(လက်ရှိကာလကိုနိုင်ငံ့အပြောင်းအလဲ၏ ကနဦးရောင်နီဦးဟု ဗိုလ်ချုပ်ထွန်းမြတ်နိုင်က ဖော်ညွှန်းတုံ့ပြန်) 

ယနေ့ နိုဝင်ဘာလ (ရ) ရက်နေ့တွင် ကျရောက်သည့် ရက္ခိုင်အမျိုးသားအဖွဲ့ချုပ်(ULA) ဥက္ကဋ္ဌ၊ရက္ခိုင့်တပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်၏ (၄၅) နှစ်ပြည့်မွေးနေ့သို့ အမျိုးသား ညီညွတ်ရေးအစိုးရ (NUG) ယာယီသမ္မတ ဒူဝါလရှီးလထံမှ မွေးနေ့ဆုမွန်တောင်း သဝဏ်လွှာ ရေးသား  ပေးပို့ခဲ့သည်။

နိုဝင်ဘာ ရ ရက်နေ့စွဲဖြင့် အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလပေးပို့သော သဝဏ်လွှာတွင် “စနစ်ပြောင်းလဲရေးတွင် ပါဝင်နေသည့် တော်လှန်ရေး ခေါင်းဆောင်တစ်ဦး၏ မွေးနေ့မှာအမှတ်တရ စာရေးသားခွင့်ရသည့်အတွက် အများကြီး ဝမ်းသာပါကြောင်း၊ နှစ်ပေါင်းများစွာ မြန်မာပြည်သူလထုတိုင်းရင်းသားအပေါင်းခံစားနေ၇သည့် ဖိနှိပ်သည့် စစ်အုပ်ချုပ်မှုဘ၀မှလွတ်မြောက်ရေးတွင် ကျန်းကျန်းမာမာဖြင့် ဆက်လက်ဦးဆောင်မှုပေးနိုင်ပါစေကြောင်းဆုမွန်တောင်း ဆန္ဒပြုပါကြောင်း”ဟု ပါရှိသည်။

အမျိုးသားညီညွတ်ရေးအစိုးရ (NUG) ယာယီသမ္မတ ဒူဝါလရှီးလထံမှ မွေးနေ့ဆုမွန်တောင်းစာရေးသားပေးပို့မှု အပေါ်  ဗိုလ်ချုပ် ထွန်းမြတ်နိုင်က တုံ့ပြန်ရာတွင် “ယနေ့အချိန်ကာလသည်မြန်မာပြည် အတွင်း၌စစ်ရေးအရှိန်အမြင့်ဆုံးသော အချိန်ကာလဖြစ်သည့်အပြင်နိုင်ငံ့အပြောင်းအလဲ၏ ကနဦး ရောင်နီဦးကိုတွေ့မြင်နေ၇သောကာလလည်းဖြစ်ကြောင်း” ဖော်ပြထားသည်။

ဗိုလ်ချုပ်ထွန်းမြတ်နိုင်၏ စာထဲတွင် “ ၂၀၂၃ ခုနှစ်၊ နိုဝင်ဘာလ (ရ) ရက်နေ့တွင် ကျရောက်သော ဗိုလ်ချုပ်ထွန်းမြတ်နိုင်၏ (၄၅) နှစ် ပြည့်မွေးနေ့သို့NUG ယာယီသမ္မတ ဒူဝါလရှီးလ ထံမှ မွေးနေ့ဆုမွန်တောင်းမေတ္တာစကားသဝဏ်လွှာပေးပို့လာသည့်အပေါ် မိမိတို့ ရက္ခိုင်အမျိုးသားအဖွဲ့ချုပ် အနေဖြင့်ဝမ်းမြောက်ခြင်းနှင့်အတူ ကျေးဇူးတင်မိပါကြောင်း၊  ယနေ့အချိန် ကာလသည်မြန်မာပြည်အတွင်း၌ စစ်ရေးအရှိန်အမြင့်ဆုံးသော အချိန်ကာလဖြစ်သည့်အပြင်နိုင်ငံ့အပြောင်းအလဲ၏ ကနဦး ရောင်နီဦးကိုတွေ့မြင်နေရသောကာလလည်း ဖြစ်ပါကြောင်း၊  ထို့ကြောင့် မိမိတို့အဖွဲ့အစည်းအနေနှင့်နိုင်ငံ့အပြောင်းအလဲကိုလိုလားကြသော မြန်မာပြည်သူလူထု တစ်ရပ်လုံးနှင့်လက်တွဲပြီးမိမိတို့ မျှော်မှန်းထားသော စစ်ရေး၊နိုင်ငံရေး ဘုံရည်မှန်းချက်များကို အမြန်ဆုံးပြည့်၀စေရန် ပူးပေါင်းဆောင်ရွက်၍ရသောသူများနှင့် လက်တွဲကာ အတူတကွ ပူးပေါင်းဆောင်ရွက်သွားမည်ဖြစ်ကြောင်းရေးသားဖော်ပြထားသည်။

ဗိုလ်ချုပ်ထွန်းမြတ်နိုင်၏ (၄၅) နှစ်ပြည့် မွေးနေ့အတွက် ကမ္ဘာလုံးဆိုင်ရာ အာရက္ခအမျိုးသား ကွန်ရက် (WUAN)ကလည်း ယမန်နေ့ နိုဝင်ဘာ ၆ ရက်တွင် မွေးနေ့ဂုဏ်ပြုဆုတောင်းစကားကို ပေးပို့ခဲ့သည်။(NN-7)

ဓာတ်ပုံ - NUG ယာယီသမ္မတ ဒူဝါလရှီးလ