ကျောက်ဖြူ သစ်ပုတ်တောင် ဓညဝတီရေတပ်အနီးတိုက်ပွဲဖြစ်ပွား

ရခိုင်ပြည်၊ ကျောက်ဖြူမြို့နယ်၊ သစ်ပုတ်တောင် ဓည၀တီ ရေတပ်စခန်းအနီးတွင် ယနေ့နံနက်က တိုက်ပွဲဖြစ်ပွားခဲ့သည်ဟု သတင်းရရှိသည်။

ယနေ့ ဒီဇင်ဘာ ၂၂ရက် နံနက် ၉နာရီကျော်ခန့်က ရက္ခိုင့်တပ်တော်(AA)နှင့် စစ်ကောင်စီတပ်တို့အကြား အပြန်အလှန်တိုက်ပွဲဖြစ်ပွားခဲ့သည်ဟု ဒေသခံတစ်ဦးက နိရဉ္စစရာသတင်းဌာနကိုပြောသည်။

" အပြန်အလှန်ပစ်ခတ်သံကြားရတယ်။ ၉နာရီကျော်လောက်ကကြားရတာ။ ခုခဏရပ်နေတယ်"ဟု နံနက် ၁၀ နာရီခန့်က ပြောသည်။

သစ်ပုတ်တောင်ရေတပ်စခန်းမှ ထွက်လာသည့် စစ်ကားတစ်စီးကို ယနေ့ဒီဇင်ဘာ နံနက် ၉ နာရီကျော်ခန့်က ရက္ခိုင့်တပ်တော်မှ အာရ်ပီဂျီနှင့် လှမ်းပစ်ပြီးနောက် တိုက်ပွဲဖြစ်ပွားခဲ့သည်ဟု ၎င်းက နိရဉ္စရာကိုပြောသည်။

" ရေတပ်ကထွက်လာတဲ့ စစ်ကောင်စီကားတစ်စီးကို ကိုယ့်တပ်တော်ဖက်က အာရ်ပီဂျီနဲ့ လှမ်းပစ်ခဲ့တယ်။ အထိခိုက်တော့ရှိပေမယ့် အတိကျမသိရသေးဘူး" ဟုပြောသည်။

သို့သော်လည်း ကျောက်ဖြူဒေသခံလူငယ်တစ်ဦးကမူ  ဓည၀တီရေတပ်စခန်းက ထွက်လာသည့်ကားကို မိုင်းခွဲတိုက်ခိုက်သည်ဟု ကြားသိရကြောင်း ပြောသည်။

" မနက် ၉ နာရီလောက်မှာ ရေတပ်ဌာနချုပ်အဝနားမှာ စစ်ကားနှစ်စီးကို AA ကမိုင်းဆွဲတယ်။ ကားက အကြီးတစ်စီး၊အငယ်တစ်စီးမှာ တစ်စီးကိုထိလို့ စုတ်ပြတ်သတ်သွားတယ်လို့ကြားပါတယ်။"

အဆိုပါ စစ်ကောင်စီယာဥ်တန်းထဲတွင် စစ်ကောင်စီအရာရှိကြီးတစ်ဦးလည်းပါဝင်ပြီး ထိခိုက် သေဆုံးဒဏ်ရာရမှု အခြေအနေများကို မသိရှိရသေးဟု ၎င်းက ပြောဆိုသည်။

ယနေ့နံနက် ၉ နာရီကျော်က ဓည၀တီရေတပ်စခန်းအနီးတွင် အပြန်အလှန်ပစ်ခတ်မှု ဖြစ်ပွားခဲ့သည်ကို အတည်ပြုနိုင်သော်လည်း စတင်ဖြစ်ပွားရသည့် အကြောင်းအရင်းကို နိရဉ္စရာသတင်းဌာန အနေဖြင့် သီးခြားအတည်ပြုနိုင်​ခြင်း မရှိသေးပါ။

ယခုတိုက်ပွဲဖြစ်ပွားခဲ့သည့် နေရာသည် စစ်ကောင်စီ၏ ရခိုင်ပြည်နယ်တွင် အခြေစိုက်ထားသည့် အကြီးဆုံး ဓည၀တီရေတပ်စခန်းအနီးတွင် ဖြစ်ပြီး အဆိုပါနေရာမှ မနီးမဝေးရှိ  မဒေးကျွန်းတွင် တရုတ်စီမံကိန်းများတည်ရှိသည်ဟု သိရသည်။

ပြီးခဲ့သည်ဒီဇင်ဘာ၂၀ရက် ညကလည်းကျောက်ဖြူမြို့ရှိ ခမရ ၅၄၂ ဗျူဟာကုန်း၊ ငလပွေ့ရပ်ကွက်တွင်လုံခြုံရေး ယူထားသည့် စစ်ကောင်စီတပ်၊ အစိုးရနည်းပညာကောလိပ် GTC တောင်ကုန်းပေါ်မှ စစ်ကောင်စီတပ်တို့မှ ပစ်ခတ်မှုများပြုလုပ်ခဲ့ကြောင်းသိရသည်။(NN-11and NN-23 ) 

ပုံစာ- သစ်ပုတ်တောင် ဓည၀တီရေတပ်အား တွေ့ရစဉ်)