၇ခိုင်ပြည်နယ်၊ မာန်အောင်မြို့မှစီးပွားရေးလုပ်ငန်းရှင် ဦးစည်သူအောင်(ခ) ဦးခေါင်းဖြူကို ဖမ်းဆီးခြင်းနှင့် ပတ်သက်ပြီး စစ်ကောင်စီပိုင် သတင်းစာများတွင် ယနေ့ စွပ်စွဲဖော်ပြသည်။

မာန်အောင်မြို့၊မြို့သစ်ရပ်ကွက်ရှိ ဦးစည်သူအောင်(ခေါ်)ဦးခေါင်းဖြူကို နိုင်ငံတော်တည်ငြိမ် အေးချမ်းရေးအားပျက်ပြားစေရန်ရည်ရွယ်ကာ လူမှုကွန်ရက်စာမျက်နှာပေါ်၌ လှုံ့ဆော်ခြင်း၊ဝါဒဖြန့်ခြင်းများပြုမူလုပ်ဆောင်ခဲ့သည့်အတွက် တရားဥပဒေနှင့်အညီဖမ်းဆီးထိန်းသိမ်းအမှုဖွင့်လှစ်အရေးယူခြင်းဖြစ်သည်ဟုဖော်ပြထားသည်။

တစ်ခြား ပြည်သူအများအပြားကိုလည်း ထိုကဲ့သို့ နိုင်ငံတော်တည်ငြိမ်မှုကိုပျက်ပြားအောင်လုပ်ဆောင်၍ ဖမ်းဆီးကြောင်း သတင်းတွင် ဖော်ပြထားသည်။

အသက် ၅၀ ကျော်အရွယ်ဗမာလူမျိုး ဦးစည်သူအောင်(ခေါ်)ဦးခေါင်းဖြူကို စက်တင်ဘာ ၁၉ ရက်၊ညနေပိုင်းတွင် စစ်ကောင်စီတပ်က ရပ်ကွက်အုပ်ချုပ်ရေးမှူးနှင့်ရဲတပ်ဖွဲ့ဝင်များနှင့်အတူ နေအိမ်အတွင်းမှ ဖမ်းဆီးသွားခြင်းဖြစ်သည်ဟုမာန်အောင်မြို့ခံများက ပြောသည်။

ယင်းသို့ဖမ်းဆီးပြီးနောက် မာန်အောင်မြို့မရဲစခန်းတွင် ပြည်သူ့ကာကွယ်ရေးတပ်(PDF)နှင့် ဆက်သွယ်သည်ဟုဆိုကာ ပုဒ်မ ၅၀၅-က ဖြင့်အမှုဖွင့်ထားကြောင်း သိ၇သည်။

ဖမ်းဆီးခံ၇ပြီးနောက်ယနေ့ စက်တင်ဘာလ ၂၂ ရက်အထိ မိသားစုနှင့်တွေ့ဆုံခွင့်မ၇သေးဟုလည်းအမည်မဖော်လိုသည့်ဒေသခံတစ်ဦးက ပြောသည်။

ဖမ်းဆီးခံ၇သည့် ဦးစည်သူအောင်သည်မာန်အောင်မြို့မဈေးအနီးတွင် မေဃသစ္စာ ဖုန်းအရောင်းဆိုင်နှင့်ငွေလွှဲဝန်ဆောင်မှုလုပ်ငန်းကို လုပ်ကိုင်သူဖြစ်သည်။

ဦးစည်သူအောင် အမှုဖွင့်ခံထား၇သည့်ပုဒ်မ ၅၀၅-က မှာ ပြည်သူလူထုအကြား ကြောက်ရွံ့ထိတ်လန့်စေခြင်း၊ ကောလာဟလ(မမှန်သတင်း)များဖြန့်ချိခြင်း၊ နိုင်ငံ့ဝန်ထမ်းများအပေါ်ရာဇဝတ်ပြစ်မှုကျူးလွန်စေရန် တိုက်ရိုက်(သို့) သွယ်ဝိုက်လှုံ့ဆော်လျှင်ပြစ်မှုမြောက်သည်ဟု သိ၇သည်။

ပြစ်ဒဏ်မှာသုံးနှစ်အထိ ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်နိုင်သည်ဟုသိ၇သည်။

မာန်အောင်မြို့နယ်တွင်PDF နှင့်ဆက်စပ်သံသယဖြင့်ဒေသခံအချို့အား ဖမ်းဆီးရန် စစ်ကောင်စီတပ်က လိုက်လံရှာဖွေမှုများနှင့်၀ရန်းပြေးစာများကပ်ခြင်းများကို စစ်အာဏာသိမ်းပြီးနောက်ပိုင်းတွင်ပိုမိုရှိလာသည်ဟု ဒေသခံတစ်ဦးက ပြောသည်။

သံတွဲမြို့နယ်အပါအဝင်ရခိုင်ရှိ မြို့အချို့တွင်ပြီးခဲ့သည့် ၂၀၂၂ ခုနှစ်က အမျိုးသမီးအချို့အပါအဝင် လူမှုရေးလှုပ်ရှားသူအချို့နှင့်ဒေသခံအချို့သည် PDF နှင့်ဆက်စပ်ပြီးPDF အားငွေကြေးထောက်ပံ့သည်ဟုဆိုကာ စစ်ကောင်စီ၏ ထောင်ဒဏ်နှစ်ရှည်ချမှတ်ခံထားရသည်ဟုသိ၇သည်။ (NN-11)

ဓာတ်ပုံ -ဖမ်းဆီးအမှုဖွင့်ခံရသည့် ဦးစည်သူအောင် အားတွေ့၇စဉ်။ (Photo - Sithu AungFacebook)