(စစ်ကောင်စီအကူအညီမရကြ၍ စုပေါင်းအလှူများနှင့်ကိုယ်ထူကိုယ်ထပြုပြင်နေကြရ)

ရခိုင်တွင်မိုခါမုန်တိုင်းကြောင့်ပျက်စီးသွားခဲ့သည့် ဘာသာရေးအဆောက်အအုံအများစုကို ပြန်လည်ပြုပြင်ရန်စစ်ကောင်စီ၏အကူအညီမ၇ကြ၍ မုန်တိုင်းအပြီး ၄ လကျော်ကြာသည့်တိုင်ပြုပြင်မှုမပြီးစီးနိုင်ဖြစ်နေကြရသည်ဟု သိရသည်။

စစ်ကောင်စီထံမှ ကူညီထောက်ပံ့မှုမရရှိသေးသဖြင့် စုပေါင်းအလှုများနှင့် ကိုယ်ထူကိုယ်ထ ပြုပြင်နေ၇ကာငွေကြေးမလုံလောက်မှုကြောင့် ပြုပြင်တည်ဆောက်မှုများမပြီးစီးနိုင်သေးဘဲဖြစ်နေကြောင်း ဒေသခံများက ပြောဆိုကြသည်။

စစ်တွေမြို့၊ဝေသာလီမိုးကုတ်ဘုန်းတော်ကြီးကျောင်းမှ ကျောင်းထိုင်ဆရာတော်က"ပျက်စီးသွားတဲ့ ကျောင်းဆောင်တွေက များတယ်။ သိမ်တွေ၊ဓမ္မာရုံတွေလည်းအကုန်ပျက်စီးသွားတယ်။ ပြန်လည် ပြုပြင်မယ်ဆိုသိန်းထောင်နဲ့ချီကုန်ကျနိုင်တယ်။ တကာ/မတို့ရဲ့ စုပေါင်းအလှူတွေနဲ့ကိုယ်ထူကိုယ်ထဆိုသလို ပြန်ပြုပြင်နေရတယ်" ဟု မိန့်သည်။

အဆိုပါကျောင်းတွင်သိမ်၊ ဓမ္မာရုံနှင့် ဘုရားကျောင်းအဆောက်အအုံတို့အပါအဝင် အဆောက်အအုံ ၁၂ ခုခန့်ပျက်စီးသွားသည်ဟု သိရသည်။

၇ခိုင်တွင်ပြီးခဲ့သည့် မေလ ၁၄ ရက်နေ့က တိုက်ခတ်ခဲ့သည့် မိုခါဆိုင်ကလုန်းမုန်တိုင်းကြောင်းဗုဒ္ဓဘာသာ၊ ဟိန္ဒူ၊ အစ္စလာမ်နှင့် ခရစ်ယာန် စသည့်ဘာသာရေးအဆောက်အအုံ အများအပြားမှာဆိုးဆိုးဝါးဝါးပျက်စီးခဲ့ကြသည်။

ယင်းအနက်ပျက်စီးသွားသည့် ဘာသာရေးအဆောက်အအုံ ၄၀ ကျော်ကို စစ်ကောင်စီက ဦးစားပေးအနေဖြင့်ကူညီထောက်ပံ့မှုများပြုလုပ်သွားမည်ဟု ပြောဆိုခဲ့၍ သာသနာရေးဌာနကပျက်စီးသွားသည့်အဆောက်အအုံများ၏ တန်ဖိုးစာရင်းများကို လာရောက်ကောက်ယူသွားမှု ရှိခဲ့သည်ဟုသိရသည်။

သို့သော်လည်း ယခုအချိန်ထိမည်သည့်ကူညီထောက်ပံ့မှုမှ မရရှိသေးဟု စစ်တွေမြို့၊ ဝေသာလီ မိုးကုတ်ဘုန်းတော်ကြီးကျောင်းမှကျောင်းထိုင်ဆရာတော်က ဆက်မိန့်သည်။

"ဆရာတော်ကတော့သိန်းရှစ်ရာလောက်တင်လိုက်တယ်။ အမှန်တကယ်လိုအပ်တာက သိန်းနှစ်ထောင်ကျော်လောက်လိုမယ်။ဓမ္မာရုံတစ်ခုပြန်ဆောက်မယ်ဆိုရင်တောင် အခုကာလဈေးနဲ့သိန်းနှစ်ထောင်လောက်ကုန်ကျမယ်။ ဒါတောင် ပျက်စီးသွားတာကို ပြန်ပြုပြင်မှာ။အစိုးရကိုတော့ လျှော့ပေါ့ပြီးတင်လိုက်တာ။ အပြည့်တင်လည်း အပြည့်ရမှာမဟုတ်ဘူး။သွပ်ပြားအချပ် တစ်ရာ့ငါးဆယ်ရမယ်လို့ပြောတယ်။ တကယ်တမ်းရလာတော့သွပ်အချပ်ငါးဆယ်နဲ့ သစ်တန်ခွဲရတယ်။ အဲ့ဒါကလွဲပြီး အခုချိန်ထိဘာကူညီထောက်ပံ့မှုမှမရရှိသေးဘူး" ဟု မိန့်သည်။

