၇ခိုင်ပြည်နယ်၏မြို့တော်စစ်တွေမြို့တွင် ည ၉ နာရီ နောက်ပိုင်း ညမထွက်၇အမိန့်ကို စစ်ကောင်စီကယနေ့တွင်ထုတ်ပြန်လိုက်သည်။

အဆိုပါ ညမထွက်၇အမိန့်သည် ယနေ့ နိုဝင်ဘာလ ၁၃ ရက်မှစ၍ရက်အကန့်အသတ်မရှိဖြစ်ပြီး စားသောက်ဆိုင်နှင့် လမ်းဘေးဈေးဆိုင်များ ည ၈ နာရီခွဲတွင်အပြီးသတ်ဆောင်ရွက်ရန်၊ လုပ်သားပြည်သူများ ည ၉ နာရီအချိန်အပြင်မထွက်ကြရန်နှင့် အထက်ပါညွှန်ကြားချက်အားလိုက်နာမှုမရှိသည်ကို တွေ့ရှိပါက ဥပဒေအရ အရေးယူဆောင်ရွက်သွားမည်ဟုယနေ့ထုတ်ပြန်သည့်အမိန့်စာတွင်ဖော်ပြ ပါရှိသည်။

ယနေ့နေ့လယ် ၂ နာရီက စစ်တွေမြို့ပေါ်ရပ်ကွက်အားလုံးရှိအုပ်ချုပ်ရေးမှူးများနှင့် အစည်းအဝေးကျင်းပပြီးသည့်နောက်တွင်စစ်တွေခရိုင်အထွေထွေအုပ်ချုပ်ရေးဦးစီးဌာနက အမိန့်ထုတ်လိုက်ခြင်းဖြစ်ကြောင်းညွှန်ကြားချက်စာတွင် ပါရှိသည်။

အဆိုပါ ည ၉ နာရီနောက်ပိုင်းညမထွက်ရအမိန့်ထုတ်ပြန်သည့်ကိစ္စနှင့်ပတ်သက်၍ စစ်တွေမြို့ခံတစ်ဦးက"ရခိုင်မှာတိုက်ပွဲတွေ ပြန်ဖြစ်လာတဲ့အတွက် အခုလိုထုတ်လိုက်တာဖြစ်နိုင်တယ်။ပြည်သူတွေအနေနဲ့ သတိရှိရှိသွားလာကြပါ။ မတော်ရင် သူတို့ဆီမှာအဆွဲခံ၇နိုင်တယ်"ဟုပြောသည်။

ယနေ့နိုဝင်ဘာလ ၁၃ ရက်၊ နံနက်က ရခိုင်ပြည်နယ်၊ရသေ့တောင်မြို့နယ်နှင့် မင်းပြားမြို့နယ်တို့တွင် ရက္ခိုင့်တပ်တော်(အေအေ)နှင့်စစ်ကောင်စီတို့ တိုက်ပွဲများစတင်ဖြစ်ပွားခဲ့ပြီး တိုက်ပွဲများအတွင်း စစ်ကောင်စီတပ်စခန်းတချို့နှင့်အရာရှိအချို့ကို ဖမ်းဆီးရမိထားသည်ဟု ရက္ခိုင့်တပ်တော်ပြောခွင့်ရ ဦးခိုင်သုခကနိရဉ္စရာသို့ပြောဆိုထားသည်။

ယင်းတိုက်ပွဲများဖြစ်ပွားပြီးနောက်တွင် စစ်ကောင်စီကရန်ကုန်-စစ်တွေကားလမ်းတစ်လျှောက်၊ စစ်တွေ- ၇သေ့တောင်- ဘူးသီးတောင်- မောင်တောကားလမ်း၊ ရေလမ်းတစ်လျှောက်ကိုလည်း ပိတ်ဆို့ထားကြောင်း ဒေသခံများကပြောသည်။

လက်ရှိစစ်တွေမြို့တွင်လည်း စစ်ကောင်စီစစ်ကားများသွားလာနေသည်ကိုတွေ့မြင်ရပြီး စစ်တွေမြို့၊ ဆတ်ရိုးကျတံတားဘက်မှစစ်တွေမြို့ထဲသို့လည်း စစ်ကောင်စီပြောင်းကား ၃ စီးတို့ထွက်ခွာသွားသည်ဟုလည်းမျက်မြင်ဒေသခံတစ်ချို့က ပြောသည်။

ဓာတ်ပုံ - စစ်တွေမြို့၏ ယနေ့ နိုဝင်ဘာ ၁၃ ရက်၊ ညမြင်ကွင်း။