ယုဇန(ကျောက်ဖြူ) ပြုစုရေးသားသော ရခိုင်ဇမ်းကဗျာစာအုပ် ရောင်းအားကောင်းနေ

ပျောက်ကွယ်လုနီးပါးဖြစ်နေသည့် ရခိုင်ကျေးလက် ဇမ်းကဗျာကို ရှာဖွေပြုစု ရေးသားထားသော ယုဇန(ကျောက်ဖြူ)၏  "ဓလေ့ရိုးရာ ရမ္မာဝတီရခိုင်သဘာဝ ဇမ်းကဗျာ"စာအုပ်သည် လက်ရှိတွင် ရောင်းအားကောင်းနေသည်ဟု သိရသည်။

ရခိုင်ရမ္မာဝတီ(ခေါ်)ရမ်းဗြဲဒေသ၏ ကျေးလက်ရိုးရာဓလေ့များထဲတွင် တစ်ခုအပါအဝင် ဖြစ်သော ရမ္မာ၀တီ ဒေသခံများ၏ အပြန်အလှန် ဖွဲ့စပ်ပြောဆိုထားသည့် ဇမ်းကဗျာများကို ကျောက်ဖြူမြို့မှ စာရေးဆရာ ဆရာတော် ယုဇန(ကျောက်ဖြူ)က ပြုစုရေးသားကာ ပြီးခဲ့သည့် ဩဂုတ်လတွင် စတင်ထုတ်ဝေခဲ့ခြင်းဖြစ်သည်။

လက်ရှိတွင် ရခိုင်ပြည်တွင်းသာမက ပြည်မဘက်ကပါ မှာယူဝယ်ယူနေကြသည့်အတွက် အုပ်ရေ ၁၀၀၀ ၌ အုပ်ရေ ၃၀ ခန့်သာကျန်ရှိတော့ကြောင်း စာရေးသူ ဆရာတော်ယုဇန(ကျောက်ဖြူ)၏ တပည့်ရင်း အရှင်ခေမာဝံသက နိရဥ္စရာသို့ မိန့်ကြားသည်။

"ဇမ်းကဗျာစာအုပ်ကို ပြည်မဘက်က ရခိုင်စာဖတ်ပရိသတ်တွေလည်း မှာယူအားပေးကြသလို ရခိုင်ပြည်တွင်းက စာပေအသိုင်းအဝိုင်း၊ စာဖတ် ပရိသတ်တွေလည်း ဝယ်ယူကြပါတယ်။ အခု ဒုတိယ အကြိမ်ထုတ်ရမလားဆိုပြီးတော့ တိုင်ပင်နေပါတယ်" ဟု မိန့်ကြားသည်။

အဆိုပါစာအုပ်တွင် ရမ္မာဝတီကျေးလက်ဒေသ၌ လူပျိုလှည့်(ရွာလည်)စဉ် လူပျိုနှင့် အပျိုတို့ အပြန်အလှန် ဖွဲ့စပ်ပြောဆိုသည့် ဇမ်းကဗျာများ၊ ကျွဲကျောင်းနွားကျောင်းရာတွင်  အချင်းချင်း ချစ်ကြည်ရင်းနှီးစွာအပြန်အလှန် ဖွဲ့စပ်ပြောဆိုသည့် ဇမ်းကဗျာများ၊ ငါးရှာ၊ မှိုဟင်းခူးသွားရာတွင် ဖွဲ့စပ်ပြောဆိုသည့် ဇမ်းကဗျာများအပြင် ကျေးလက်ဒေသရှိ ဓလေ့ရိုးရာလုပ်ငန်းများတွင် ဒေသခံများ ဖွဲ့စပ်ပြောဆိုလေ့ရှိသည့် ဇမ်းကဗျာများဖြစ်ကြောင်း စာအုပ်ပြုစုရေးသားထုတ်ဝေသူ ဆရာတော် ယုဇန(ကျောက်ဖြူ) က နိရဥ္စရာသို့ မိန့်သည်။

