ကြာသပတေး၊ ဖေဖော်ဝါရီလ ၂၉ရက်၊ ၂၀၂၄

ရသေ့တောင်မြို့နယ် မေယုကမ်းအငူမော်နယ်ခြားစောင့်စခန်း၊ တောင်ဦးစစ်တပ်စခန်းရုပ်သိမ်း


  • ရေးသူ: Web Master
  • | ရက်စွဲ: ၂၅ နိုဝင်ဘာ ၂၀၂၃
  • | ကြည့်ရှုသူ: 3.8k

ရခိုင်ပြည်နယ်၊ ရသေ့တောင်မြို့နယ်၊ မေယုကမ်း အငူမော်နယ်ခြားစောင့်စခန်းနှင့် တောင်ဦးစစ်တပ်စခန်းတို့ကို ရုပ်သိမ်းသွားပြီဟု သတင်းရရှိသည်။

၎င်းတပ်စခန်းမှ စစ်ကောင်စီတပ်သားများနှင့် နယ်ခြားစောင့်ရဲများကို နိုဝင်ဘာ ၂၄ ရက် ညအချိန်က စစ်တွေဘက်သို့ ဇက်ရေယာဉ်နှင့် အတူ ယူဆောင်သွားခဲ့သည်ဟု သိရသည်။

"မနေ့က ညက ၁၀ နာရီကျော် ၁၁ နာရီလောက်က ထွက်ပြေးသွားကြတာ။ အငူမော်မှာက အင်အားက ၁၀၀ ကျော်လောက်ရှိမယ်ထင်တယ်။ အားလုံးကို ဇက်နဲ့ချသွားတာ။ စခန်းကတော့ ဒီအတိုင်း အခွံကျန်ခဲ့တယ်" အငူမော်ဒေသခံတစ်ဦးက ပြောသည်။

မေယုကမ်းတောင်ဦးတွင် တပ်စွဲထားသည့် စစ်သား ၁၀၀ ကျော်လည်း စွန့်ခွာသွားခဲ့သည်ဟုသိရသည်။

ဒေသခံတစ်ဦးက “ဒီတောင်ဦးမှာရော၊ အငူမော်နယ်ခြားစောင့်စခန်းမှာရော တစ်ဦးမှ မရှိတော့ပါဘူး။ အကုန်လုံး စခန်းကို စွန့်ခွာသွားကြပါပြီ” ဟု ပြောကြားသည်။

၎င်းစစ်သားနှင့် နယ်ခြားစောင့်တပ်သားများအား စစ်တွေ (သို့မဟုတ်) ပေါက်တောတွင် အင်အားဖြည့်တင်းရန် ဖြစ်နိုင်သည်ဟု ရခိုင် စစ်ရေးလေ့လာသုံးသပ်သူ တစ်ယောက်က ပြောသည်။

အဆိုပါ စခန်းနှစ်ခုသည် နိုဝင်ဘာ ၁၃ နှင့် ၁၄ ရက်များက ရက္ခိုင့်တပ်တော် သိမ်းပိုက်ခဲ့သည့် ဒုံးပိုက်စခန်းနှင့် ချိန်ခလီစခန်းတို့နှင့် နီးကပ်စွာတည်ရှိသည့် စခန်းများဖြစ်ကြသည်ဟု သိရသည်။  (NN-30)

ပုံစာ- စက်လှေများနောက်ရှိ ကုန်းပေါ်တွင် မြင်ရသည့် အဝါရောင်အဆောက်အဦသည် အငူမော်နယ်ခြားစောင့်စခန်းဖြစ်သည်။


ဆက်စပ် သတင်းများ