အရှေ့အလယ်ပိုင်းတွင်ရောင်းစားခံရသည့် ရခိုင်အမျိုးသမီးငယ် ၄ ဦးအနက် တစ်ဦး အီရတ်အစိုးရထံ ခိုလှုံခွင့်ရ

အရှေ့အလယ်ပိုင်းနိုင်ငံများဖြစ်ကြသည့် အီရတ်နှင့် ဆော်ဒီအာရေဗျနိုင်ငံတို့တွင် ရောင်းစားခံခဲ့ရသည့် ရခိုင်အမျိုးသမီးငယ် ၄ ဦးအနက် တစ်ဦးသည် အီရတ်တွင် အဖမ်းခံရပြီးနောက် အစိုးရထံတွင် ခိုလှုံခွင့်ရသွားသည်ဟု သတင်းရရှိသည်။

အဆိုပါအီရတ်အစိုးရလက်ထဲတွင် ခိုလှုံခွင့်ရသွားသူမှာ ဝေဝေ (ခ) မမြတ်အေးစံ (၂၆) နှစ်ဖြစ်ကြောင်း ရခိုင်အမျိုးသားကွန်ရက်မှ ဥပဒေအကြံပေး ရှေ့နေ ဒေါ်ဝိုင်းသူဇာက နိရဉ္စရာသို့  အတည်ပြု ပြောကြားသည်။

 ပြီးခဲ့သည့်ဩဂုတ်လ ၂၆ ရက်တွင် သူမသည် အီရတ်ရဲထံ ဖမ်းဆီးခံထားရပြီးနောက် အီရတ်နိုင်ငံမှ နိုင်ငံတကာ ရွှေ့ပြောင်း သွားလာခြင်းဆိုင်ရာ အဖွဲ့အစည်း (IOM)နှင့် အီဂျစ်နိုင်ငံရှိ ကိုင်ရိုမြန်မာနိုင်ငံသံရုံး၏ အကူအညီဖြင့် စက်တင်ဘာလ ၁၁ ရက်တွင် အီရတ်နိုင်ငံအစိုးရထံ ခိုလှုံခွင့်ရခဲ့ခြင်း ဖြစ်သည်ဟု ဆိုသည်။

"အခုတော့ ဝေဝေအတွက်က လုံခြုံသွားပြီးလို့‌ ပြောလို့ရပါတယ်။ သူကို ရဲဖမ်းသွားပြီးနောက် အီရတ်မှာရှိတဲ့ IOM နှင့် ကိုင်ရိုမြန်မာသံရုံး အကူအညီကနေတစ်ဆင့် အစိုးရဆီမှာ ခိုလုံခွင့်ရသွားပြီးလို့ ကိုင်ရိုသံရုံးက ဆက်သွယ်လာပါတယ်" ဟု ပြောသည်။

ယင်းအပြင် သူမ ပြည်တော်ပြန်နိုင်ရေးအတွက် လိုအပ်သည့် စာရွက်စာတမ်းကို အီရတ်အစိုးရနှင့် ဆက်သွယ်ကာ ဆောင်ရွက်ပေးနေကြောင်း ဆက်ပြောသည်။

လက်ရှိတွင် ကျန် ၃ ဦးထဲမှ  အီရတ်နိုင်ငံသို့ ရောင်းစားခံထားရသည့် မဟန်နီထွန်း (၂၂) နှစ်နှင့် မသန်းနွယ်ဌေး (၂၅) နှစ်တို့သည် အိမ်တွင်းအကြမ်းဖက်မှုခံနေရသည့်အပြင် အသက်အန္တရာယ် ခြိမ်းခြောက်မှုနှင့် လိင်ပိုင်းဆိုင်ရာ နှောင်ယှက်မှုများဖြင့် ကြုံတွေ့နေရကြောင်း ကာယကံရှင်များက အသံမတ်ဆေ့ရှ်ပို့၍ ပြောပြသည်ဟု ရှေ့နေ ဒေါ်ဝိုင်းသူဇာက ဆိုသည်။

