ရခိုင်ရိုးရာသင်္ကြန်ကို ယူနက်စကိုတင်သွင်းနိုင်ရေး စစ်ကောင်စီ ဆောင်ရွက်လာပြန်

ရခိုင်ရိုးရာသင်္ကြန်ကို ကမ္ဘာ့ယဉ်ကျေးမှုအမွေအနှစ်(UNESCO) စာရင်းတင်သွင်းနိုင်ရေးအတွက်စစ်ကောင်စီ၏ယဉ်ကျေးမှုဝန်ကြီးဌာနက စီစဉ်နေကြောင်း သတင်းရရှိသည်။

ယင်းသို့တင်နိုင်ရေးအတွက်ကိုလည်း ပြီးခဲ့သည့်စက်တင်ဘာလ ၁၄ ရက်က စစ်တွေမြို့ရှိ ယဉ်ကျေးမှုပြတိုက်တွင် ပြတိုက်တာဝန်ရှိသူများကစစ်တွေရှိ စာရေးဆရာများအနက် ဆရာစစ်တွေညိုသန့်၊ ဆရာလွမ်းပြေအောင်နှင့်ဆရာခိုင်မော်ကွန်းတို့ ၃ ဦးကို ရခိုင်ရိုးရာ သင်္ကြန်နှင့်ပတ်သက်ပြီးအလွတ်သဘောဆွေးနွေးမှုတစ်ခုပြုလုပ်ပေးခဲ့သည်ဟု သိရသည်။

ဆရာခိုင်မော်ကွန်းက"မြန်မာ့ရိုးရာကို ထိုင်းနိုင်ငံကနေ ထိုင်းရိုးရာဖြစ်ကြောင်း ယူနက်စကိုမှာ တင်ဖို့လုပ်နေကြတယ်။ ထိုင်းမှာလည်းထိုင်းမှာရှိတဲ့ထိုင်းရိုးရာ၊ မြန်မာမှာလည်း မြန်မာမှာရှိတဲ့ရိုးရာ၊ ရခိုင်မှာလည်းရခိုင်မှာရှိတဲ့ရိုးရာရှိတဲ့အကြောင်းကို ယဉ်ကျေးမှုဌာနက ဒေသခံပညာရှင်တွေနဲ့ ထွက်ဆိုချက်၊ဆွေးနွေးချက်တွေကိုလိုချင်တယ်ဆိုလို့ အဲဒီပြတိုက်မှာဆွေးနွေးပွဲလုပ်ဖြစ်တာပါ" ဟုပြောသည်။

အဆိုပါဆွေးနွေးမှုတွင်ရခိုင်ရိုးရာသင်္ကြန်ပွဲသည် မြန်မာနိုင်ငံနှင့် ထိုင်းနိုင်ငံတို့တွင်ကျင်းပသည့် သင်္ကြန်ပွဲပွဲနှင့်မတူဘဲတမူထူးခြားမှုရှိသည့်အချက် ၅ ချက်ကို အဓိကထားဆွေးနွေးခဲ့ကြသည်ဟု ဆိုသည်။

ယင်းအချက်များမှာ သင်္ကြန်အကြိုပထမနေ့ ဧပြီလ ၁၂ ရက်နေ့တွင် ရခိုင်ရိုးရာနံ့သာသွေးခြင်း၊ ဒုတိယနေ့သွေးယူထားသည့် နံ့သာရေများဖြင့် ဧပြီလ ၁၃ ရက်တွင် ဘုရားရေသပ္ပာယ်ပူဇော်ခြင်း၊တတိယနေ့ ဧပြီ ၁၄ ရက်မှ ဆဋ္ဌမနေ့ ဧပြီလ ၁၇ ရက်နေ့အထိမှာရိုးရာလောင်းလှေများဖြင့် ရေကစားခြင်းနှင့် ကာလသားများက မြို့/ရွာတွင်နွားလှည်းများနှင့် လှည့်ပတ်ပြီး အိုးစည် ဗုံမောင်းတိတီးမှုတ်ကာသံချပ်ထိုးခြင်းများကို ပြုလုပ်တတ်ကြသည်။

