- Web Master
- ၁၃ နိုဝင်ဘာ ၂၀၂၃
ရခိုင်ပြည်နယ်၊ စစ်တွေမြို့၊
စစ်တွေဟိုတယ်အနီး ပင်လယ်ကမ်းခြေမှ အင်အားသုံးဖြိုဖျက်ဖယ်ရှားခံလိုက်ရသည့် ဆိုင်ခန်းပိုင်ရှင်များအတွက်
စစ်ကောင်စီက မြေနေရာအစားထိုးချပေးမှုမရှိ၍
လုပ်ငန်းပြန်လည်
လည်ပတ်နိုင်ခြင်းမရှိသေးဟု ဆိုင်ရှင်များက ပြောသည်။
ဖြိုဖျက်ခံလိုက်ရသော စားသောက်ဆိုင် ၁၀
ဆိုင်ကို လက်ရှိအချိန်ထိ စစ်ကောင်စီက ပြန်လည်နေရာချထားပေးခြင်းမရှိသေး၍
လုပ်ငန်းများပြန်လည် မလုပ်ဆောင်နိုင်သေးသလို စားဝတ်နေရေးများလည်း အခက်အခဲများနှင့်
ရင်ဆိုင်နေရကြောင်း ဆိုင်ခန်းပိုင်ရှင်များက ပြောသည်။
ဆိုင်ခန်းပိုင်ရှင် အမျိုးသားတစ်ဦးက "ဆိုင်ခန်းကိစ္စက ဘာမှအကြောင်းမပြန်သေးဘူး
သူတို့ဆီက။ တခြားနေရာတွေမှာလည်း
ဆိုင်မရောင်းသေးဘူး။
အခုနေရာကိုဖြိုလိုက်တဲ့အတွက် အဲဒီနေရာရှေ့
လမ်းတစ်ဘက်ခြမ်းက
နေရာကိုပြန်ချပေးမလားလို့ မျှော်ကိုးနေကြတာ။ အခက်အခဲတွေကတော့
ပေါင်းစုံပဲ။ သားသမီးကျောင်းလခတွေလည်း မပေးရသေးဘူး။ ကျနော်တို့ကတော့
ဒီတစ်ပတ်အတွင်းမှာ နေရာအစားထိုးပြန်ချပေးဖို့ မျှော်လင့်နေကြတာပါ"ဟု
ပြောသည်။
ဖြိုဖျက်ခံလိုက်ရသည့် စားသောက်ဆိုင်များမှာ
The Corner၊ နိုင်ဂြီး၊ Global၊ Family၊ Sevenသုံးလုံး၊ သန်းကျော်ဌေး၊ ဒေါ်ခင်လှရီ၊ Kသုံးလုံး၊
ဦးလှဖုန်းဆိုင်များ ဖြစ်သည်။
အဆိုပါ စားသောက်ဆိုင်ခန်း ၁၀ ခန်းကို စစ်ကောင်စီက အောက်တိုဘာလ
၅ ရက်၊ နံနက်အစော ၄ နာရီခန့်မှစတင်ကာ
အင်အားအလုံးအရင်းဖြင့်
လာရောက်ဖြိုဖျက်ခဲ့ကြောင်း ဆိုင်ပိုင်ရှင်များက ပြောသည်။
ဖြိုချက်ခံလိုက်ရသည့်
စားသောက်ဆိုင်အချို့သည် လုပ်ငန်းပြန်လည်မလည်ပတ်နိုင်သေး၍ နေရေးထိုင်ရေး၊
စားရေးသောက်ရေး၊ သားသမီးပညာရေး အခက်အခဲပေါင်းများစွာဖြင့် ကြုံတွေ့နေရသည်ဟု
နေအိမ်ဆိုင်ခန်းအဖြိုခံရသည့်
ဆိုင်ခန်းပိုင်ရှင်အမျိုးသမီးတစ်ဦးက
ပြောသည်။
"အရမ်းအခက်အခဲဖြစ်နေတယ်။ နေမယ့်နေရာ၊ သွားမယ့်နေရာလည်း
မရှိဘူး။ မိုးရာသီမိုးရွာတော့ နေစရာနေရာလည်းမရှိဘူး။ ပစ္စည်းတွေလည်းထားစရာနေရာမရှိဘူး။
သားသမီးတွေပညာရေးအတွက်လည်း လစာမပေးနိုင်ဘူး။ အလုပ်သမားတွေကိုလည်း
ပိုက်ဆံမပေးနိုင်ဘူး" ဟု ပြောသည်။