"ဟန်နီထွန်းနဲ့ ဆက်သွယ်ပြန်ရပြီး သူက အခုနေမကောင်းဘူးလို့ဆိုတယ်။ သူထမင်းမကျွေးတာ ၃ ရက်လောက်ရှိပြီးတဲ့။ နောက်ပြီး ဗိုက်အောင့်တယ်လို့ ပြောရင်လည်း မသိသလို နေကြတယ်လို့ ပြောတယ်။ နောက် သန်းနွယ်ဌေးကိုဆိုရင် အိမ်ရှင်က ပိုက်ဆံကြိုက်လား။ ဘာကြိုက်လဲ။ အဲလို လိပ်ပိုင်းဆိုင်ရာ ပြောဆိုမှုတွေ ရှိတယ်။ ပြီးရင် ဒီအကြောင်းတွေကို အပြင်ကိုပြောရင် လည်ပင် လှီးပစ်မယ်လို့ လုပ်ပြတယ်လို့ ကျွန်မကို ပြောပါတယ်" ဟု ရှေ့နေ ဒေါ်ဝိုင်းသူဇာက ပြောသည်။

အရှေ့အလယ်ပိုင်းနိုင်ငံများသို့ ရောင်းစားခံခဲ့ရသည့် ရခိုင်အမျိုးသမီးငယ် ၄ ဦးမှာ မဟန်နီထွန်း (၂၂) နှစ်၊ မဝေဝေ (ခ) မမြတ်အေးစံ (၂၆) နှစ်၊ မသန်းနွယ်ဌေး (၂၅) နှစ်နှင့် မဝင်းဝင်းလှိုင် (၂၂) နှစ်တို့ဖြစ်ကြသည်။

သူတို့သည် စစ်တွေ၊ ပုဏ္ဏားကျွန်း၊ မြောက်ဦးနှင့် ရသေ့တောင်မြို့နယ်များမှဖြစ်ကြကာ ဒူဘိုင်းရှိ အလှပြင်ဆိုင်သို့ပို့ပေးမည်ဟု လိမ်လည်ပြောဆိုကာ စစ်တွေမြို့မှ ပွဲစား မနန္ဒာ၊ မခိုင်သန်းအေးနှင့် ဒူဘိုင်းနိုင်ငံရှိ မပန်ပန်(ခ)ခိုင်စန္ဒာတို့က အီရတ်နှင့် ဆော်ဒီအာရေဗျနိုင်ငံများသို့ ရောင်းစားခဲ့ခြင်း ဖြစ်သည်။

၎င်းတို့ ၄ ဦးအထဲမှ ပြီးခဲ့သည့် ဩဂုတ်လ ၂၈ ရက်က ဆော်ဒီအာရေဗျနိုင်ငံမှ ဒူဘိုင်းနိုင်င်ငံသို့ ပို့ဆောင်ခံခဲ့ရသည့် မဝင်းဝင်းလှိုင်တွင် ဒူဘိုင်းရှိ မြန်မာသံအမတ်နှင့် အဆက်အသွယ်ရသော်လည်း သွားရောက် မကူညီနိုင်သေးကြောင်းနှင့် ၎င်းတွင် လုံပိတ်အခန်းတစ်ခု၌ ပိတ်လှောင်ခံထားရကြောင်း ကာယကံရှင် မဝင်းဝင်းလှိုင်က ပြောပြသည်ဟု ရှေ့နေ ဒေါ်ဝိုင်းသူဇာက ဆက်လက်ပြောဆိုသည်။

"သူကို ကျွန်မက ဒူဘိုင်းက သံအရာရှိဖုန်းကို ပေးလိုက်တယ်။ တစ်မြို့တည်းဆိုတော့ အဆက်အသွယ် ရပေမဲ့ သူကို သွားရောက်ကူညီဖို့ မဖြစ်နိုင်သေး။ ဘာလို့ဆိုတော့ သူကို ဒူဘိုင်းက အေဂျင်စီရုံးမှာ အလုပ်လုပ်နေတဲ့ သဘောမျိုးနဲ့ ထားသလိုပေါ့။ အဲဒါကြောင့် မရသေးတာ" ဟု ပြောသည်။

