စစ်သားအများအပြားကိုတင်ဆောင်ပြီး စစ်ကောင်စီရေတပ်သင်္ဘော ၆ စီး ဓည၀တီရေတပ်စခန်းမှ ပင်လယ်ပြင်သို့ ထွက်ခွာ

ရခိုင်ပြည်နယ်၊ ကျောက်ဖြူမြို့၊ သစ်ပုတ်တောင်ရှိ စစ်ကောင်စီ ဓညဝတီရေတပ်ဌာနချုပ်မှ နေဗီစစ်သင်္ဘော ၆ စီးသည် ယမန်နေ့ စက်တင်ဘာလ ၂၃ ရက် နံနက် ၆ နာရီနှင့် ၇ နာရီကြားတွင်  စစ်သည်အင်အားအပြည့်ဖြင့် ပင်လယ်ပြင်သို့ထွက်ခွာသွားခြင်းဖြစ်ကြောင်း မျက်မြင်ကျောက်ဖြူ ဒေသခံတစ်ဦးကပြောသည်။

ဓညဝတီရေတပ်ဌာနချုပ်မှအမှတ် ၅၅၅၊ ၅၄၀ ၊ ၅၇၀ ၊ ၅၆၁ နေဗီစစ်သင်္ဘော ၄ စင်းနှင့် နောက်ထပ်ရေတပ် စစ်သင်္ဘောနှစ်စင်းတို့ ထွက်ခွာသွားခြင်းဖြစ်ကြောင်းသိရသည်။

" မနေ့က မနက်ပိုင်းက ရေတပ်စခန်းက နေဗီ ၆ စီးထိ ပင်လယ်ဘက်ထွက်ခွာသွားတာတွေ့ရပါတယ်။ စစ်သင်္ဘော ၆ စီးမှာ ခန့်မှန်းစစ်အင်အား ၅၀၀ ခန့်လောက်ပါမယ်လို့ ထင်ရပါတယ်” ဟု သူကပြောသည်။

ယခုကဲ့သို့ စစ်သည်အင်အားအပြည့်နှင့် ပင်လယ်ပြင်သို့ထွက်ခွာသွားခြင်းမှာ ပင်လယ်ပြင်တွင်  စစ်ရေးလှုပ်ရှားမှု (သို့မဟုတ်) စစ်သည်အရွှေ့အပြောင်းလုပ်ခြင်းဖြစ်နိုင်ကြောင်း ဒေသခံများက သုံးသပ်ပြောဆိုသည်။

နိရဉ္စရာ သတင်းဌာက ရရှိသော သတင်းအရ စစ်ကောင်စီသည် ယနေ့ စက်တင်ဘာလ ၂၄ ရက် တွင် စစ်တွေမြို့ အနောက်တောင်ဘက်ရှိ မေယုမီးပြတိုက်က အနောက်တောင်ဘက်  ၁၅ ဒဿမ ၅ မိုင်ခန့် အကွာ ပင်လယ်ပြင်တွင် ရေတပ်သင်္ဘောများဖြင့် စစ်ရေးလေ့ကျင့်မည်ဟု သိရသည်။