ရခိုင်ပြည်နယ်၊ ရသေ့တောင်မြို့နယ်တွင်အသတ်ခံလိုက်ရသည့် အလယ်တန်းပြကျောင်းဆရာမ ဒေါ်နှင်းယုနွယ်အမှုတွင်ထွက်ပြေးလွတ်မြောက်နေသည့် အဓိက သံသယရှိသူကို ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော်(ULA/AA)က ပြန်ဖမ်းမိပြီဟုသတင်းရရှိသည်။

ထွက်ပြေးနေသည့် အသက်၄၀ ကျော်အရွယ် ဦးမောင်မောင်အေးကို ယနေ့ စက်တင်ဘာ ၂၆ ရက်တွင် သူ၏ အစ်မနေထိုင်ရာကျွန်းပေါ်ပေါက်တောမှ နေအိမ်အတွင်း ဖမ်းမိခဲ့ခြင်းဖြစ်သည်ဟု ဒေသခံတစ်ဦးက ပြောသည်။

"သူ့အစ်မနေတဲ့မယူတောင်က အိမ်မှာပုန်းနေတယ်ကြားလို့ ULA /AA ကဖမ်းဆီးနိုင်ခဲ့တယ်" ဟုပြောသည်။

ဦးမောင်မောင်အေးသည်စက်တင်ဘာလ ၁၉ ရက်၊ ည ၉ နာရီခွဲခန့်တွင် ULA/AA လက်ထဲမှ ထွက်ပြေးလွတ်မြောက်သွားခြင်းဖြစ်ပြီးတစ်ပတ်အကြာတွင် ပြန်လည်ဖမ်းမိခဲ့ခြင်းဖြစ်သည်။

သူသည်ဆရာမဒေါ်နှင်းယုနွယ်အသတ်ခံ၇မှုတွင် ULA/AA က သံသယဖြင့် စစ်ဆေးနေရသည့် အဓိကသံသယရှိသူ ၂ ဦးအနက် တစ်ဦးဖြစ်သည်။

ဆရာမအမှုနှင့်ပတ်သက်ပြီး နောက်ထပ်ဆက်စပ်သံသယရှိသူ ၁ ဦးနှင့် ဆရာမအလောင်းအား မျက်မြင်တွေ့ရှိသူ ၆ ဦးတို့ကိုလည်းULA/AA ကစစ်ဆေးနေသည်ဟု စက်တင်ဘာလ ၂၃ ရက်တွင် ထုတ်ပြန်ထားသည်။

ဆရာမဒေါ်နှင်းယုနွယ်၏မိသားစုဝင်တစ်ဦးက“လူသတ်တရားခံနဲ့တကွအပေါင်းအပါတွေ အကုန်လုံးကို၊တကယ့်တရားခံအစစ်တွေကို အမြန်ဆုံးအနေနဲ့ ဖမ်းဆီးအရေးယူပေးဖို့။ဖမ်းဆီးအရေးယူပေးတဲ့နေရာမှာလည်း မိသားစုဝင်တွေရောသိရမယ်။ နောက်ပြီးတော့ ပြည်သူတစ်ရပ်လုံးလည်းသိအောင် တိတိကျကျထွက်ပြေးနေတဲ့တရားခံကိုရော၊နောက်ပြီးတော့ ဒီတကယ့်တကယ့် အမှုနဲ့ပတ်သက်တဲ့တရားခံကိုရောအမြန်ဆုံးအနေနဲ့ဖမ်းဆီးပြီးတော့ ပြည်သူတစ်ရပ်လုံးသိအောင်မိသားစုဝင်တွေရောသိအောင် အရေးယူပေးပါ၊ ဆောင်ရွက်ပေးပါလို့ပြောချင်ပါတယ်ခင်ဗျာ”ဟု ပြောသည်။

ယင်းအပြင် သေဆုံးသွားသူအလယ်တန်းပြဆရာမ ဒေါ်နှင်းယုနွယ်၏ ရွာ ပေါက်တောကျွန်းပေါ်ရွာတွင် ULA/AAတပ်သား ရဲမေ အယောက်၂၀၀ ခန့်ဖြင့် လုံခြုံရေးချထားကြောင်း သိ၇သည်။

အသက် ၃၇ နှစ်အရွယ် အလယ်တန်းပြကျောင်းဆရာမဒေါ်နှင်းယုနွယ်သည် သူနေထိုင်ရာ ရသေ့တောင်မြို့နယ်၊ ကျွန်းပေါ်ပေါက်တောကျေးရွာမှပန်းဖော်ပြင် အလယ်တန်းကျောင်းသို့ စက်တင်ဘာလ ၁၆ ရက်၊ နံနက်ကစာပြရန်သွားစဉ် လမ်းတွင် အသတ်ခံလိုက်ရသည်။

လည်ပင်းကိုလှီးဖြတ်ခံထားရသည့်ဒဏ်ရာဖြင့်သေဆုံးနေသည့်ဆရာမ၏အလောင်းကို ယင်းနေ့၊ နံနက် ၁၁နာရီခန့်တွင် ပန်းဖော်ပြင်ကျေးရွာနှင့် ကျွန်းပေါ်ပေါက်တောလမ်းမကြီးပေါ်၌ဒေသခံများက တွေ့ရှိခဲ့ပြီး ယင်းနေ့ ညနေ ၆ နာရီခန့်တွင်မြေမြှုပ်သင်္ဂြိုလ်လိုက်ကြောင်း သိရသည်။

ဆရာမအသတ်ခံရမှုတွင်အဓိက သံသယရှိသူ ဦးမောင်မောင်အေးထွက်ပြေးလွတ်မြောက်သွားသည့်အတွက်လည်းရခိုင်ရှိ ပညာရေးအသိုင်းအဝိုင်းတစ်ခုလုံးနှင့် ဒေသခံလူထုများကအားမလို အားမရဖြစ်နေကြပြီး ကျူးလွန်သူကို အမြန်ဆုံးဖမ်းဆီးကာကြီးလေးသောပြစ်ဒဏ်ကို ပေးရန်လည်း တောင်းဆိုလျက်ရှိသည်။