ကလေးမှ ရန်ကုန်အပြန် မြန်မာ့လေကြောင်းလေယာဉ် ငှက်အုပ်နှင့်တိုက်မိ၍ ရန်ကုန်-အမ်း- စစ်တွေ ခရီးစဉ်ရွှေ့ဆိုင်းလိုက်ရ

ကလေးမြို့မှ ရန်ကုန်သို့ ပျံသန်းလာသည့် မြန်မာ့လေကြောင်းလိုင်း လေယာဥ်သည် ငှက်အုပ်နှင့်တိုက်မိ၍ ယနေ့ ရန်ကုန်-အမ်း-စစ်တွေ ခရီးစဥ်ကို ရွှေ့ဆိုင်းလိုက်ရကြောင်း သတင်းရရှိသည်။

Star Wave လေယာဉ် လက်မှတ်အရောင်းဆိုင်မှ တာဝန်ရှိသူတစ်ဦးက "ကလေးမြို့ကနေ ရန်ကုန်ကို ပျံသန်းလာတဲ့ချိန်မှာ လေယာဉ်နဲ့ ငှက်နဲ့ တိုက်မိလို့ ရန်ကုန်-အမ်း-စစ်တွေ ခရီးစဥ်တစ်ခုလုံး ဖျက်လိုက်ရပါတယ်။

ဒီနေ့ Cancel ဖြစ်တဲ့ လေယာဥ်က မနက်ဖြန် အစားထိုးပြေးဆွဲပေးမှာပါ" ဟု ပြောသည်။ ယနေ့ ခရီးစဥ်ပယ်ဖျက်လိုက်ရသည့်အတွက် မနက်ဖြန် စက်တင်ဘာ ၁၉ ရက် ညနေ ၄ နာရီ ၁၅ မိနစ်တွင် အစားထိုးပြေးဆွဲသွားမည်ဟု သိရသည်။

ခရီးစဉ်ရွှေ့ဆိုင်းခံလိုက်ရသည့်အတွက် အဆိုပါခရီးစဥ်တွင် စီးနင်းလိုက်ပါရန် လက်မှတ်ဝယ်ယူပြီး စောင့်ဆိုင်းနေသည့် ခရီးသည်များအတွက် အခက်အခဲများဖြင့် ကြုံခဲ့ရကြောင်း ဆိုသည်။

ရခိုင်မှ လက်ရှိတွင် ပြည်ပသို့ အလုပ်အကိုင် လုပ်ကိုင်ရန် ထွက်ခွာနေသူများ နေ့စဉ် များပြားနေသလို ဒေသတည်ငြိမ်နေသဖြင့် အနယ်နယ်အရပ်ရပ်မှ ဘုရားဖူး လာသူများလည်း ရှိနေသဖြင့် ခရီးသွားများ နေ့စဉ်များပြားလျက် ရှိနေသည်ဟု သိရသည်။

ယနေ့ စစ်တွေမှနေ ပြန်လည်ထွက်ခွာ ပျံသန်းနေသော လေယာဉ်ခရီးစဉ်များမှာ စစ်တွေ-ရန်ကုန်၊ စစ်တွေ-မန္တလေး၊ စစ်တွေ-နေပြည်တော်၊ စစ်တွေ-သံတွဲ၊ စစ်တွေ-ကျောက်ဖြူနှင့် စစ်တွေ-မာန်အောင်ခရီးစဉ် တို့ဖြစ်ကြသည်။