ပဥ္စမနေ့ ဧပြီလ၁၆ ရက်နေ့တွင် သင်္ကြန်အတက်နေ့ဖြစ်သောကြောင့် ယင်းနေ့ကျရောက်သော ရက်သားများအတွက်ကံဇာတာ အားနည်းမှု၏ နိမိတ်ရက်အဖြစ် အစာတက်နေ့ဟု သတ်မှတ်တတ်သည်။ ယင်းနေ့မနက်ပိုင်းတွင် ဆွမ်းပို့/မုန့်လှူခြင်း၊ ညနေပိုင်းတွင် ဘုရားစေတီရှိရာသို့သွားရောက်ပြီးမိမိ၏ ဂြိုဟ်နံဘုရားကို ရေချမ်းအိုး သက်စေ့ပူဇော်မှုပြုလုပ်ခြင်း တို့ကို လုပ်ဆောင်ကြသည်။

ဆဋ္ဌမနေ့ ဧပြီလ ၁ရရက်နေ့တွင် နှစ်ဆန်းတစ်ရက်အဖြစ် သတ်မှတ်ချက်အရ ကုသိုလ်ကောင်းမှု အသီးသီးပြုလုပ်ခြင်း၊ သက်ကြီးပူဇော်ခြင်း၊ငါးရှင်လွှတ်ခြင်း၊ အိမ်ရှေ့တွင် ဦးခေါင်းဆေး မင်္ဂလာပြုပြီးအတာအိုး ထားရှိခြင်းစသည့် ရခိုင့်ရိုးရာကိုယ်ပိုင်ဟန်များကို ပြုလုပ်တတ်ကြကြောင်း ဆွေးနွေးခဲ့ကြသည်ဟုသိ၇သည်။

ယခုကိစ္စနှင့်ပတ်သက်ပြီးရခိုင်ပြည်နယ်အမျိုးသားပြတိုက်နှင့်ယဉ်ကျေးမှုဦးစီးဌာနသို့ နိရဉ္စရာကဆက်သွယ်မေးမြန်းခဲ့ရာ သတင်းဌာနများ၏မေးမြန်းချက်များကိုနေပြည်တော်သို့တင်ပြရမည်ဖြစ်ပြီးယင်းမှခွင့်ပြုချက်ရမှသာ ဖြေကြားပေးနိုင်မည်ဟု တုံ့ပြန်ခဲ့သည်။

ယခုကဲ့သို့ရခိုင်တစ်မျိုးသားလုံးနှင့်သက်ဆိုင်သည့် ရခိုင်ရိုးရာသင်္ကြန်ပွဲတော်အကြောင်းကို ယူနက်စကိုသို့တင်သွင်းပြီးယူနက်စကိုကလည်း အသိအမှတ်ပြုလျှင် ရခိုင်တစ်မျိုးသားလုံးအတွက် အလွန်တရာဂုဏ်ယူဝမ်းမြောက်ဖွယ်ရာပင်ဖြစ်သည်ဟု စစ်တွေမြို့မိမြို့ဖတစ်ဦးဖြစ်သူဦးကိုလေးက ပြောသည်။

"ရခိုင်ရိုးရာသင်္ကြန်ကိုယူနက်စကိုကအသိမှတ်ပြုတယ်ဆိုရင် ရခိုင်ပြည်မှာ ဒီလိုရိုးရာ သင်္ကြန်ရှိတယ်ဆိုတာက ငါတို့ရခိုင်သားတွေလည်း ဖော်ထုတ်လို့ရတယ်။ ယူနက်စကိုကလည်း အသိမှတ်ပြုမယ်ဆိုရင်ကောင်းပါတယ်" ဟု နိရဉ္စရာကိုပြောသည်။

ရခိုင်ရိုးရာသင်္ကြန်ပွဲသည်၇ခိုင်တွင် ဓည၀တီခေတ်မှစတင်ပေါ်ပေါက်လာခြင်းဖြစ်သည်ဟု ရခိုင်သမိုင်းမှတ်တမ်းများအရသိရသည်။

