ရခိုင်ပြည်နယ်အတွင်းရှိ မွတ်ဆလင်ဒုက္ခသည်စခန်းများမှ လူပေါင်း ၈၀ ကျော် လူကုန်ကူးခံခဲ့ရသည်ဟု ဒုက္ခသည်စခန်းများမှတာဝန်ခံများပြုစုထားသည့်စာရင်းအရ သိ၇သည်။

၇ခိုင်တွင်ပြီးခဲ့သည့် ၂၀၂၂ ခုနှစ်မှ ယခု ၂၀၂၃ ခုနှစ်၊ သြဂုတ်လအထိ တစ်နှစ်အတွင်းလူကုန်ကူးခံ၇သူ မွတ်ဆလင်ဒုက္ခသည် ၈၀ ကျော်ခန့်ရှိခဲ့သည်ဟု ဆိုသည်။

ယင်းအထဲတွင်စစ်တွေမြို့နယ်အတွင်း သက္ကယ်ပြင်ဒုက္ခသည် စခန်းမှ ၆ ဦး၊အုန်းတောကြီး(မြောက်) ဒုက္ခသည်စခန်းမှ ၄ ဦး၊ အုန်းတောကြီး(တောင်) ဒုက္ခသည်စခန်းမှ၁၅ ဦး၊ ဘောဒူဖဒုက္ခသည်စခန်းမှ ၁၁ ဦး၊ ပေါက်တောမြို့နယ်အတွင်းငှက်ချောင်း ဒုက္ခသည်စခန်း(၁)မှ ၁၀ ဦး၊ ကြိမ်နီပြင်ဒုက္ခသည်စခန်းမှ ၃၀ ဦးနှင့်မြေပုံမြို့ရှိ ဒုက္ခသည်စခန်းမှ ၅ ဦး၊ စုစုပေါင်း ၈၁ ဦးဖြစ်သည်။

သူတို့ထဲတွင် အမျိုးသမီးအများအပြားနှင့်အသက်မပြည့်သည့်ကလေးများပင် ပါဝင်သည်ဟု ပေါက်တောမြို့နယ်၊ ကြိမ်နီပြင်မွတ်ဆလင်ဒုက္ခသည်စခန်းမှ စခန်းတာဝန် ဦးကျော်ဇောက ပြောသည်။

"လူကုန်ကူးခံရသူတွေကအမျိုးသမီးတွေရော၊ အမျိုးသားတွေပါ အသက်မပြည့်တဲ့ကလေးတွေရော ပါတယ်။ အလုပ်အကိုင် ရမယ်ဆိုပြီးခေါ်ရင်ကျွန်တော်တို့စခန်းတာဝန်ခံတွေကို အသိမပေးဘူး။ လိုက်သွားကြတယ်။လမ်းတစ်ဝက်ရောက်ရင် လူကုန်ကူးတဲ့သူတွေက မိသားစုတွေဆီဖုန်းဆက်ခိုင်းတယ်။ သိန်းတစ်ထောင်၊ သိန်းနှစ်ထောင်နဲ့လာရွေးပါ။ မရွေးရင်သတ်ပစ်လိုက်မယ်ဆိုပြီး ခြိမ်းခြောက်တဲ့အထိရှိတယ်" ဟုပြောသည်။

လူကုန်ကူးခံရသည့်ဒုက္ခသည်များမှာ ရခိုင်၌ အလုပ်အကိုင်ရှားပါးမှု၊ စားဝတ်နေရေး ကျပ်တည်းမှုတို့ကြောင့်ပြည်ပနိုင်ငံ၌ အလုပ်အကိုင်ရရှိမည်ဟုဆိုကာ ပွဲစားများ၏ လိမ်လည်ခေါ်ယူခြင်းခံရပြီးလူကုန်ကူးခံရခြင်းဖြစ်သည်။

ယင်းအပြင်စခန်းအတွင်းနေထိုင်သူအချို့ကလည်းမိမိတို့စခန်းမှ ဒုက္ခသည်များကိုလိမ်လည်ကာ ရောင်းစားမှုများရှိနေသည်ဟု ပေါက်တောမြို့နယ်၊ငှက်ချောင်းမွတ်ဆလင်စခန်း(၁)မှ စခန်းတာဝန်ခံ ဦးမောင်နုချေကပြောသည်။

