အမ်းမြို့နယ် ကဇုကိုင်း တိုက်ပွဲမှ လက်နက်ကြီးကျည်များ ကမ်းထောင်းကြီးအပါအဝင်ကျေးရွာများ အနီးသို့ ကျရောက်ပေါက်ကွဲမှုရှိခဲ့ဟုဆို

ရခိုင်ပြည်နယ်၊ အမ်းမြို့နယ်၊ ကဇုကိုင်းအနီး ဖြစ်ပွားနေသော တိုက်ပွဲအတွင်းမှ လက်နက်ကြီး ကျည်များသည် မြေပုံမြို့နယ်၊ ကမ်းထောင်းကြီးမြို့နှင့် အနီးဝန်းကျင် ကျေးရွာများသို့ ကျရောက်ပေါက်ကွဲမှုများရှိခဲ့သည်ဟု ဒေသခံများက နိရဉ္စရာသတင်းဌာနသို့ ပြောဆိုသည်။

အမ်း မြို့နယ်၊ကဇုကိုင်းတွင် ယနေ့  ဒီဇင်ဘာ ၁၅ ရက် ညနေ ၄နာရီခန့်ကပင် စစ်ကောင်စီနှင့် ရက္ခိုင့်တပ်တော်တို့အကြား တိုက်ပွဲဖြစ်ပွားနေခဲ့သည်ဟု ကမ်းထောင်းကြီး မြို့ခံတစ်ဦးက နိရဉ္စရာ သတင်းဌာနကို ပြောသည်။

" ညနေ ၄ နာရီကတည်းပစ်နေတာ။ အပြန်အလှန်ပစ်ခတ်နေတာပါ။ မြို့ အနီးဝန်းကျင်တွေမှာလည်း လက်နက်ကြီးကျည်တွေ လာကျတယ်။ စိုးရိမ်စရာတော့ ရှိနေတာပေါ့" ဟုပြောသည်။

ယင်းသို့တိုက်ပွဲတွင် စစ်ကောင်စီတပ်ဖက်မှ မြေပုံမြို့နယ်ဖက်သို့ လက်နက်ကြီး ပစ်ခတ်သဖြင့် ကျေးရွာ အနီးအနားတွင် လက်နက်ကြီးကျရောက်ခဲ့ခြင်းဖြစ်သည်ဟု မြေပုံဒေသခံတစ်ဦးက နိရဉ္စရာကို ပြောသည်။

" လက်ရှိ ဘယ်ရွာထဲမှာ ဘယ်လိုကျတယ်ဆိုတာရယ်။ အထိအခိုက် ရှိ မရှိဆိုတာကို  အတိအကျ မသိရသေးပေမယ့် ရွာဘက်တွေကိုကျနေတယ်။ ခုတော့ရပ်သွားပြီ။လက်နက်ကြီးသံတွေ" ဟု ည ၈ နာရီကျော်လောက်က ပြောသည်။

လက်နက်ကြီးသည် မြေပုံမြို့နယ်၊ သပြေကန် ရွာတံတားနှင့် ညောင်ကန်ရွာရှေ့ဘက် တောင်ခြေရင်းတွင် တစ်လုံးကျရောက်‌ ပေါက်ကွဲခဲ့ကြောင်းသိရသည်။

ဒီဇင်ဘာ ၁၃ ရက်နေ့ “Operation 1027” ၁၀၂၇ စစ်ဆင်ရေး (၄၈) ရက်မြောက်နေ့ တိုက်ပွဲ သတင်းများကို ညီနောင် ၃ ဖွဲ့က ထုတ်ပြန်ရာတွင် ရခိုင်ပြည် မြောက်ဦး၊ အမ်း၊ မြေပုံမြို့နယ်များတွင် တိုက်ပွဲ ဖြစ်ပွားခဲ့ကြောင်း ဖော်ပြခဲ့သည်။

ဒီဇင်ဘာလ (၁၃) ရက်နေ့၊ နံနက် ၁၀ နာရီ ၃၀ မိနစ် အချိန်ခန့်တွင် မြေပုံမြို့နယ်၊ စညှင်းဝအနီးတွင် ရက္ခိုင့်တပ်တော် (AA) နှင့် စစ်ကောင်စီတပ်တို့ကြား ထိတွေ့တိုက်ပွဲဖြစ်ပွားခဲ့သည်ဟု သိရသည်။(NN-11)