၇ခိုင်ပြည်နယ်၊ ဘူးသီးတောင်မြို့နယ်တွင် စစ်ကောင်စီတပ်က လက်နက်ကြီးဖြင့် ပစ်ခတ်သည့်အတွက် မွတ်ဆလင် ကလေး ၂ ဦး အပါအဝင်  ၃ ဦးသေဆုံးပြီး ၆ ဦးဒဏ်ရာရရှိသွားသည်ဟု သိရသည်။

လက်နက်ကြီးကျည်စထိမှန်မှုကြောင့် သေဆုံးသွားသူများမှာ ကွန်တိုင်အုပ်စု ဝါးချီးလားရွာမှ အာရုရူလ္လာ(၈) နှစ်၊ အဒူလ္လာ(၁၀)နှစ်နှင့် ဒေါ် ဘေဇာ(၆၀)နှစ်တို့ဖြစ်ကြောင်း သိရသည်။

ဒဏ်ရာရရှိခဲ့သူများမှာ ဆော်မီယုလ္လာ (၃၈)နှစ်၊ ဂျော်ဟာယေး(၂၈)နှစ်၊မူဇီဆမ်း(၁၉)နှစ်၊ မီဇမ်း(၃၀)နှစ်၊နူရူဇာမက်(အသက်မသိရသေး)နှင့် အမည်နှင့်အသက်မသိ၇သေးသည့်အမျိုးသားတစ်ဦးတို့ဖြစ်သည်ဟုဒေသခံများက ပြောသည်။

ယမန်နေ့ နိုဝင်ဘာ ၂၇ ရက်၊ ညနေ ၅ နာရီခန့်က ဘူးသီးတောင် အခြေစိုက် စစ်ကောင်စီ၊ ခမ၇ ၅၆၄၊ ၅၆၅ တို့ကတိုက်ပွဲဖြစ်ပွားခြင်းမရှိဘဲ ဘူးသီးတောင်မြို့နယ်၊ အရှေ့ပြင်ရှည်(မွတ်ဆလင်)ကျေးရွာသို့လက်နက်ကြီးများပစ်ခတ်ခဲ့သည်။ ယင်းအထဲမှ လက်နက်ကြီးကျည်တစ်လုံးသည်  ဝါးချီးလားရွာ၏ အရှေ့ဘက်ဈေးအနီး စိုက်ခင်းတွင် ကျရောက်ပေါက်ကွဲခဲ့ခြင်း ဖြစ်သည်ဟု ၎င်းတို့က နိရဉ္စရာသတင်းဌာနကို ပြောဆိုသည်။ 

ယင်းသို့ လက်နက်ကြီးကျည်ကျရောက်ပေါက်ကွဲမှုကြောင့်စိုက်ခင်းအတွင်း ရှိနေသူများ ယခုကဲ့သို့သေဆုံး၊ ဒဏ်ရာရသွားကြခြင်းဖြစ်သည်ဟု ဘူးသီးတောင်မြို့ခံအမျိုးသမီးတစ်ဦးကနိရဉ္စရာကို ပြောသည်။

"မြို့ထဲကပစ်တာ မဟုတ်ပါဘူး။ ၅၆၄၊ ၅၆၅ တို့က လှမ်းပစ်ခဲ့တာ။သုံးလုံးလောက်ကြားလိုက်တယ်။ မွတ်ဆလင်ရွာဘက်မှာတစ်လုံးကျပြီး သုံးယောက်သေတယ်။အခုမြို့ပေါ်ကဆေးရုံမှာ ရောက်နေကြတယ်။ ဒဏ်ရာ၇တဲ့လူတွေလေ" ဟုပြောသည်။

စစ်ကောင်စီတပ်သည် လူနေကျေးရွာများသို့ လက်နက်ကြီးများအကြောင်းမဲ့ ပစ်ခတ်နေသည်ဟု   ဒေသခံများက ပြောသည်။

ဘူးသီးတောင်မြို့ခံတစ်ဦးက "မနေ့ကတိုက်ပွဲမရှိပါဘူး။အကြောင်းမဲ့ပစ်နေတာပါ"ဟုပြောသည်။

လက်ရှိတွင် ဒဏ်ရာ၇ လူနာ ၆ ဦးမှာ ဘူးသီးတောင်မြို့ ဆေးရုံကြီးတွင်ဆေးကုသမှု ခံယူနေရကြောင်း သိ၇သည်။ (NN-11)