မဟာသက္ကရာဇ် ၁၂၃ခုနှစ်တွင် ၇ခိုင် ဓည၀တီပြည့်ရှင် ဘုရင်စန္ဒသူရိယက မဟာမုနိ ဆင်းတုတော်မြတ်ကို သွန်းလုပ်ပြီးစီးသည့်အခါ တိုင်းသူပြည်သားများက ကြိုတင် သွေးယူထားကြသည့် နံ့သာရေများဖြင့် ဆင်းတုတော်အားပက်ဖြန်းကြပြီးပိုလျှံသည့် နံ့သာရေများဖြင့် ပြည်သူပြည်သားများကိုယ်တိုင်ဝမ်းမြောက်ပျော်ရွှင်ပြီး တစ်ဦးနှင့်တစ်ဦး ပက်ဖြန်းခဲ့ကြရာမှ ရခိုင်ရိုးရာ သင်္ကြန် ရေကစားမှု စတင်ပေါ်ပေါက်လာခြင်းဖြစ်သည်ဟုရခိုင်စာပေနှင့်ယဉ်ကျေးမှုအသင်း(ရန်ကုန်)မှတာဝန်ရှိသူများ၏ပြောပြချက်များအရ သိရသည်။

ယင်းအပြင်ရခိုင်ရိုးရာသင်္ကြန်ပွဲတော်တွင် အခြားတိုင်းနှင့် ပြည်နယ်များရှိသင်္ကြန်ပွဲတော်များနှင့်မတူသည့်အချက်တစ်ခုမှာလောင်းလှေများတွင် ရေများဖြည့်ကာ ရခိုင်လှပျိုဖြူများနှင့် ကာလသားများကအချင်းချင်း ရေပက်ကစားတတ်ကြခြင်းဖြစ်သည်။

ရခိုင်ဒေသသည်မြစ်ချောင်းအင်းအိုင်ပေါများပြီး ရေလုပ်ငန်းကိုအဓိကထားလုပ်ကိုင်ကြသည့်အတွက် လောင်းလှေများ ပေါများစွာရှိနေသည့်အတွက်ရေပက်ကစားကြရာတွင် ယခုကဲ့သို့ လောင်းလှေများကို အသုံးပြုကြခြင်းဖြစ်သည်ဟုလည်းသိရသည်။

ရခိုင့်ရိုးရာသင်္ကြန်ပွဲတော်ကို ယူနက်စကိုဝင်ရောက်နိုင်ရန်အတွက်လူငယ်များအနေဖြင့်လည်း ရခိုင်သင်္ကြန်ကာလအတွင်း သရုပ်ပျက်ဝတ်စားဆင်ယင်မှုများနှင့်သောက်စားမူးယစ်ခြင်းများကို အလွန်အကျွံမလုပ်သင့်ဘဲ ဆင်ခြင်သင့်သည်ဟုရခိုင့်ယဉ်ကျေးမှုမြတ်နိုးထိန်းသိမ်းသူများက ထောက်ပြပြောဆိုကြသည်။

ရခိုင်တွင်ရှေးဟောင်းယဉ်ကျေးမှုအမွေအနှစ်ဒေသဖြစ်သည့် မြောက်ဦးဒေသကိုလည်း ယူနက်စကို စာရင်းဝင်နိုင်ရေး ဆောင်ရွက်လျက်ရှိသော်လည်း စစ်တပ် အာဏာသိမ်းပြီးချိန်မှ စတင်ပြီး ယူနက်စကိုက အဆက်အသွယ်မလုပ်တော့ဟု သိ၇သည်။

ရခိုင်ရိုးရာသင်္ကြန်ကို ယူနက်စကိုတင်သွင်းနိုင်ရေး စစ်ကောင်စီ ဆောင်ရွက်လာပြန်

ဆက်စပ် အကြောင်းအရာများ

နောက်ဆုံးရသတင်းများ