မောင်တောတွင် ရက်သတ္တ (၂) ပတ်အတွင်း တောဆင်ရိုင်းနင်းခံရ၍ လူ ၂ ဦးသေဆုံး

ရခိုင်ပြည်နယ်၊ မောင်တောမြို့နယ်တွင် တောဆင်ရိုင်းနင်းခံရ၍ ရက်သတ္တ (၂) ပတ်အတွင်း လူ ၂ ဦးသေဆုံးသွားခဲ့ကြောင်း သတင်းရရှိသည်။

 သေဆုံးသွားသူမှာ မောင်တောမြို့နယ်၊ ငန်းချောင်းမွတ်ဆလင်ကျေးရွာမှ အသက်  (၆၀) ခန့်အရွယ် ဦးအာဒူလ္လာမီနှင့် လောင်းဒုံကျေးရွာမှ လျှပ်စစ် ဝန်ထမ်းတစ်ဦးဖြစ်သူ အသက်(၄၀)အရွယ် ဦးဝင်းဇော်တို့ ဖြစ်ကြသည်။

ယနေ့ ဒီဇင်ဘာလ ၉ ရက်၊ နံနက်အစောကြီး ည၂ နာရီခန့်က ရွာအနီး တောင်ခြေရင်း၌ ဦးအာဒူလ္လာမီသည် သားဖြစ်သူနှင့်အတူ စပါးခင်းကို ညစောင့်အိပ်ရာမှ တောဆင်ရိုင်းနင်းခံရ၍ သေဆုံးသွားကြောင်း သိရသည်။

"သားဖနှစ်ယောက် လယ်ခင်းကို စောင့်နေကြတာ။ ညဉ့် ၂ နာရီကျော်လောက်မှာလေ။ ဆင် ၂ ကောင်က စပါးတွေ စားဖို့လာတာ။ သူတို့ အဲ့လိုလာစားနေကျလေ။ သားဖနှစ် ယောက်ကလည်း ဆင်ကိုလိုက်ကြတယ်။ ဆင်က ပြန်တိုက်ခိုက်တော့ သားက ခြေမြန်လက်မြန်ဆိုတော့ ပြေးလို့ လွတ်လိုက်တယ်။ အဖေကတော့ ဆင်နင်း ခံလိုက်ရတာပေါ့ “ ဟုပြောသည်။

ပြီးခဲ့သည့် ဒီဇင်ဘာလ ၁ ရက်ကလည်း မောင်တောမြို့နယ်၊ လောင်းဒုံကျေးရွာမှ လျှပ်စစ်ဝန်ထမ်းတစ်ဦးဖြစ်သူ အသက်(၄၀)အရွယ် ဦးဝင်းဇော်သည် လယ်ကွင်း၌ စပါးစောင့်ပြီးအိပ်နေစဉ် တောဆင်ရိုင်းနင်းခံရ၍ သေဆုံးသွားခဲ့သည်ဟု သိရသည်။

ဓာတ်ပုံ- ပုံဟောင်းသာဖြစ်ပါသည်။