ကျပ်သိန်း ၁၉၀၀ ဖိုးရှိ ရွှေထည်များခိုးယူမှုနှင့် စွပ်စွဲဖမ်းဆီးခံထားရသူ ရခိုင်အမျိုးသမီးအား ဒုတိယအကြိမ်ရုံးထုတ်

( သမီးဖြစ်သူအမှုဖြစ်၍ မိဘနေအိမ်ကို ရန်ကုန်ရဲတို့လာရောက်ချိတ်ပိတ်)

ရန်ကုန်တိုင်း၊ တာမွေမြို့နယ်ရှိ 29 (တူးနိုင်း) ရွှေဆိုင်မှ ကျပ်သိန်း ၁၉၀၀ ဖိုးရှိ ရွှေများ ခိုးယူမှုနှင့် စွပ်စွဲ ဖမ်းဆီး ခံထားရသော ရခိုင်အမျိုးသမီးအား ယမန်နေ့ ၂ နာရီခန့်တွင် ဒုတိယအကြိမ် ရုံးထုတ်ခဲ့ကြောင်း သတင်းရရှိသည်။

အဆိုပါအမျိုးသမီးကို တာမွေမြို့နယ်တရားရုံးတွင် ဒုတိယအကြိမ်ရုံးထုတ်ခဲ့ပြီး နိုဝင်ဘာလ ၃ ရက်နေ့တွင် တရားလိုပြသက်သေအား စတင်စစ်ဆေးမည်ဖြစ်ကြောင်း စွပ်စွဲခံဖမ်းဆီးခံနေရသူ၏ ရှေ့နေ ဒေါ်ဝိုင်းသူဇာက နိရဉ္စရာသို့ ပြောသည်။

"ဒီနေ့တော့ သူကို ရုံးထုတ်လာတယ်။ ဘာမှတော့ မလုပ်ဘူး။ နောက်တစ်ခေါက်ရုံးချိန်းမှာ တရားလိုကို စစ်ဆေးမယ်လို့ တရားသူကြီးက ပြောလိုက်ပါတယ်" ဟု ပြောသည်။

သမီးဖြစ်သူ အမှုဖြစ်၍ အမှုနှင့် မသက်ဆိုင်သည့် မိဘများနေထိုင်သည့် မြောက်ဥက္ကလာပမြို့နယ်၊ အမှတ် ၂ ရပ်ကွက်ရှိ နေအိမ်ကို ပြီးခဲ့သည့် အောက်တိုဘာ ၈ ရက် ညနေပိုင်းတွင်  ရန်ကုန်တိုင်း တာမွေမြို့နယ် ရဲတပ်ဖွဲ့ဝင်များနှင့် ရပ်ကွက်အုပ်ချုပ်ရေးမှူးတို့က လာရောက်ချိတ်ပိတ်ခဲ့သည်ဟု သိရသည်။

ထိုသို့ ချိတ်ပိတ်ခဲ့သဖြင့် မိဘများမှာ အဝတ်တစ်ထည်ကိုယ်တစ်ခုဖြင့် အိမ်ကနေ ဆင်းခဲ့ရပြီး လက်ရှိ မလုံခြုံမှုများခံစားနေရကြောင်း ဖခင်ဖြစ်သူက ပြောသည်။

"ဒီရုံးချိန်းကိုလည်း မသွားဖြစ်ဘူး။ ရန်ကုန်က နေအိမ်ကို အသိမ်းခံထားရတော့ နေစရာမရှိဘူး။ ကျနော်တို့အတွက်ပါ မလုံခြုံဘူးလို့ ခံစားရလို့ နယ်ဘက်မှာ ထွက်လာရတယ်။ ဘာမှလည်း မယူလိုက်ရဘူး။ သမီးလေးကိစ္စ အမှုမှန်ဖြစ်စေချင်ပါတယ်" ဟု ပြောသည်။

အဆိုပါ 29 ရတနာ ရွှေဆိုင်တွင် ဝန်ထမ်းများအနေဖြင့် ရုံးဆင်းသည့်အခါတွင် ကိုယ်နှင့်ပါသည့် ပစ္စည်းများကို စစ်ဆေးရုံသာမက တစ်ကိုယ်လုံးစစ်ဆေးခံပြီးမှသာ ရုံးဆင်းရကြောင်း၊ CCTV ကင်မရာလည်း တပ်ဆင်ထားပါလျှက် ကင်မရာ မှတ်တမ်းကိုလည်း တရားရုံးတွင် မတင်ကြောင်း၊ လက်ရှိအချိန်ထိလည်း ခိုးယူသွားသည့် ၎င်းရွှေထည်များကို ဖော်ထုတ်သိမ်းဆည်းရရှိခြင်း မရှိသေးကြောင်း၊ ယခုအမှုမှာ မြေနိမ့်ရာ လှံစိုက်သဘောမျိုးဖြစ်နေကြောင်း သူတို့နှင့် နီးစပ်သူ တစ်ဦးက ပြောဆိုသည်။

