ရန်ကုန် အပါအဝင် မြန်မာနိုင်ငံအနှံ့ စစ်တပ်ထုတ်ကုန်များရောင်းအားကျနေသော်လည်း ရခိုင်ပြည်နယ်တွင် စစ်တပ်ထုတ်ကုန်များဖြစ်သည့်အရက်၊ ဘီယာ၊ ဆေးလိပ်များနှင့် ဆက်သွယ်ရေး ဆင်းကဒ်များ ဆက်လက် ရောင်းအားကောင်းနေဆဲဖြစ်သည်ဟုသတင်းရရှိသည်။

ရခိုင်တွင် ရောင်းအားကောင်းနေသည့် စစ်တပ် ထုတ်ကုန်များမှာမြန်မာဘီယာ၊ ဒဂုံအရက်၊ ဘီယာ၊ အချိုရည်၊ Andaman Gold အရက်၊ ဘီယာ၊ အချိုရည်၊ BlackShield ဘီယာ၊ မန္တလေးဘီယာ၊မန္တလေးရမ်၊ အာမီရမ်၊Red Ruby ဆေးလိပ်၊Premium Gold ဆေးလိပ်များနှင့်MYTEL ဆက်သွယ်ရေးဆင်းကဒ်များဖြစ်ကြသည်ဟုသိရသည်။

အဆိုပါထုတ်ကုန်များရခိုင်တွင် ရောင်းအားကောင်းနေခြင်းမှာ စစ်တပ်ထုတ်ကုန်များသည် ဈေးနှုန်း ချိုသာခြင်းကြောင့်ဖြစ်သည်ဟုအမည်မဖော်လိုသည့် ရခိုင်မှ အရက်ဘီယာရောင်းချသူတစ်ဦးက နိရဥ္စရာသတင်းဌာနကိုပြောသည်။

"စစ်တပ်ထုတ်ကုန် အရက်၊ဘီယာတွေက ဈေးသက်သာတယ်လေ။ အဲဒါကြောင့် လူသောက်များတယ်" ဟုပြောသည်။

အဆိုပါအရက်၊ ဘီယာများနှင့်ဆေးလိပ်ဖာများကို နေ့စဉ် ရာနှင့်ချီ ရခိုင်ပြည်သို့ ကုန်ကားများဖြင့်ပို့ဆောင်ပေးလျက်ရှိနေသည်ဟု ဒေသခံမျက်မြင်များက ပြောသည်။

ယခုကဲ့သို့စစ်တပ်ထုတ်ကုန်များ ရခိုင်ပြည်တွင် ရောင်းအားကောင်းနေခြင်းမှာ ဈေးနှုန်းချိုသာသလိုကံစမ်းမဲများဖြင့်ဆွဲဆောင်မှုရှိသောကြောင့်ဖြစ်သည်ဟုလည်း ရခိုင်လူငယ်အချို့ကပြောသည်။

ယခုနောက်ပိုင်းဆိုလျှင် ရခိုင်ပြည်နယ်အတွင်းစစ်တွေကဲ့သို့ မြို့ကြီးများတွင် Bar များ ပေါ်ပေါက်လာနေပြီး ယင်းနေရာများတွင်လည်းစစ်တပ်ထုတ်ကုန်များဖြစ်သည့် အရက်၊ ဘီယာများနှင့် ဆေးလိပ်များကိုတွင်တွင်ကျယ်ကျယ်ရောင်းဝယ်သုံးစွဲလျက်ရှိကြသည်ဟု ဒေသခံများက ပြောသည်။

ယင်းသို့ ပိုမိုသုံးစွဲခွင့်ရလာ၍ပိုမိုသုံးစွဲလာနေကြသည့်အတွက် လူငယ်လူရွယ်များ မူးယစ် သားကောင်ဘ၀သို့ ကျရောက်နေကြရသည်ဟုလည်းဒေသခံများက ပြောသည်။

စစ်ကောင်စီသည် စစ်တပ် ထုတ်ကုန်ဖြစ်သည့် မြန်မာဘီယာအပါအဝင်တခြားထုတ်ကုန်များမှ အကျိုးအမြတ် ငွေကြေးများ ရရှိနေသည့်အတွက် စစ်ကောင်စီတပ်ကိုသက်ဆိုးရှည်စေသဖြင့်  ပြည်သူများအနေဖြင့်လုံး၀ မသုံးစွဲသင့်ဟုလည်းရသေ့တောင်မြို့နယ်မှလူငယ်တစ်ဦးက နိရဥ္စရာသတင်းဌာနကိုပြောသည်။