နယ်ကျေးလက်များတွင် ပျက်စီးသွားသည့်ဘာသာရေးအဆောက်အအုံအချို့အတွက် စစ်ကောင်စီက ထောက်ပံ့ပေးသည့်သွပ်ချပ်များမှာ အရည်အသွေးညံ့ပြီး အလွန်တရာပါးလွှာသည့်အတွက်အဆင်မပြေဖြစ်ခဲ့ကြရသည်ဟုလည်း ရသေ့တောင်မြို့နယ်မှ ကျောင်းထိုင်ဆရာတော်တစ်ပါးကနိရဥ္စရာကို မိန့်သည်။

“အစိုးရဆီကတော့ သွပ်အမိုးအချပ် တစ်ရာ့နှစ်ဆယ်နဲ့ သစ်တန်ခွဲပေးတယ်။ သွပ်က ပါးတယ်။ မိုးလို့အဆင်မပြေဘူး။အသစ်ဝယ်ပြီးတော့ မွမ်းမံတယ်။ ကျောင်းကတော့ ခေါင်းမိုးနဲ့သစ်တွေပါကွာကျပြီးတော့ အုတ်ရိုးတစ်ခုပဲ ကျန်ခဲ့တာ။ ကျောင်းခြံစည်းရိုးနံရံတွေလည်းပြိုသွားတယ်။ ကိုယ်ဘာသာကိုယ် မွမ်းမံရတာပေါ့။ အခုပြီးပြီးလားဆိုတော့မပြီးသေးဘူး။ ရွာကအလှူရှင်တွေဆီက ကောက်ခံပြီးမွမ်းမံနေရဆဲပဲ”ဟု နိရဥ္စရာကိုမိန့်သည်။

မိုခါဆိုင်ကလုန်းမုန်တိုင်းကြောင့်ပျက်စီးသွားသည့်ဘာသာရေးအဆောက်အအုံများအနက် မြို့ပေါ်ရှိ အဆောက်အအုံများပင်စစ်ကောင်စီ၏အကူအညီကို မရဘဲ ယနေ့အချိန်ထိ ရှိနေသေးသည်ဟု သိရသည်။

စစ်တွေမြို့ရှိရွှေနှလုံးတော်ကက်သလစ်ဘုရားကျောင်းမှ ဖာသာမိုင်ကယ်က"ရွှေနှလုံးတော်ကျောင်းက ဘုရားကျောင်းဆောင်ခေါင်မိုးလောက်ပဲ ပျက်စီးသွားတာ။အဲ့ဒါကို အသင်းတော်က ထောက်ပံ့ငွေတွေနဲ့တော့ သွပ်မိုးပြီးပြုပြင်ထားတယ်။ဘယ်ကမှ ကူညီထောက်ပံ့မှုမရပါဘူး။ ကူညီထောက်ပံ့မှုမရလို့ မပြင်ဘဲထားရင်ဘုရားဝတ်ပြုဖို့က မိုးရွာ၊ နေပူနဲ့ အဆင်မပြေဘူး" ဟု နိရဥ္စရာကိုပြောသည်။

၇ခိုင်တွင်မုန်တိုင်းသင့်ပြည်သူများကို စစ်ကောင်စီက အပြည့်အ၀ ကူညီထောက်ပံ့နိုင်ခြင်းမရှိဘဲနိုင်ငံတကာအဖွဲ့အစည်းများ၏သွားလာကူညီထောက်ပံ့ခွင့်ကို စစ်ကောင်စီကပိတ်ပင်ထားသည်ဟု သိရသည်။

ယင်းကြောင့်မုန်တိုင်းသင့်ပြည်သူများ ပြန်လည်ထူထောင်ရာတွင် များစွာအခက်ကြုံနေကြရဆဲဟုမုန်တိုင်းသင့်ပြည်သူများက ပြောကြသည်။

ယင်းအခြေအနေတွင်ရခိုင်ပြည်နယ် စစ်ကောင်စီဥက္ကဋ္ဌ ဦးထိန်းလင်းက မိုခါဆိုင်ကလုန်မုန်တိုင်း ဒဏ်သင့် ရခိုင်ပြည်နယ်အတွက်စစ်ကောင်စီ၏ ပြန်လည်ထူထောင်ရေးကာလ ပြီးဆုံးပြီသွားပြီဟု ပြီးခဲ့သည့်စက်တင်ဘာလ ၂၀ ရက်နေ့က ပြည်နယ်ကောင်စီ အစိုးရအဖွဲ့ရုံးခန်းမတွင် ပြည်နယ်အဆင့်အစိုးရအရာရှိများ တက်ရောက်သည့် မုန်ခါမုန်တိုင်းကြောင်း ပျက်စီးမှုပြန်လည်ထူထောင်ရေး စီမံကိန်းရေးဆွဲရေး အစည်းအဝေးတွင် ပြောဆိုသွားခဲ့သည်။

သို့သော်လည်းမုန်တိုင်းသင့်ပြည်သူများအနေဖြင့် လိုအပ်ချက်များစွာရှိနေသေးပြီး အခုအချိန်ထိ အမိုးအကာမလုံခြုံဘဲ နေရသူများ နယ်ဘက်တွင်အများကြီးရှိနေသေးကာ ဘာသာရေး အဆောက်အအုံများနှင့် စာသင်ကျောင်းဆောင်များမှာလည်ယခုအချိန်ထိ ပြုပြင်နိုင်ခြင်းမရှိသေးဟု သိ၇သည်။

ဓာတ်ပုံ- ပုဏ္ဏားကျွန်းမြို့နယ်ရှိ ဘုန်းတော်ကြီးကျောင်းတစ်ကျောင်းမိုခါကြောင့်ပျက်စီးသွားခဲ့သည်ကိုတွေ့၇စဉ်။