မင်းပြားတွင် ကလေးငယ်များ ဆော့ကစားနေစဉ် လက်နက်ကြီးကျည်ကျရောက် ပေါက်ကွဲ၍ ၁၃ နှစ်အရွယ် မရမာကြီးလူမျိုး မိန်းခလေး ၁ ဦးသေဆုံးပြီး ကလေးငယ် ၆ ဦးဒဏ်ရာရ

ရခိုင်ပြည်နယ်၊ မင်းပြားမြို့ ကျိန်းတောင်တွင်တပ်စွဲထားသည့် အကြမ်းဖက်စစ်ကောင်စီတပ်က ပစ်ခတ်လိုက်သော လက်နက်ကြီး ကျည်တစ်လုံးသည် ကလေးငယ်များ ဆော့ကစားနေသည့် နေရာတွင် ကျရောက်ပေါက်ကွဲ၍ အသက် ၁၃နှစ်အရွယ် မရမာကြီးအမျိုးသမီးငယ် တစ်ဦးပွဲချင်းပြီး သေဆုံးကာ  နောက်ထပ် ကလေး ၆ ဦး ဒဏ်ရာရရှိသွားသည်ဟု သတင်းရရှိသည်။

သေဆုံးသူမှာ မင်းပြားမြို့၊ ဥက္ကာပျံရပ်ကွက်မှ ဦးတင်စိုးနှင့် ဒေါ်လှနုချေတို့၏ သမီး မစံပယ် (၁၃)နှစ်ဖြစ်ပြီး သူမ၏ ဦးခေါင်းကို လက်နက်ကြီးစထိမှန်၍ ပွဲချင်းပြီး သေဆုံးသွားခဲ့ခြင်းဖြစ်သည်ဟု ဒေသခံများက ပြောသည်။

သေဆုံးသည့်မိန်းကလေးငယ်သည် ရပ်ကွက်တွင်းမှ နောက်ထပ် ကလေး ၆ ဦးတို့နှင့်အတူ ဆော့ကစားနေကြစဥ် ယနေ့ ဒီဇင်ဘာ ၁၀ ရက်၊ ညနေ ၃ နာရီကျော်ခန့်က မင်းပြားရှိ ခမရ ၃၈၀ နှင့် ကျိန်းတောင်ပေါ်ရှိ စစ်ကောင်စီတပ်က ပစ်ခတ်လိုက်သော လက်နက်ကြီးကျည် ကျရောက် ပေါက်ကွဲမှုကြောင့် ထိခိုက်သေဆုံးခဲ့ခြင်းဖြစ်သည်ဟု သိရသည်။

"ပစ်တာတော့ ၁၅ မိနစ်လောက်ရှိခဲ့တယ်။ အဲ့လက်နက်ကြီးကျည်က ဆော့ကစားနေတဲ့ ကလေးတွေဆီကို ကျသွားတယ်။ တစ်ယောက်သေတယ်။ ကျန်တဲ့‌ ခြောက်ယောက် ဆေးရုံပို့ထားတယ်" ဟု ပြောသည်။

ထိခိုက်ဒဏ်ရာရသွားသည့် ကလေး ၆ ဦးသည်လည်း ဒဏ်ရာပြင်းထန်ကြောင်း ဥက္ကာပျံ ရပ်ကွက်မှ ဒေသခံတစ်ဦးကပြောသည်။

"သေသွားတဲ့ကလေးမှာခေါင်းမှာဒဏ်ရာရတယ်။ နားရွက်တစ်ဖက် ပျက်သွားတယ်။ ပွဲချင်းပြီးသေတယ်။ ကျန်တဲ့ကလေးတွေကိုဆေးရုံ အမြန်ပို့ထားတယ်" ဟုပြောသည်။

မင်းပြားတွင် ၅၄၁ တပ်၊ မယ်တော်တောင်တပ်၊ ကျိန်းတောင်တပ်နှင့် တိုင်းဗဟို (၉)တို့မှ လက်နက်ကြီး/လက်နက်ငယ်များဖြင့် နေ့စဉ်ပစ်ခတ်လျက် ရှိကြောင်း သိရသည်။

ပြီးခဲ့သည့် နိုဝင်ဘာ ၁၃ ရက်ကလည်း မင်းပြားမြို့၊ ကျိန်းတောင်ဘုရားမှာ တပ်စွဲထားသည့် စစ်ကောင်စီတပ်များကလည်း လက်နက်ကြီး၊ လက်နက်ငယ်များဖြင့် ပစ်ခဲ့မှုများရှိခဲ့ပြီး ဥက္ကာပျံရပ်ကွက်တွင် အသက် ၆၀ အရွယ် မရမာကြီး အမျိုးသမီးတစ်ဦးနှင့် သူမ၏မြေးတို့၌ ဒဏ်ရာရရှိခဲ့ကြောင်း သိရသည်။ (NN-11)