အဆိုပါအဖြိုဖျက်ခံလိုက်ရသည့် စားသောက်ဆိုင်များတွင်
အလုပ်လုပ်နေသည့် ဝန်ထမ်း ၅၀ ခန့်မှာလည်း စားဝတ်နေရေးအခက်အခဲဖြစ်နေသည်ဟု ဆိုသည်။
အဆိုပါ ဆိုင်ခန်းအဖြိုခံလိုက်ရသည့်
ဆိုင်ခန်းပိုင်ရှင်များအား နေရာအစားထိုးရောင်းချခွင့်ပေးရန် ပြည်နယ်စစ်ကောင်စီအား
အကြိမ်ကြိမ်စာရေးတောင်းဆိုထားသော်လည်း ယခုအချိန်ထိ တစ်စုံတစ်ရာအကြောင်းပြန်လာခြင်းမရှိသေးကြောင်း
ဆိုင်ရှင်များက ပြောသည်။
ဆိုင်ခန်းများကို ဖြိုဖျက်ခဲ့စဥ်က
စစ်တွေခရိုင်/ မြို့နယ်အုပ်ချုပ်ရေးမှူးများ၊ ခရိုင်/မြို့နယ်ရဲတပ်ဖွဲ့မှူးများ၊ ရဲတပ်ဖွဲ့ဝင်များ၊
စည်ပင်တာဝန်ရှိသူများ၊ မြို့နယ်လျှပ်စစ်မှ
တာဝန်ရှိသူများ စသည့် အင်အား ၁ဝဝ
ကျော်ခန့်သည် အဆိုပါဆိုင်ခန်းများသို့
ကားများဖြင့်လာရောက်ကာ
ဘော်ဒူဇာများဖြင့် ရုတ်တရက်
ဝင်ရောက်ဖြိုဖျက်ခဲ့ခြင်းဖြစ်သည်ဟု
ဆိုင်ပိုင်ရှင်များက ဆိုကြသည်။
ဆိုင်ခန်းများကို အင်အားသုံးဖြိုဖျက်နေခဲ့စဉ်
ဆိုင်ရှင်များအနေဖြင့် ဆိုင်အတွင်းရှိ
ပစ္စည်းများကိုလည်း
ယူဆောင်ချိန်မရလိုက်ဘဲ ဆိုင်အတွင်းနှင့်
ဖြိုဖျက်နေသည့်ဧရိယာသို့
ဝင်ရောက်ခွင့်ကိုလည်း ရဲတပ်ဖွဲ့ဝင်များက
တားမြစ်ပိတ်ပင်ထားသည်ဟု ဆိုင်ရှင်များက
ပြောသည်။
စစ်တွေကမ်းနားလမ်းကို
တိုးချဲ့ရန်အတွက်ဟုဆိုကာ စည်ပင်က ဩဂုတ် ၁၂ ရက်နေ့တွင် ဆိုင်ပိုင်ရှင်များကိုခေါ်ယူပြီး
စစ်တွေဟိုတယ်အနီးရှိ ဆိုင်ခန်း ၁၆ ခန်းအား နှစ်ပတ်အတွင်း
ဖြိုချဖျက်သိမ်းခိုင်းထားသည်ဟု သိရသည်။
သို့ရာတွင် လက်ရှိဆိုင်ခန်း ၁၀ ခန်းအဖြိုခံရပြီး
ကျန် ဆိုင်ခန်း ၆ ခန်းမှာ မည်သည့်အကြောင်းအရင်းကြောင့် ဖြိုဖျက်ခြင်းမခံရကြောင်းကို
မသိရကြောင်း ဆိုင်ခန်းပိုင်ရှင်များက ပြောသည်။
စစ်တွေဟိုတယ်ကမ်းခြေပတ်လမ်းရှိ စားသောက်ဆိုင်ပိုင်ရှင်များမှာ
အဆိုပါ နေရာ၌ မိမိစိတ်သဘေားထားအရ ကျူးကျော်
ပြောင်းရွေ့နေထိုင်လာခြင်း မဟုတ်ဘဲ
ပြီးခဲ့သည့် ၂၀၁၂ - ၂၀၁၃ ခုနှစ်၊
သမ္မတဦးသိန်းစိန် လက်ထက်ကတည်းက
မြို့နယ်စည်ပင်သာယာလှပရန်အတွက်
ဝန်ကြီးချုပ်ဟောင်း
ဦးမောင်မောင်အုန်းနှင့် ဌာနပေါင်းစုံက
စနစ်တကျနေရာချထားခဲ့ခြင်း ဖြစ်သည်ဟုလည်း
ဆိုင်ပိုင်ရှင်များက နိရဉ္စရာကို
ပြောဆိုထားသည်။
ဓာတ်ပုံ- နိရဉ္စရာနှင့် The Corner facebook