၎င်းအပြင် မဝင်းဝင်းလှိုင်သည် သူတို့ဘာသာစကားကို နားလည်ပြောတတ်သူတစ်ဦးဖြစ်သည့်အတွက်
အဖမ်းခံထားရသည့် ပွဲစားမနှစ်ဦးကိုယ်စား လူရှာခိုင်းပြီး ပွဲစားလုပ်ခိုင်းနေကြောင်း သူမက မလုပ်နိုင်ကြောင်း ငြင်းဆို၍ လုံပိတ်အခန်းထဲတွင် ပိတ်လှောင်ခံထားရကြောင်း ဆက်ပြောသည်။

သူတို့ ၄ ဦးကို ပွဲစားများက ယခုနှစ်၊ မေလ ၇ ရက်တွင် ရန်ကုန်မှ ယူအေးအီးနိုင်ငံ၊ ဒူဘိုင်းမြို့သို့ တရားဝင်ပို့ဆောင်ခဲ့ပြီး ယင်းမှတဆင့် ၃ ဦးကို အီရတ်နိုင်ငံသို့ဆက်လက်ပို့ဆောင်ကာ ကျန်တစ်ဦးကို ဆော်ဒီအာရေဗျနိုင်ငံသို့ ပို့ဆောင်ခဲ့ခြင်းဖြစ်ကြောင်း သိရသည်။

လက်ရှိတွင် အရှေ့အလယ်ပိုင်းနိုင်ငံများသို့ ပွဲစားများဖြင့် တရားဝင်လာခဲ့ပြီးနောက် ရောင်းစားခံထားရသူ မြန်မာအမျိုးသမီး အယောက် ၈၀ ကျော်ခန့်ရှိကြောင်း အိုမန်နိုင်ငံရှိ မြန်မာနိုင်ငံပိုင် အေဂျင်စီတစ်ခုတွင် လုပ်ကိုင်နေသူ တစ်ဦးထံမှ သိရသည်။

ယင်းထဲတွင် ရခိုင်အမျိုးသမီးငယ်များပါဝင်ပြီး အရေအတွက်မသိရသေးသော်လည်း အသက်အရွယ်အားဖြင့် အသက် ၂၀ မှ ၃၀ ကြားရှိကြောင်း သိရသည်။

စစ်တပ်အာဏာသိမ်းထားသည့် မြန်မာနိုင်ငံအတွင်း အစိုးရအဆက်ဆက် ပြည်တွင်းတွင် အလုပ်အကိုင်အခွင့်အလမ်း အလွန့်အလွန်ရှားပါးမှုများကြောင့် ရခိုင်အပါအဝင် မြန်မာအမျိုးသမီးငယ်များမှာ အရှေ့အလယ်ပိုင်းဒေသနိုင်ငံများအပါအဝင် ပြည်ပနိုင်ငံများသို့ အလုပ် လုပ်ကိုင်နိုင်ရန် ပွဲစားများ၏အဆက်အသွယ်ကိုအားကိုးပြီး နှစ်စဉ် သွားရောက်မှုများရှိနေကြသည်။

ယင်းသို့သွားရောက်အလုပ်လုပ်ကိုင်ရာတွင် အလုပ်ရှင်သူဌေးများ၏ မတရားခိုင်းစေရိုက်နှက်မှု၊ လိင်ပိုင်းဆိုင်ရာအကြမ်းဖက်မှု၊ အစာရေစာငတ်ပြတ်မှုများကိုကြုံတွေ့နေရပြီး ၄င်းတို့ကို တာဝန်ယူပို့ပေးခဲ့သည့်ပွဲစားများကိုတိုင်ကြားလျှင်လည်း ပွဲစားများက မဖြေရှင်းပေးဘဲ လျစ်လျူရှုထားသည်ဟု ကာယကံရှင်အမျိုးသမီးငယ်များက နိရဥ္စရာသို့ပြောဆိုထားကြသည်။ (NN-9)