ပင်လယ်နီတွင်ဖြတ်သန်းသွားသည့် ကုန်တင်င်္ဘောတစ်စီးနှင့် အစ္စရေးရှိပစ်မှတ်များကို ဒရုန်းနှင့် ဒုံးကျည်များအသုံးပြု တိုက်ခိုက်ခဲ့သည်ဟု ယီမင်ဟူသီသူပုန်ပြော
အီရန်နိုင်ငံက ထောက်ခံအားပေးနေသော ယီမင်မြောက်ပိုင်းရှိဟူသီသူပုန်များက ပင်လယ်နီအတွင်း ဖြတ်သန်း သွားလာနေသည့် ကုန်တင်သင်္ဘောတစ်စီးနှင့် အစ္စရေးတောင်ပိုင်းရှိပစ်မှတ်များကို ဒီဇင်ဘာ ၂၆ရက်နေ့က ဒုံးကျည် နှင့် ဒရုန်းများအသုံးပြု တိုက်ခိုက်ခဲ့ကြောင်း ထုတ်ပြန်ကြေညာခဲ့သည်။
MSC UNITED အမည်ရှိ ကုန်တင်သင်္ဘောတစ်စီးကိုပစ်ခတ်တိုက်ခိုက်ခဲ့ပြီး အစ္စရေးတောင်ပိုင်းရှိ ပစ်မှတ်များကိုလည်း ဒရုန်းဖြင့်တိုက်ခိုက်ခဲ့ကြောင်း ဟူသီသူပုန်တို့၏ ကြေညာချက်တွင် ဖော်ပြထားသည်။
ယီမင်မြောက်ပိုင်းရှိ ဟူသီသူပုန်များသည် အစ္စရေးတို့၏ဗုံးဒဏ်ခံနေရသော ဂါဇာဒေသရှိ ပါလက်စတိုင်းများနှင့် တစ်သားတည်းရပ်တည်နေကြောင်း ပြသသည့်အနေဖြင့်အစ္စရေးရှိပစ်မှတ်များကို တိုက်ခိုက်နေသလို ပင်လယ်နီအတွင်း ဖြတ်သန်းသွားလာနေသည့်ကုန်တင်သင်္ဘောများကိုလည်း ပစ်ခတ်တိုက်ခိုက်လျက် ရှိနေသည်ဟုဆိုသည်။
ဟူသီလက်နက်ကိုင်သူပုန်များက ၎င်းတို့သည် အစ္စရေးရှိ ပစ်မှတ်များနှင့် အစ္စရေးနှင့်ဆက်စပ်နေသော ကုန်သင်္ဘောများကို အဓိကပစ်မှတ်ထားတိုက်ခိုက်နေသည်ဟု ဆိုသည်။
အင်္ဂါနေ့ အစောပိုင်းအချိန်က ယီမင်အနောက်ဘက်ကမ်း ဟိုဒိုင်ဒါဆိပ်ကမ်းအနီးတွင်ပေါက်ကွဲသံများကြားရပြီး ဒုံးကျည်များပစ်ခတ်နေသည်ကို မြင်တွေ့ရသည်ဟု ဗြိတိန်ရေကြောင်းကုန်သွယ်ရေးအဖွဲ့( UKMTO) က ပြောကြားခဲ့ပြီး ၎င်းတို့၏ သင်္ဘောနှင့်ဝန်ထမ်းများ ထိခိုက်မှုမရှိဟုဆိုသည်။
ယီမင်အနောက်ဘက် ဟိုဒိုင်ဒါဆိပ်ကမ်းအနီးတွင် နောက်ထပ်ပေါက်ကွဲမှုကြီး နှစ်ခုကိုအီဂျစ်နိုင်ငံ ဆိုင်းနိုင်း ကျွန်းဆွယ်ကမ်းခြေမှ ကြားကြရပြီး အစ္စရေးစစ်တပ်လေယာဉ်များက ဒုံးကျည်များ ပစ်ခတ်မှုကို ထောက်လှမ်းသိရှိ၇သည်ဟု ဆိုသည်။
အမေရိကန် ပင်တာဂွန်စစ်ဌာနချုပ်၏ အဆိုအ၇ ဟူသီသူပုန်များသည်ပင်လယ်နီအတွင်း ဖြတ်သန်း သွားလာနေသည့် နိုင်ငံ ၃၅ နိုင်ငံနှင့် ဆက်စပ်နေသောကုန်တင်သင်္ဘော ၁၀ စီးကို ဒရုန်း နှင့် ဒုံးကျည်များဖြင့် အကြိမ်ရေ ၁၀၀ ကျော် တိုက်ခိုက်ခဲ့သည်ဟုသိ၇သည်။
ယခုကဲ့သို့ တိုက်ခိုက်မှုကြောင့် ကမ္ဘာ့ကုန်သွယ်ရေး၏ ၁၂% ပမာဏအထိ ကူးသန်းသွားလာနေသည့်(စူးအက်တူးမြောင်းဖြတ်) ပင်လယ်နီရေကြောင်းလမ်းမှာ အန္တရာယ်နှင့် ရင်ဆိုင်နေရပြီးအမေရိကန် ဦးဆောင်ကာ နိုင်ငံစုံပါဝင်သည့် ပင်လယ်နီရေကြောင်းလမ်းကာကွယ်ရေးရေတပ်ဖွဲ့တစ်ခုကို မကြာမီက ဖွဲ့စည်းခဲ့ရသည်ဟု သိရှိ၇သည်။ NN-27
ref: cna/Aljazeera
လှူရန်