ရန်ကုန်မြို့ရှိ 29 ရတနာရွှေဆိုင်များတွင် ရခိုင်ပန်းထိမ်ဆရာ ၁၁၀ ကျော်ခန့်ရှိပြီး အလုပ်လုပ်ရန် အတွက် ရွှေကျပ်ချိန် စပေါ်  သိန်းတစ်သောင်းကျော်ခန့် အပ်နှံထားရကြောင်း ရခိုင်ပန်းထိမ် ဆရာအသိုင်းအဝိုင်းပြောပြချက်အရ သိရသည်။

ဖမ်းဆီးတရားစွဲဆိုခံထားရသူမှာ မြေပုံမြို့နယ် သရက်တောင်ကျေးရွာက အသက် (၂၇)  အရွယ် ဘွဲ့ပညာတတ် အမျိုးသမီးငယ်တစ်ဦးဖြစ်သည်။

ပြီးခဲ့သည့် ဩဂုတ်လ ၂၈ ရက်တွင် တာမွေမြို့နယ် ဦးချစ်မောင်လမ်းရှိ 29 ရွှေဆိုင်တွင် ရွှေထည်ပစ္စည်း ၃၄ မျိုး (ကာလတန်ဖိုး သိန်း ၁၉၀၀ ခန့်)ရှိ ရွှေထည်ပစ္စည်းများ ပျောက်ဆုံးနေသည့်အတွက် ဝန်ထမ်း ၇၀ ခန့်အား မိသားစုနှင့် အဆက်အသွယ် လုံးဝ လုပ်ခွင့် မပြုဘဲ  ၂ ရက် ပိတ်လှောင်စစ်ဆေးပြီးနောက် ပစ္စည်းလက်ခံရေးဌာနမှ အဖွဲ့ခေါင်းဆောင် မောင်သန်းတိုးလင်းနှင့် မစိုးစံသူအပါအဝင် မထက်ထက်ခိုင်နှင့် မသဇင်သင်းသန့်တို့ ၄ ဦးတို့အား ၅ ရက်ထပ်မံ စစ်ဆေးခဲ့သည်။

ယင်းနောက် တရားခံရှာမတွေ့၍ ဝန်ထမ်းများအား ပုံမှန် ရုံးတက်ရန် ကတိဖြင့် အလုပ်ပျက်ရက်မရှိ ဆင်းစေခဲ့ပြီးနောက် မစိုးစံသူမှာ နေမကောင်းသဖြင့် ရန်ကုန်မြို့ မြောက်ဥက္ကလာပ မြို့နယ် ရွှေလမင်း ဆေးရုံ၌ ဆေးခွင့်ဖြင့် ဆေးကုသခံနေစဉ် စက်တင်ဘာလ ၂၁ ရက်နေ့တွင် စွပ်စွဲ ဖမ်းဆီးခံခဲ့ရသည်ဟု သိရသည်။

သူမသည် 29 ရတနာရွှေဆိုင် ပစ္စည်းလက်ခံရေးဌာနတွင် အလုပ်လုပ်ကိုင်နေသည်မှာ ၄ လခန့်သာ ရှိသေးသည်။

ယခုအမှုတွင် 29 ရတနာရွှေဆိုင်မှာ မန်နေဂျာ ဦးမျိုးကိုကိုအောင်က တရားလိုပြုလုပ်ကာ အမှုဖွင့်ထားပြီး အင်းစိန်အကျည်းထောင်တွင် ဖမ်းဆီးထားသည်။

လက်ရှိတွင် သူမအား ရာဇသတ်ကြီးပုဒ်မ ၃၈၁ ဖြင့် အမှုနှင့် တာမွေမြို့နယ်တရားရုံးတွင် တရားစွဲဆိုထားသည်။

ရာဇသတ်ကြီးပုဒ်မ ၃၈၁ သည် (အလုပ်ရှင်ထံမှ အလုပ်သမားဖြစ်စေ၊ အိမ်ရှင်ထံမှ အစေခံဖြစ်စေ ခိုးယူခြင်း)နှင့်သက်ဆိုင်သည့် ပုဒ်မ ဖြစ်ပြီး အလုပ်ကြမ်းနှင့် ထောင်ဒဏ် ၇ နှစ်အထိ ချမှတ်သည့် အမှုဖြစ်သည်ဟု သိရသည်။ NN - 9