"စခန်းအတွင်းကလူတွေလည်း လူကုန်ကူးကြတာပဲ။ စခန်းကနေ မြေပုံအထိ စက်လှေနဲ့ ပို့တယ်။အဲ့ဒီကနေ တစ်ဆင့်ပြီးတစ်ဆင့် ပို့ပြီး ရောင်းစားလိုက်တယ်။ ပြီးရင်ပိုက်ဆံနဲ့လာရွေးခိုင်းတယ်။ စခန်းအတွင်းမှာဒီလိုလူမျိုးတွေရှိနေတာကိုတောင် သက်ဆိုင်ရာတွေကလည်း ဘာမှအရေးယူဆောင်ရွက်ပေးတာတွေမရှိပါဘူး"ဟု ပြောသည်။

ထို့အတူလူကုန်ကူးခံရသည့်ဒုက္ခသည်စခန်းများတွင် လူကုန်ကူးခံရခြင်းနှင့်ပတ်သက်၍အသိပညာပေးမှုများမရှိသည့်အတွက် အသိပညာပေးများ မျှဝေသင်ကြားပေးရန်လိုအပ်နေသည်ဟု စခန်းတာဝန်ခံများက ပြောသည်။

အမည်မဖော်လိုသည့်မွတ်ဆလင်ဒုက္ခသည်စခန်းတာဝန်ခံတစ်ဦးက "ကျွန်တော်တို့ကလူကုန်ကူးမှုတွေချည်းဖြစ်နေတော့ လူကုန်ကူးမှုတွေ နောက်ထပ် ထပ်မဖြစ်ရအောင်တားဆီး ပေးစေချင်တယ်။စခန်းအတွင်းက လူတွေကို အသိပညာပေးတွေ သင်ကြားပေးစေချင်တယ်။အလုပ်အကိုင်ရမယ်ဆိုရင် မစဉ်းစားတော့ဘဲ အယုံလွယ်ပြီး လိုက်သွားရာကနေလူကုန်ကူးခံရတာတွေများနေတယ်။ အဲ့ဒါတွေမဖြစ်ရအောင် လူကုန်ကူးမှုတိုက်ဖျက်ရေးအဖွဲ့တွေက ဖြစ်ဖြစ် အသိပညာပေးတာတွေလုပ်ဆောင်ပေးစေချင်တယ်"ဟု ပြောသည်။

လူကုန်ကူးခံရသည့်ဒုက္ခသည်များမှာလူကုန်ကူးသူများက တောင်းယူသည့်ငွေကြေးပမာကို ပေးဆောင်နိုင်လျှင်ပြန်လည်လွတ်မြောက်လာကြသူများရှိပြီး ငွေကြေးမတတ်နိုင်သည့် ဒုက္ခသည်အများစုမှာအသက်ဆုံးရှုံးမှုအထိရှိနေသည်ဟုလည်း သိ၇သည်။

ပြီးခဲ့သည့် ဇူလိုင်လ၁၉ ရက်၊ ညအချိန်ကလည်း ပေါက်တောမြို့နယ်ရှိ ကြိမ်နီပြင်ဒုက္ခသည်စခန်းမှမွတ်ဆလင်ကျောင်းသားငယ် ၃ ဦးသည် အမည်မသိအဖွဲ့တစ်ခု၏ ပြန်ပေးဆွဲခြင်းကိုခံခဲ့၇သည်။

တစ်ဦးလျှင် ကျပ်သိန်း၁၀၀ မပေးပါက အသက်အန္တရာယ်ထိခိုက်နိုင်သည်ဟု ပြန်ပေးဆွဲအဖွဲ့က မိသားစုထံဆက်သွယ်ခြိမ်းခြောက်မှုဖြစ်ပွားခဲ့သေးသည်။

အလားတူ ဇူလိုင်လ၁ ရက်ကလည်း စစ်တွေမြို့နယ်၊ အုန်းတောကြီး(မြောက်) ဒုက္ခသည်စခန်းမှမမောတ်ဆော်လိမ် (၁၆)နှစ်၊ ခေါင်းဒုက္ကာကျေးရွာမှ ဟာလာယာ၊ ဆော်ယောတ်တာမိန်နှင့်ဘောဒူဖကျေးရွာမှ တာဟာရ်ဆိုသူတို့ ၄ ဦးသည် ခေါင်းဒုက္ကာကျေးရွာမှဘိုင်တားယာဆိုသူက ရသေ့တောင်မြို့နယ်တွင် အလုပ်အကိုင်ရရှိမည်ဟုဆိုကာလိမ်လည်ခေါ်ယူပြီးနောက် လူကုန်ကူးခံလိုက်ရသည်ဟု သိ၇သည်။