"၇ခိုင်ပြည်ထဲမှာကစစ်တပ်ထုတ်တဲ့ပစ္စည်းတွေအများကြီးသုံးစွဲနေတာပဲ။  တကယ်တော့လုံး၀ကို မသုံးသင့်တာ" ဟုပြောသည်။

ရက္ခိုင့်အမျိုးသားအဖွဲ့ချုပ် (ULA)အဆင့်မြင့် ခေါင်းဆောင်တစ်ဦးဖြစ်သူ ဦးအေးထွန်း(ခေါ်)ထွန်းမင်းနိုင်ကလည်း စစ်ကောင်စီထုတ်ကုန်ပစ္စည်းများကိုသပိတ်မှောက်ကြရန်သူ၏ လူမှုကွန်ရက် စာမျက်နှာတွင် ပြီးခဲ့သည့် ၂၀၂၂ ခုနှစ်၊မေလ ၁၇ ရက်က သတိပေး ရေးသားခဲ့သည်။

စစ်ကောင်စီသည်ရခိုင်ပြည်နယ်ထဲသို့ ပြည်မဘက်က တင်ပို့သည့်ကုန်စည်စီးဆင်းမှုများကိုအနှောင့်အယှက်ပေးကန့်သတ်မှုများ ပြုလုပ်ကာ ရခိုင်ပြည်သူလူထု အကျပ်အတည်းဆိုက်အောင်အနုနည်းဖြင့် ပြုလုပ်နေသော်လည်း  စစ်ကောင်စီ၏ အရက်၊ဘီယာ၊ စီကရက် ထုတ်ကုန်ပစ္စည်းများကိုမူ အတားအဆီးမရှိ သလဟော တင်သွင်းနေသည်ဟု နိုင်ငံရေးလေ့လာသုံးသပ်သူများက ပြောဆိုသည်။

ရခိုင်ပြည်သူများက မိမိလူထုပေါ် နည်းအမျိုးမျိုးဖြင့် အနိုင်ကျင့်နေသော်လည်း  စစ်တပ်အပေါ်စိတ်နာခြင်းမရှိခြင်းကြောင့်စစ်တပ်ထုတ်ကုန်များကို ဆက်လက်သုံးစွဲနေကြခြင်း ဖြစ်သည်ဟုလည်း မလေးရှားရောက် ကျောက်တော်ဒေသခံ ကိုဇော်ဇော်ထွန်းကနိရဉ္စရာကိုပြောသည်။

"ရက္ခိုင့်တပ်တော်ကမပိတ်ပင်တောင်မှ ပြည်သူတွေက စိတ်မနာတတ်လို့ ရောင်းအားကောင်းနေတဲ့ ကိစ္စပါ။ အပျော်အပါး မက်တယ်။ တစ်ခုခုဆိုအရက်မပါရင် မပြီးဘူး။ လွယ်လွယ်ကူကူ ဝယ်လို့ ရတာဆိုလို့ စစ်တပ်ထုတ်ကုန်ပဲရှိတယ်လေ"ဟု ပြောသည်။

အဆိုပါစစ်တပ်ထုတ်ကုန်များအနက်MYTEL ဆက်သွယ်ရေးကုမ္ပဏီတစ်ခုတည်းမှစစ်တပ်သည် ၁၀ နှစ်အတွင်း အမြတ်ငွေ အမေရိကန်ဒေါ်လာ သန်းပေါင်း ၇၀၀ ကျော်ခံစားခွင့်ရှိမည်ဖြစ်ကြောင်း Justice For Myanmar အဖွဲ့က ဆိုထားသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီလက စစ်တပ်က မြန်မာတစ်နိုင်ငံလုံးကို အာဏာ သိမ်းပြီးသည့်နောက် စစ်တပ်ထုတ်ကုန်များကို တစ်နိုင်လုံးက မသုံးစွဲကြရန် သပိတ်မှောက် လှုပ်ရှားမှုများပြုလုပ်ခဲ့ကြသော်လည်း ရခိုင်တွင် ဆက်လက် သုံးစွဲလျက်ရှိသည်ဟု သိ၇သည်။