင်လို့ နှုတ်ထွက်ဖို့ ကျွန်တော် ဆုံးဖြတ်လိုက်ပါတယ်” ဟု ပီတက ရေးသားခဲ့သည်။

 တိုင်းမ်မဂ္ဂဇင်း၏ အနာဂတ် ကမ္ဘာ့လူငယ်ခေါင်းဆောင် ၁၀၀ စာရင်းတွင် ဖော်ပြခံရသော ဟားဗတ်ကျောင်းဆင်း အသက် ၄၃ နှစ်အရွယ်ရှိ ပီတ က ပါတီခေါင်းဆောင်အဖြစ်မှ နှုတ်ထွက်ခဲ့သော်လည်း MFP ပါတီ နှင့် ပြည်သူတို့၏ အကျိုးအတွက် အတတ်နိုင်ဆုံး အလုပ်အကျွေးပြုသွားမည်ဟု သူ၏ နှုတ်ထွက်ကြေညာစာတွင် ရေးသားထားခဲ့သည်။

ref:Bangkok Post