"ကျေးလက်ဒေသတွေကို သွားတဲ့အခါ  ဒီဇမ်းကဗျာက အထူးသဖြင့် လူပျိုကာလသားတွေပေါ့။ အပျို၊ လူပျိုတွေ အချင်းချင်း အပြန်အလှန် စကားနိုင်လုပြီး ပြောကြတဲ့အခါပေါ့။ သူတို့က ဇမ်းကဗျာတွေနဲ့ပြောကြတဲ့အခါ အလွန်မှ နှစ်သက်ဖို့ကောင်းတယ်။ ဆိုတော့ ဘုန်းကြီးက ဒီဇမ်းကဗျာတွေကို ဟိုခါနည်းနည်း၊ ဒီခါနည်းနည်းစုဆောင်းနဲ့ အပုဒ် ၂၀၀ ကျော်လောက်ရတယ်ပေါ့။ အခုစာအုပ်မှာတော့ ပုဒ်ရေတစ်ရာကျော်ထည့်ထားပါတယ်" ဟု မိန့်ကြားသည်။

ရမ္မာဝတီကျေးလက်ဒေသခံများက ၄င်းတို့မှတ်မိသလောက် ပြန်လည်ရွတ်ဆိုပြသည့်ဇမ်းကဗျာများကို ဆရာတော်က နှစ်ပေါင်းငါးဆယ်ကျော်ကြာ ၁၉၇၁ ခုနှစ်ခန့်ကပင် ရေးသားစုဆောင်းလာခဲ့ခြင်း ဖြစ်ကြောင်း ပြောဆိုသည်။

ရမ္မာဝတီကျေးလက်ဒေသများတွင် ရှေးအခါကပင် လူပျိုလှည့်(ရွာလည်)၌ အပိုးပန်းခံရသည့် အပျိုတို့မှာ လူပျိုအပျိုစကားအား ဇမ်းကဗျာများဖြင့် လက်တမ်းဖွဲ့စပ်ပြောဆိုလေ့ရှိကြောင်းလည်း ဆရာတော်က မိန့်သည်။

"ဒီဇမ်းကဗျာတွေဟာ ဒေသတစ်ခုရဲ့ အင်မတန်မှချစ်စရာကောင်းတဲ့ ဓလေ့တွေပေါ့။ ဒီဟာတွေက နှစ်တွေကြာလာတာနဲ့အမျှ ပျောက်ကွယ်လာတာ တွေ့ရတယ်။ နောက်မျိုးဆက်တွေလည်း ဘာမှ သိကြတော့မှာ မဟုတ်ဘူး။ ဒါကြောင့် ဘုန်းကြီးပြုစုခဲ့တာတွေကို ပြန်ထုတ်ဝေလိုက်တာပါ" ဟု မိန့်ကြားသည်။

ယခုစာအုပ်တွင် ဇမ်းကဗျာပုဒ်ရေ ၁၁၁ ပုဒ်ပါဝင်ပြီး ဇမ်းကဗျာထဲမှ ဒေသိယစကားလုံးများ၏ ခက်ဆစ်အဓိပ္ပာယ်ကိုလည်း မြန်မာဘာသာဖြင့် ပြန်ဆိုပေးထားသည်ဟု ဆရာတော်က မိန့်ကြားသည်။

ယင်းအပြင် ဇမ်းကဗျာတစ်ပုဒ်ချင်းစီ၏ဆိုလိုချက်၊ ရွတ်ဆိုသူ၏ အာဘော်သဘောတရားတို့ကိုလည်း စာအုပ်ထဲတွင် ရှင်းလင်းရေးသားပေးထားကြောင်းလည်း သိရသည်။

အဆိုပါစာအုပ်တစ်အုပ်၏ တန်ဖိုးမှာ ကျပ် ၃၅၀၀ ဖြစ်သည်။ (NN-23)