သံတွဲမြို့တွင် သာလီစွသွေးအလှူရှင်အသင်းမှ ယာဉ်မောင်းတစ်ဦးအပါအဝင် ရာအိမ်မှူးတစ်ဦးနှင့် အမျိုးသမီး ၂ ဦး ဖမ်းဆီးခံရ

ရခိုင်ပြည်နယ်၊ သံတွဲမြို့နယ်ရှိ သာလီစွသွေးအလှူရှင်အသင်းမှ ကားဒရိုင်ဘာ ယာဉ်မောင်း တစ်ဦးအပါအဝင် ရာအိမ်မှူးတစ်ဦးနှင့် အမျိုးသမီး ၂ ဦး ဖမ်းဆီးခံရသည်ဟု ဒေသခံတစ်ဦးက ပြောသည်။

ဖမ်းဆီခံရသူများမှာ အဆိုပါရွာမှ သံတွဲမြို့နယ်၊ နတ်တောင်မော်ရွာမှ ရာအိမ်မှူးဖြစ်သူ ဦးဇော်နိုင် (၃၉) နှစ်၊ ဒေါ်ရီရီခင်နှင့် ‌သမီးဖြစ်သူ အသက် ၂၀ နှစ်အရွယ် မရွှေရီဝင်းနှင့်  သာလီစွသွေးအလှူရှင်အသင်းမှ ယာဉ်မောင်း အသက် ၄၆ နှစ်အရွယ် ဦးမိုးဝေတို့ဖြစ်ကြသည်။

 ၎င်းတို့ကို ပြီးခဲ့သည့် နိုဝင်ဘာ ၂၈ ရက်နေ့ ည ၉ နာရီခန့်တွင် စစ်ကောင်စီတပ်ဖွဲ့  ၂၀ ခန့်က တေဘာကား ၂ စီးဖြင့် ဖမ်းဆီးခေါ်ဆောင်သွားသည်ဟု ဒေသခံများက ပြောသည်။

စစ်ကောင်စီတပ်သားများသည်  ရာအိမ်မှူးဖြစ်သူ ဦးဇော်နိုင်ကို လမ်းပြခိုင်းပြီး  ဦးမျိုးဝင်းဆိုသူအား နေအိမ်သို့ လာရှာကြောင်း၊ ဦးမျိုးဝင်းကို နေအိမ်တွင် ရှာမတွေ့သဖြင့် ဒေါ်ရီရီခင်တို့သားမိနှစ်ဦးကို ဖမ်းဆီးခေါ်သွားသည့်အပြင် လမ်းပြပေးသည့် ရာအိမ်မှူးကိုပါ ဖမ်းဆီး‌ခေါ်ဆောင်သွားကြောင်း ဒေသခံတစ်ဦးက နိရဉ္စရာကိုပြောသည်။

“ ဦးမျိုးဝင်းရှာဖို့ဆိုပြီးတော့ သူ့အိမ်ကို ရာအိမ်မှူးကို လမ်းပြခိုင်းတယ်။ ဦးမျိုးဝင်းကိုရှာမတွေ့တော့ ဇနီးဖြစ်သူ ရီရီခင်တို့ သားမိနှစ်ယောက်ကို တေဘာကား (ကျောက်တင်ကား) ပေါ်တင်ခေါ်သွားတယ်။ ပြီးတာနဲ့ ရာအိမ်မှူးကိုပါ ပြန်မလွှတ်ဘဲ စစ်ဆေးစရာရှိတယ်ဆိုပြီး တစ်ပါတည်းခေါ်သွားတာ ” ဟုပြောသည်။

ဦးမျိုးဝင်းသည် လယ်လုပ်ပြီး ကြက်မွေးမြူရေးလုပ်ကိုင်သူဖြစ်သည်ဟု သိရသည်။

ထို့အတူ သံတွဲမြို့၊ ဒွာရာဝတီ အမှတ် (၈)ရပ်ကွက်၊ မင်းဗာကြီးလမ်းရှိ သာလီစွသွေးအလှူရှင်အသင်းမှ ယာဉ်မောင်း တစ်ဦးဖြစ်သူ အသက် ၄၆ နှစ်အရွယ် ဦးမိုးဝေကိုလည်း စစ်ကောင်စီမှ ၎င်းရုံးသို့လာရောက် ဖမ်းဆီးသွားကြောင်း နီးစပ်သူတစ်ဦးကပြောသည်။

“ သူ့ကို ရုံးထိလာပြီး နေ့လယ် ၂ နာရီလောက်က လာဖမ်းသွားတာ။ ဘာလို့လဲတော့မသိဘူး။ အခုထိ အဆက်အသွယ်မရသေးဘူး ” ဟုပြောသည်။

စစ်ကောင်စီက သူတို့၄ ဦးကို ငပလီမြို့ အမှတ် (၅၅) ခြေမြန်တပ်ရင်းသို့ ခေါ်ဆောင်သွားသည်ဟု သိရသည်။

၎င်းတို့နှင့် လက်ရှိအချိန်အထိ တစ်စုံတစ်ရာ အဆက်အသွယ်မရရှိကြောင်း နီးစပ်သူများထံမှ သိရသည်။

သံတွဲမြို့တွင် ပြီးခဲ့သည့် နိုဝင်ဘာလ ၂၃ ရက်၊ နေ့လယ်ပိုင်းကလည်း ရခိုင်တေးရေးဆရာ လူငြိမ်းခိုင်ကို စစ်ကောင်စီတပ်က သံတွဲမြို့၊ အံတော်ရပ်ကွက် (၃) လမ်းရှိ နေအိမ်အတွင်း ဝင်ရောက်ဖမ်းဆီးသွားခဲ့သည်။

အလားတူ နိုဝင်ဘာလ ၁၃ ရက်နှင့် ၁၄ ရက်တို့ကလည်း မြို့ပေါ်မှ လက်ဘက်ရည် ဆိုင်ပိုင်ရှင်နှင့် အဖျော်ဆရာ ဝန်ထမ်းတစ်ဦး၊ မြို့မအလယ်တန်းကျောင်းမှ ကျောင်းစောင့် တစ်ဦး၊ GTI ကျောင်းဆရာတစ်ဦးနှင့် နောက်ထပ် အမျိုးသားနှစ်ဦး၊ စုစုပေါင်း ၆ ဦးကို စစ်ကောင်စီက ဖမ်းဆီးသွားသည်။ (NN-13)