ကျောက်ဖြူ ဓည၀တီရေတပ်အနီးတိုက်ပွဲကြောင့် ဒေသခံ ၃၀၀‌ ကျော်ခန့် ထွက်ပြေးတိမ်းရှောင်နေရ

ရခိုင်ပြည်နယ်၊ကျောက်ဖြူမြို့နယ်၊ သစ်ပုတ်တောင် စစ်ကောင်စီ၏ ဓညဝတီရေတပ်စခန်းအနီးတွင် ဖြစ်ပွားခဲ့သည့် တိုက်ပွဲကြောင့် ဒေသခံ ၃၀၀‌ ကျော်ခန့်ထွက်ပြေးတိမ်းရှောင်နေရသည်ဟု သတင်းရရှိသည်။

သစ်ပုတ်တောင် ဓညဝတီရေတပ်စခန်းအနီးတွင် တည်ရှိသည့်  ရှောက်ချောင်းကျေးရွာ အနီးဝန်းကျင်တွင် ယမန်နေ့ ဒီဇင်ဘာ ၂၂ ရက်  နံနက် ၉နာရီကျော်ခန့်တွင် ရက္ခိုင့်တပ်တော်(AA)နှင့် စစ်ကောင်စီတပ်တို့တိုက်ပွဲဖြစ်ပွားခဲ့သည်။

ရှောက်ချောင်းဒေသခံအမျိုးသမီးတစ်ဦးက " သူတို့က စစ်ကားနှစ်စီးနဲ့ ကြက်သွန်တွေ လာပေးတယ်။ တစ်အိမ်ကို ကြက်သွန် ၇ လုံး လာပေးတယ်။  စစ်သားတွေက တစ်ခါမှ လာမပေးဖူး။‌ ထောက်ပံ့ရေး ပေးတယ်ဆိုပြီး လာစုံစမ်းတာလည်း ဖြစ်နိုင်တယ်။  အရင်ကတော့ ရွာကို မကြာမကြာလာ စစ်တာတွေတော့ရှိတယ်။ အေအေက လူတွေရှိရင် သတင်းပေးလို့ လာပြောတာတွေ ရှိတယ်။ ဒီတစ်ခေါက်တော့ သူတို့ ရွာကနေ ပြန်အထွက်မှာ အသံတွေ  အကျယ်ကြီး ကြားလိုက်ရတယ်။ ပြီးတော့ ဟိုဖက်ဒီဖက် ပစ်သံတွေကြားရတယ်" ဟုပြောသည်။

၎င်းနောက်တွင် ရှောက်ချောင်းကျေးရွာသားများသည် စိုးရိမ်ထိတ်လန့်ပြီး ရွာကို စွန့်ခွာကာ ထွက်ပြေးခဲ့ကြသည်ဟု ဆိုသည်။

နောက်ထပ် အမျိုးသမီးတစ်ယောက်က "  သေနတ်ပစ်သံတွေကိုကြားရတော့  သွေးနုသားနုနဲ့ ကျမညီမ တစ်ယောက် ဆိုရင် အရမ်းကြောက်သွားတာ။  အဲ့လိုအသံတွေကြားတော့ အန္တရာယ်ကင်းဖို့ ရှောင်ပုန်းခဲ့ရတယ်။  ရွာကနေထွက်ပြေးလာရတယ်။ နီးစပ်ရာ ရွာတွေကို ရောက်နေပြီ။ ရွာမှာတော့ ယောင်္ကျားအနည်းငယ်လောက်ပဲ ကျွဲကျောင်းနွားကျောင်းကျန်နေခဲ့တယ်" ဟုပြောသည်

၎င်းကျေးရွာသားများသည် ယနေ့နံနက်အချိန်ထိ ရွာကို မပြန်ဘဲ တစ်ခြားရွာများတွင် ခိုလှုံနေရဆဲဟု ဆိုသည်။

ယမန်နေ့ ဒီဇင်ဘာ ၂၂ ရက် နံနက် (၉) နာရီအချိန်ခန့်တွင် ကျောက်ဖြူမြိုနယ်ရှိ ဓညဝတီ ရေတပ် စခန်းအနီး၌ စစ်ကောင်စီစစ်ကြောင်း တစ်ခုမှ ရက္ခိုင့်တပ်တော် (AA) လှုပ်ရှားရာနယ်မြေသို့  ရုတ်ချည်း စစ်ကျွံလာ၍ စစ်ရေးထိပ်တိုက်အခြေအနေကြောင့် ထိတွေ့ တိုက်ပွဲတစ်ခု ဖြစ်ပွားခဲ့သည်ဟု ညီနောင်သုံးဖွဲ့၏ သတင်း ထုတ်ပြန်ချက်တွင် ဖော်ပြထားသည်။

အဆိုပါ တိုက်ခိုက်မှုအတွင်း  ရက္ခိုင့်တပ်တော်က  အာရ်ပီဂျီနှင့် ကားများကို ပစ်ခတ်ခဲ့ခြင်းဖြစ်ပြီး ကားတစ်စီး ထိမှန်ကာ စစ်ကောင်စီဘက်က အထိအခိုက်အကျဆုံးများရှိခဲ့သည်ဟု သတင်းများထွက်ပေါ်နေသည်။

သို့သော်လည်း အဆိုပါ အကျအဆုံးများနှင့် ပတ်သက်ပြီး နှစ်ဖက်တပ်ဖွဲ့များမှ တစ်စုံတစ်ရာ သတင်းထုတ်ပြန်ခြင်း မရှိသဖြင့် ထိခိုက်ကျဆုံးစာရင်းအတိအကျကိုတော့ ဖော်ပြနိုင်ခြင်းမရှိပါ။ 

အဆိုပါရှောက်ချောင်းကျေးရွာသည် အိမ်ခြေ၁၀၀ရှိပြီး လူဦးရေ၃၀၀ကျော်ခန့်ရှိကာ စိုက်ပျိုးရေးနှင့်  နွား၊ ဝက် မွေးမြူရေး လုပ်ငန်းများကို လုပ်ကိုင်ကြကြောင်း သိရသည်။(NN-11)