မောင်တော နခခ (၅) တပ်ရင်းက ပစ်ခတ်သည့် လက်နက်ကြီးကျည်ကြောင့် ကိုယ်ဝန်ဆောင်အမျိုးသမီးတစ်ဦးအပါအဝင် ၄ ဦးဒဏ်ရာရ

ရခိုင်ပြည်နယ်၊ မောင်တောမြို့ရှိ နခခ (၅)တပ်ရင်းက လက်နက်ကြီးကျည် ပစ်ခတ်မှုကြောင့် ရွှေရင်အေးကျေးရွာမှ ကိုယ်ဝန်ဆောင် အမျိုးသမီးတစ်ဦး အပါအဝင် ၄ ဦးဒဏ်ရာ ရရှိသွားကြောင်း သတင်းရရှိသည်။

ဒဏ်ရာရရှိသူများမှာ အသက် ၂၂ နှစ်အရွယ်ကိုယ်ဝန် ၉ လရှိပြီဖြစ်သော ဒေါ်လှစိန်ဝင်း၊ အသက်၂၅ နှစ်အရွယ် သူမ၏ခင်ပွန်းဦးမောင်လှအေး၊ အသက် ၆၂ နှစ်အရွယ်ဒေါ်ခင်ရီတို့ မြေးအဖွားနှစ်ဦးတို့ဖြစ်ကြသည်။

မောင်တောမြို့၊ မြို့သူကြီးအခြေစိုက် နခခ(၅)တပ်ရင်းက ယမန်နေ့ ဒီဇင်ဘာ ၄ ရက်၊ ညနေ ၆ နာရီခန့်တွင် တိုက်ပွဲမဖြစ်ဘဲ ပစ်ခတ်လိုက်သည့် လက်နက်ကြီး ကျည် ၂ လုံးသည် ရွှေရင်အေးကျေးရွာ ထဲ၌ ကျရောက် ပေါက်ကွဲခဲ့မှုကြောင့် ထိခိုက်ခဲ့ခြင်းဖြစ်သည်ဟု ရွှေရင်အေးကျေးရွာဒေသခံတစ်ဦးက နိရဉ္စရာ သတင်းဌာနကို ပြောသည်။

"စုစုပေါင်း ဒဏ်ရာလေးယောက်ရတယ်။ ကျည်စထိမှန်တာ။ ဒဏ်ရာတော့ သိပ်မပြင်းထန်ဘူး။ ကိုယ်ဝန်ဆောင်အမျိုးသမီးတစ်ယောက်လည်း ပါတယ်။ ဘေးချင်ကပ်အိမ်နှစ်အိမ်ကဖြစ်သွားတာ" ဟုပြောသည်။

ဒေါ်လှစိန်ဝင်း၏ ဦးခေါင်း၊ ဦးမောင်လှအေး၏ ဘယ်ဖက်ဒူး၊ ဒေါ်ခင်ရီ၏ ကျောကုန်းနှင့် သူမ၏မြေးတွင် ရှပ်ထိဒဏ်ရာများ ရရှိသွားသည်ဟု သိရသည်။

ရွှေရင်အေးကျေးရွာသည် ရက္ခိုင့်တပ်တော်(AA)ကသိမ်းပိုက်ခဲ့သည့် ဗောဓိကုန်းနယ်ခြားစောင့် အနားတွင်ရှိပြီး စခန်းသိမ်းလိုက်သည့်အတွက် စစ်ကောင်စီသည် ရွာများကို တမင်ရည်ရွယ်ချက်ရှိရှိပစ်ခတ်ခဲ့ခြင်းဖြစ်သည်ဟု မောင်တောမြို့ခံတစ်ဦးကနိရဉ္စရာကိုပြောသည်။

"တပ်တော်ဘက်က ဗောဓိကုန်းစခန်းကိုသိမ်းထားတယ်။ ခုလက်နက်ကျတဲ့ ရွာက ရွှေရင်အေး၊ ကန်သာယာ၊ ဗောဓိကုန်း  ပေါင်းထားတာတဲ့ရွာ။ သိမ်းထားတဲ့ စခန်းနဲ့နီးတော့ ကျေးရွာတွေကိုတမင်ပစ်တာ" ဟုပြောသည်။

လက်ရှိတွင် ဒဏ်ရာရရှိသူ ၄ ဦးအနက် ၃ ဦးကို မောင်တောဆေးရုံသို့ ယူဆောင်သွားကြောင်း သိရသည်။ (NN-11)