တင်းမတောင်ရှည်တောင်ဗျူဟာ တိုက်ပွဲပြင်းထန်၊ လေယာဉ်အပါအဝင် ကျောက်တော်တပ်ရင်းများက လက်နက်ကြီးဖြင့် ပစ်ခတ်၍ ဒေသခံများထွက်ပြေးရ

ရခိုင်ပြည်နယ်၊ကျောက်တော်မြို့နယ် အထက်ပိုင်း စစ်ကောင်စီတပ် တင်းမရွာ တောင်ရှည်တောင်ဗျူဟာကို ရက္ခိုင့်တပ်တော်(AA)တို့ ထိုးစစ်ဆင် တိုက်ခိုက်လျက်ရှိ တိုက်ပွဲမှာ ယနေ့တွင် ပိုမို ပွဲပြင်းထန်နေကြောင်း သတင်းရရှိသည်။

ကျောက်တော်အခြေစိုက် စကခ (၉)က လက်နက်ကြီးဖြင့် အဆက်မပြတ် ပစ်ခတ်ပြီး ရဟတ်ယာဉ်များဖြင့် လာရောက်ဗုံးကြဲမှုများရှိသည်အတွက်  တောင်ရှည်တောင်နှင့် အနီးအနား ပတ်ဝန်းကျင်က ရွာသားတစ်ဦးက နိရဉ္စရာသတင်းဌာနကိုပြောသည်။

" မနေ့ကနေ တိုက်ပွဲကပြင်းထန်လာတယ်။လက်နက်ကြီးတွေတအားပစ်တယ်။ နေ့လယ် ၁နာရီကနေ ညဉ့်အထိပစ်တယ်။ညမအိပ်ရဘူး။အပြန်အလှန်ဖြစ်တာ။ ဒီနေ့လည်း စကခ ၉ ဖက်တွေက အခုအချိန်ထိ ပစ်တုန်းပါ" ဟု ညနေ ၄ နာရီခွဲခန့်က ပြောသည်။

ယင်းအပြင် ယနေ့ဒီဇင်ဘာ ၂၉ရက်နေ့ နံနက် ၈နာရီမှ၉နာရီထိ လေယာဉ်များဖြင့်ဗုံးကြဲသံများကို အနီးကပ် ကြားရသဖြင့် ရွာသားများ ထွက်ပြေးနေရသည်ဟု ဝက်မကျ ကျေးရွာသားတစ်ဦးက နိရဉ္စရာကိုပြောသည်။

" ဒီနေ့မနက်က လေယာဉ်နဲ့ဗုံးလာကြဲတာမျိုးရှိတယ်။တပ်မဖက်ကတောင်ရှည်တောင် ဝက်မကျတို့၊ သားပုံရွာ၊ သံပုရာထောင့်အဲဒီရွာတွေကို ပစ်တယ်။ အဲ့ရွာတွေလက်နက်ကျလို့ အိမ်တွေပျက်စီးတယ် ပြောတယ်။ လူတွေအထိခိုက်မရှိဘူး။ကျနော်တို့ကထွက်ပြေးလာပြီ။ လမ်းလျှောက်ပြီး ထွက်ပြေးကြရတာပါ။ နီးစပ်ရာဒေသတွေကို" ဟုပြောသည်။

ကျောက်တော်မြို့နယ် အထက်ပိုင်း တင်းမရွာ တောင်ရှည်တောင် ဗျူဟာ အနီးဝန်းကျင်တွင် ဒီဇင်ဘာလ ၂၅ရက်က စပြီ တိုက်ပွဲ ဖြစ်ပွားနေကာ ၎င်းနေ့ ညအချိန်၌  စစ်ကောင်စီက လေယာဉ်နှစ်စီးဖြင့် လာရောက် ပစ်ခတ်ခဲ့ကြောင်းသိရသည်။ ဒီဇင်ဘာလ (၂၆) ရက်နေ့၊ ညအချိန်ကလည်း လေယာဉ် (၂)စီးမှ ဆက်လက် လာရောက်ပစ်ခတ်ခဲ့ပြီး ယနေ့တွင်လည်း ထပ်မံပစ်ခတ်နေကြောင်း သိရသည်။ 

လက်ရှိတွင် တောင်ရှည်တွင်ဗျူဟာကုန်းရှိ ကာကင်းစခန်းငယ်အချို့ကို ရက္ခိုင့်တပ်တော်က သိမ်းပိုက်လိုက်ပြီဟု ဒေသခံများကပြောသည်။

အဆိုပါစစ်ကောင်စီ၏ ဗျူဟာကုန်းသည် လက်နက်ကြီးများဖြင့် ပစ်ခတ်တိုက်ခိုက်နေသော စခန်းတစ်ခုဖြစ်သည်။ စစ်ကောင်စီအနေဖြင့် ၎င်းဗျူဟာကုန်းမကျဆုံးစေရေးအတွက် လက်နက်ကြီး၊ လေကြောင်းပစ်ကူများဖြင့် အပြင်းအထန်ခုခံလျက်ရှိကြောင်းလည်း ညီနောင်မဟာမိတ်သုံးဖွဲ့ကက ထုတ်ပြန်ထားသည်။(NN-11) 

ပုံစာ- ရခိုင်စစ်မျက်နာတွင် ပါဝင်တိုက်ခိုက်နေသည့် အကြမ်းဖက်စစ်ကောင်စီ၏ လေယာဉ်တစ်စီးကိုတွေ့ရစဉ်။