မြောက်ဦးမြို့ ကျောက်ရာဇ်ကေရပ်ကွက်မှ တိုက်ပွဲဖြစ်နေစဉ်ရဲတပ်ဖွဲ့ဝင်များက ခေါ်ယူသွားသည့် လူငယ်တစ်ဦး (၅) ရက်ကြာသည် အထိ အဆက်အသွယ်မရဘဲ ပျောက်ဆုံးနေသဖြင့်မိသားစုများ အနေဖြင့် လွန်စွာစိုးရိမ်နေကြရသည်ဟု သတင်းရရှိသည်။

၎င်းလူငယ်မှာ အသက်သုံးဆယ်ကျော်အရွယ် အာဦး (ခေါ်)ကိုကျော်နိုင်ဦး (ဘ) ဦးအောင်ကျော်လှိုင် ဖြစ်ကြောင်း သိ၇သည်။  

ဒီဇင်ဘာ ၂၆ ရက် ညနေ ရ နာရီခန့်တွင် တိုက်ပွဲဖြစ်ပွားရာမှလက်နက်ကြီးကျည်တစ်လုံးသည် ကျောက်ရာဇ်ကေ ရပ်ကွက်အတွင်း လူနှစ်ဦး အိမ်စောင့်ကျန်နေခဲ့သည့် အိမ်အတွင်း ကျရောက်ပေါက်ကွဲပြီးတစ်ဦးသေဆုံးကာ ကျန်တစ်ဦးကို ရဲကဖမ်းခေါ်သွားပြီး ပျောက်ဆုံးနေသည်ဟု မိသားစုများက နိရဉ္စရာသို့ပြောသည်။

“အဲဒီနေ့က ဘေးအိမ်သုံးလေးအိမ်ခြားကမယူကမ်း၊ သစ်ကတိုးကျေးရွာဇာတိ၊ မြောက်ဦးမှာ အိမ်ထောင်ကျနေတဲ့ ကိုညွန့်မောင်ကလာပြီး အဖော်အိပ်ပေးပါတယ်။ အာဦးနဲ့ နှစ်ယောက်။ ကိုညွန့်မောင်က အောက်ထပ်ကုတင်မှာ အိပ်ပြီး အာဦးက အိမ်အပေါ်ထက်မှာ အိပ်ပါတယ်။  လက်နက်ကြီးကျည်က အောက်ထပ်ကုတင်တည့်တည့် ကိုညွန့်မောင် အိပ်နေတဲ့ နေရာကို ကျပါတယ်။ကျတဲ့နေရာမှာ သူက သေပါတယ်။ အဲဒီခါ အာဦးက ကိုယ့်အိမ်ကို လက်နက်ကြီး ကျတယ်ဆိုပြီး  မီးတွေကို ဖွင့်လိုက်ပါတယ်။ အဲဒီ အချိန်မှာ ရဲဝတ်စုံနဲ့လို့ ပြောပါတယ်။  ခြောက်ယောက်က ခုနှစ်ယောက်လောက်က တံခါးကို ဖွင့်ခိုင်းပါတယ်။  မဖွင့်ရင် ပစ်သတ်ဖို့လို့ပြောလို့တော့ အာဦးက ဖွင့်ပေးလိုက်ပါတယ်။ သူ့ကို တစ်ခါတည်းဆွဲခေါ်သွားပါတယ်။ ဘယ်စခန်းက ရဲသားတွေ ဆိုတာလည်း မသိလိုက်၇ပါ။ အဲဒီအချိန်ကတည်းက အဆက်အသွယ်မ၇ဘဲ သူပျောက်နေပါတယ်”ဟု ပြောသည်။

၎င်းအာဦး(ခ) ကျော်နိုင်ဦးမှာ နိုင်ငံရေးကို စိတ်ဝင်စားသူလည်း မဟုတ်ဘဲ အိမ်တွင်နေသူလူငယ်တစ်ဦးသာဖြစ်ပြီး အပြစ်မရှိသဖြင့် သူ့ကို ပြန်လွှတ်ပေးစေချင်သည်ဟု မိသားစုများကပြောသည်။

“သူ့ကို မေးမြန်းစစ်ဆေးပြီးရင် အမြန်ပြန်လွှတ်ပေးစေချင်ပါတယ်။ သူက နိုင်ငံရေးနဲ့လည်းမပတ်သက်ပါဘူး။ အိမ်စောင့်နေရင်း အဖမ်းခံရတာပါ။ အခုတော့ အဆက်အသွယ်မရတဲ့ အတွက် အရမ်းစိုးရိမ်စရာ ဖြစ်နေ၇ပါတယ်” ဟု ပြောသည်။

သေဆုံးသွားသူ ကိုညွန့်မောင်အလောင်းအား နံနက် မိုးလင်းသည်နှင့် အိမ်ပြင်ကိုထုတ်ယူနိုင်ခဲ့ပြီး  ရပ်ကွက်နေ လူများက ဝိုင်းဝန်းသဂြိုလ်နိုင်ခဲ့သည်ဟု သိ၇သည်။